Tui pataom iek veik 10 thun peih ngak Hukum nao mai angaok jalan mbak thun 2008 di dom mintri, dom gah saong dom tỉnh, ban, gam haong bruk khik ramik, tacei pato di Rajaei, Mintri jalan mbak pajeng ba hu padang Hukum nao mai angaok jalan mbak (pasiam veik) salih ka Hukum nao mai angaok jalan mbak thun 2008 piah langyah dom tavak tavaiy dalam Hukum nao mai angaok jalan mbak thun 2008. Dự thảo Hukum nao mai angaok jalan mbak pasaim veik jaik hu pok tagok Rajaei meda hu rilo kadha bahrau njauk haong bruk di urak ini, lagaih haong adat hukum di dunya.

Dom adat bahrau dalam Hukum nao mai angaok jalan mbak

Kadha daok pamaong tal di bruk padang Hukum nao mai angaok jalan mbak bahrau, Mintri jalan mbak pajeng ba caong ngak brei cambaih laih, patrun patakik dom harak adat, piah duh siam di abih kein laba di rahra saong di doanh nghiệp. gam haong nan, nao mai angaok jalan mbak meda hu siam mekre salamat jang, bala angaok jalan trun dalam jang, mbuan lagaih jang, abih takik jien ndo ka rahra saong siam ka alam môi trường. Bruk pasaim veik Hukum hu UB Thường vụ Quốc hội jao brei ngak saong pok  tagok Quốc hội di mbang nyaom ka 10 anak tal.

Dom kadha bahrau njauk caik hatai hu pasiam pabak tame dự thảo Hukum yau: ndom rah tapa ka radaih nao mai thông minh, radaih nao mai di bol bhap rahra, dom bruk pakauk oh brei ngak, njauk haong Hukum pacang caga kanjah jhak di alak mbia; pandar phone tangin tuk peih radaih, kadun radaih oh jalan cao tốc; taong phạt hadei tapa camera; meriak gauk khang kadang dalam gah pajeng ba.. 

Sa dalam dom kadha daok hu menuac sia caik hatai sangka rilo di abih urak ini, lac bruk khikramik, pato pakai, pasang iek, mek veik harak adat peih radaih di urang vi phạm jeng meda hu pabak, pasaim  njauk haong bruk di anak meta, khik hu công bằng saong ginup prein ngak brei urang mboh huac.

Nghị định 100/2019 tacei tabiak 61 bruk meyah gaoh tal, lingiu di bruk phạt jien, urang peih radaih meda njauk urang jakar khik mek harak adat  peih radaih meng 1 - 24 bilan. Bruk khik mek harak adat peih radaih hu ba tame phần mềm khik ramik vi phạm. Tổng cục saong Cục Cảnh sát jalan mbak daok khik iek dữ liệu ini. Piah paglaong akaok sahneng ngak njauk tui adat hukum, tui iek bruk ngak suan, khik siam mekre salamat bruk nao mai angaok jalan, dự thảo Hukum nao mai angaok jalan mbak bahrau, hu bruk tui iek dom mbang njauk khik mek harak adat peih radaih piah mek veik harak adat peih radaih. Jalan ngak ini daok hu ngak di rilo taneh ia angaok dunya.

Tui nan, dalam 3 thun urang peih radaih njauk khik mek harak adat peih radaih tal 4 mbang ye njauk mek veik harak adat peih radaih, hadei di nan njauk nao bac veik saong pakacah veik meng hu brei harak adat peih radaih bahrau. Bruk ini jeng dreih yau kuhria điểm piah langyah bruk vi phạm di urang peih radaih, oh tamuh tabiak adat bahrau. Rahra meda tui iek dom mbang njauk mek veik harak adat peih radaih tapa phần mềm di Tổng cục Jalan mbak Việt Nam./.

Urang lang: Musa-26/5 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân