Thun 2019 meda tamat hadei di 7 adit tra saong Tết Dương lịch 2020 tok atah Tết asak Takuh njauk 20 harei. Piah khik caga pandap panda ngan haong yaom kaom grap tanat pabak ka labaih 10 triệu bhap bani, UBND bal raya HCM daok pandar dom sở, ngành, doanh nghiệp pataom tame kuhria caga pandap Tết.

 Urang blei pandar di Co.op Đinh Tiên Hoàng, TP Hồ Chí Minh

Tui amuk Nguyễn Huỳnh Trang, Phaok akaok Sở Công thương TPHCM, meng akaok thun tal ini, bal raya HCM hu ba tabiak rilo jalan ngak peih talaih kan kandah, jhul patagok bruk buh jien tame ngak mbang, peih prong darak pasar, palagaih ka dom DN cak rok patagok bruk ngak mbang pablei salih. Jeng dalam 10 bilan tapa, yaom kaom angaok darak pasar dom janih pandap bhian pandar dalam bal mboh tani tanat, oh rah tabiak bruk kurang pandap, tagok yaom. Daok dom bruk pabak pandap grap tanat darak pasar, kayua hu bruk pambuak gauk khang di dom  labik phân phối, labik ngak tabiak, nông trại, rilo harak pambuak bruk hu caga bloh saong mboh tangin meng dahlau, sanya khik kajap yaom kaom dalam tukvak atah nan ye bruk raong pala, jien mek tame di urang nong dalam chuỗi oh pambak tal

Daok pandap pabak ka bruk blei pandar puac thun saong Tết Canh Tý 2020, sở hu pambuak bruk haong dom sở ngành, ngak bruk saong DN, kuhria caga pandap panda kaya mbang yaok harei. Tui nan, dom DN kuhria caga ngak tabiak, khik piah pandap panda pabak ka 2 bilan tết nan lac labaih 19.027 tỷ đồng, rilo jang 602,5 tỷ đồng dut haong phun jien caga ka Tết Kỷ Hợi 2019, dalam nan yaom pandap panda  caga ka pandap grap tanat darak pasar lac janih 7.245 tỷ đồng. Dom pandap panda kuhria caga hu patagok labaih 14% dut haong bruk bo bal raya jao saong tagok 21% - 28% dut haong Tết Kỷ Hợi 2019. Rilo nyaom pandap hu kuhria caga biak rilo yau rilo menuk ada, baoh menuk ada, pandap panda ngak blaoh, ralaow anek athur, menyek mbang, brah …

Ndom ka nyaom kaom pandap panda duh ka tết, dom DN hu mbaok tame danak dak grap tanat darak pasar sanya khik kajap yaom kaom, oh brei tagok yaom pablei tabiak dalam sa bilan dahlau di tết saong 1 bilan hadei di tết; taphia di nan brei trun yaom khang dalam 2 harei jaik tết ngan haong dom janih pandap mbang yaok harei yau ralaow pabui, ralaow menuk, baoh menuk ada…

Ong Trương Chí Thiện, Akaok Công ty CP Thực phẩm Vĩnh Thành Đạt brei thau, thun ini bruk kuhria caga pandap tết rah tabiak dalam siam laghaih kayua yaom pandap mbang, nguyên liệu blei tame tani tani. Urak ini công ty hu ngak salah blaoh bruk pambuak gauk haong dom đối tác piah đầu tư, patagok tapol piah paglaong sản lượng baoh menuk ada pabak ka darak pasar tết, patagok jaik 20% dut haong tuk ini thun dahlau. Langiu di nan, công ty jeng hu khik piah pandap panda piah caga bruk urang blei biak rilo. Tui kuhria mboh dahlau, yaom baoh menuk ada dalam tuk tết daok khik hu tani tanat kayua hu labik pabak biak rilo.

Bal raya meda brei patagok saong dui atah tukvak peih pabah mbang dom siêu thị; pasang iek tapak dom labik pablei pandap grap tanat darak pasar, taong yaom bruk ngak njauk adat hukum gah bảng hiệu, niêm yết yaom; patagok pambuak bruk di dom sở ngành chức năng dalam bruk pasang iek darak pasar, yaom kaom, an toàn vệ sinh pandap mbang menyum piah duh siam di abih ka bruk blei pandar dalam tuk Tết di bhap bani./.

Urang lang: Jasi - 13/11

 

HỆ PAPAR SAP BANGSA VOV4 BHUM BAN RAYA HCM

Labik daok: 75 Trần Nhân Tôn, Phường 9, Quận 5, TP.Hồ Chí Minh
Yam ndok : Trần Văn Thao
Phaok yam ndok: Cao Thị Thoa, Trần Xuân Thân