Dalam dom urang hu Trung ương Đoàn saong Trung ương Hội LHTN Việt Nam pok brei Giải thưởng Halar hatian pakat negar thun 2019 hu sa-ai Lê Anh Tuấn, umo 23 thun, daok di tỉnh Bình Dương, urang hu angan iew lac "hiệp sĩ bóng đêm". Dalam labaih 2 thun, sa-ai nduac hu jaik 300 mbang radaih cấp cứu oh mek jien, samar ba manuac urang njauk bala tame sang iek ruak.

Sa-ai Lê Anh Tuấn 

Sa melam atah di ini jaik 2 thun, tuk daok peih radaih ô tô di sang drei nao jao pandap, Tuấn mboh sa bala di kreh jalan. Urang njauk bala var drei, darah sre bak rup. Oh huac hagait, sa-ai pataok radaih veik, iew bhap bani daok jaik taphia nan ba urang njauk bala tagok radaih di drei, pajeng tame sang iek ruak. Yau sa sứ mệnh, dom bala bhian rah tabiak anak meta di sa-ai Tuấn bo oh mbang halei sa-ai klaak veik urang njauk bala, jeng oh mek jien hagait hadei di dom mbang pajeng.

Dalam dom mbang radaih akaok meti, Tuấn hu ba bruk urang njauk bala tagok mạng xã hội, caong manuac sia klah rabha piah duah gauk gar. Jeng meng nan, dom mbang radaih cấp cứu oh abih jien hu pambak prong.

Tuấn brei thau: “Điện thoại drei hu taduan rilo mbang iew brei thau ka bala angaok tỉnh Bình Dương. Tuk thau ye drei nduac, oh kuhria hagait tuk daok mbang daok huak, tuk melam padam! Tuk saneng tal bruk urang nyu ndih kreh jalan radaih nao mai, oh ka ndom tal bruk mbuan ba tal metai lahik meyah oh samar ba tame sang iek ruak, lac drei oh mbang ndih hu. Pajeng manuac urang njauk bala, jeng oh saneng tal bruk mek jien ngak hagait. Daong thei hu ye daong”,.

Sruh radaih pajeng randap di sang jeng sruh radaih cấp cứu bất đắc dĩ! Tuấn hu pabak gom brei nao dahlau, radaih jhul, mahalei tapok jru bhong… abih hatai nduac nao. Sa harei di urang likei dam lac meng 2 – 3 tuk page, hadei di tuk mek blaoh njam patam baoh karaoh di darak đầu mối, Tuấn mai sang daong pablei salih di darak Thủ Dầu Một. Tal 7 tuk melam, tuk abih bruk sang, Tuấn caik tukvak ka bruk daong urang njauk bala oh mek jien.

Tuấn khan lac: Tuk harei mehit hu thei njauk bala ye drei jeng nduac nao. Min tuk harei manuac sia nao mao angaok jalan biak rilo, duah radaih pajeng urang njauk bala jeng mbuan jang nan ye drei nduac tuk melam. Phone tangin tuk halei jeng peih chuông biak prong. Khan ao, kadung jien caik caga angaok bàn piah tuk halei caong khin ye mek nao chip. Gaok melam mai tuk daok nao ma-in haong ayut kamei ye hu urang njauk bala, nan ye dom mbang hadei drei pajeng ayut kumei nao ma-in meng radaih cứu thương, piah tuk hu menuac njauk bala ye drei nduac nao! Ayut drei jeng thau saong pachreih tui”.

Ong Lê Trung Tư (52 thun, ame Tuấn) hadar veik: “Dom mbang camereip, nyu nao pajeng pandap blaoh mai sang haong sruh radaih mbau ngin saong bak darah, dahlak haong amaik di nyu mboh bo tatuak drei. Blaoh melam halei jeng  yau nan nyu jeng nduac radaih nao tuk kreh melam, dahlak ndih oh van. Oh thau hadom mbang pacang nyu, min nyu jeng peih radaih nao. Mboh sruh radaih klak bhian khut, dahlak pataom jien blei ka nyu sa sruh radaih karei piah nyu nduac ngak bruk ini. Saneng veik mboh anek urang nao ma-in, daok anek drei nao ngak bruk pahla, pacang ngak habar hu, tok thau kakei nyu nao mai ka nyu siam”.

Dom mbang radaih samar drah, takik tuk halei Tuấn thau angan je di urang bo drei daong. Min lavik lavik, jeng hu dom mbang iew phon mai piah ndua dhal phol. Nan lac kadha duy nhất bo Tuấn taduan mek hu. Tuấn khan lac: “Ngan haong drei, yau nan lac ginup paje. Kadha bo drei caong khin nan lac… “thất nghiệp”. Melam halei oh pang hu phon iew brei thau lac hu menuac njauk bala, lac melam nan drei mboh uan kayua lac manuac sia langiu nan thei jeng salamat angaok jalan”./.

Urang lang: Jasi - 13/1

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân