Labaih 12 tapa, dom urang nong takai haluk saong dom ong bhik di xã Thuỷ Liễu - huyện Gò Quao, tỉnh Kiên Giang hu jak gauk padang ngak yaok rituh mbaik tatua bê tông khang kajap di bhum palei pala. Abih di nyu lac, dom mbaik tatua ini hu padang ngak khang kajap kayua hu bruk rik daong di dom urang ngak pahla, bruk rik daong abih drei di ong bhik Lý Long Công Danh, akaok baha Thuỷ Liễu saong di kapul urang padang ngak tatua pahla di sang baha huyện Gò Quao, tỉnh Kiên Giang.

Ong Lý Công Danh - urang dang akaok baha Thủy Liễu

Di baha Thuỷ Liễu, xã Thủy Liễu jaik pluh urang nong, urang ranaih di abih jeng labaih 50 thun, taha di abih jeng jaik 80 thun hu nao padang ngak tatua di xã Vĩnh Bình Bắc, huyện Vĩnh Thuận, tỉnh Kiên Giang. Ini lac baoh tatua prong 2,6m, atah 30,5m kayua sa urang ngak pahla daong brei jien ngak saong ong bhik Lý Long Công Danh, urang dang akaok baha Thuỷ Liễu dang tabiak padang ngak gam haong kapul urang padang ngak tatua di baha ngak brei saoh oh mek jien pah. Ong Nguyễn Văn Tám, 72 thun daok di xã Thuỷ Liễu brei thau drei hu mbaok nao ngak pahla yau ngak tatua, ngak jalan gam haong baha meng lavik mai. Sang hu hamu taneh ye caik ka anek nyu pala drak, drei nao ngak pahla ka rahra nan ye biak bui sambai, tal tuk mbang huak ye mbang huak gam haong baha, padeih padei di labik blaoh ngak chip. Melam mai ye thei nao sang nan. Yau nan bo kapul labaih 20 urang hu mbaok tame ngak tatua pahla di baha Thuỷ Liễu hu padang tagok saong jak gauk nao grauk labik dalam tỉnh piah padang ngak dom baoh tatua anit ranam labaih pluh thun ini mai. Ong Tám brei thau: “Sang atah di baha 4 mbaik jalan, ngak lavik paje, sang hu hamu taneh min drei prong thun paje nan ye caik ka anek nyu ngak daok drei nao ngak pahla haong baha, daong hu hagait ka rahra ye drei ngak.”

Ong bhik Lý Long Công Danh, urang dang akaok baha Thuỷ Liễu, xã Thuỷ Liễu huyện Gò Quao brei thau, drei ba tabiak bruk ngak pahla meng thun 2007 tal ini. Do nan thun, drei saong kapul urang ngak tatua di drei hu padang ngak labaih 88 baoh tatua bê tông khang kajap, siam mekre.

Meng bruk ngak pahla di ong bhik Lý Long Công Danh nyu hu pambak prong saong urak ini hu labaih 20 urang tut angan tame nao ngak pahla gam haong baha. Rilo urang ngak pahla jeng duah tal ong bhik piah brei jien padang ngak tatua ka dom labik kan kandah. Ong bhik Công Danh daok brei thau lac, di puk palei, drei nao jak ba padang ngak tatua ngan haong yaom 2 triệu/1m2, meyah nao atah ye yaom glaong jang labaih 2,3 triệu/m2. “Dahlak taduan ngak saong ieu pataom jien padang ngak sa mbaik tatua tok abih jaik 80 triệu đồng. Meng yaom jien ini oh thei khin taduan ngak min drei taduan ngak brei hu chất lượng, hu bê tông cốt thép nan ye manuac sia meng jia tui, meng nao jak ba hu, drei bo ngak oh siam manuac sia oh daok jia tui drei nao likau jien jeng kan.”

Lingiu di bruk jak ba padang ngak hu yaok pluh mbaik tatua bê tông di bhum palei pala bo ong bhik Lý Long Công Danh daok jak ba tapuk siphau, pok jien bac brei ka anek saih kathaot, anek saih urang bangsa Khmer, jak ba rilo kapul nyaom nao iek ruak, brei jru  ka mikva kathaot… Bruk ngak di ong bhik  Danh saong dom hatai ameh ngak pahla di mikva daok di bhum palei pala Gò Quao hu rik daong biak prong ka bruk padang ngak palei pala bahrau, pasiam rai diuk di bhap bani palei pala./.

Urang lang: Jasi-16/12

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân