Rilo thun tapa, sa-ai Ngô Thị Thanh Nhàn daok di pulao Ông Hổ (xã Mỹ Hòa Hưng, ban sit Long Xuyên, t.An Giang) daneiy angan haong bruk pala njam dalam aia di sang halăm brei jien mek tame glaong. Meng bruk pala njam piah mbang yaok harei di baoh sang, urak ini njam hacih di sa-ai hu mbaok dalam rilo siêu thị pak An Giang.

Sa-ai Nhan daok paik njam 

Yaom lac menek tabiak dalam baoh sang urang ngak nong, min ngan haong sa-ai Nhàn, tuk ba tangin tame pala njam hacih lac abih rilo vaktu roh duah, bac megru biak glaih glar. Tuk akaok mereip, kayua oh ka thau cambaih ilamu  saong oh hu bac megru ka jalan pala njam dalam aia, sa-ai gaok oh takik kan kandah dalam bruk mong iek. Gaok tuk mai hu dom mbang bahrau pala trun, njam metai abih, ba tal khat lahik.

Oh kadul taok, sa-ai Nhàn duah tapuk, báo mai puac piah bac megru, duah thau angaok mạng Internet, saong hu mbaok tame dom tal pasram kayua Kapul urang nong xã peih tabiak. Meng nan, bruk pala njam dak harei dak hu siam mekre jang. Kayua mboh darak pasar blei biak rilo njam, nan ye sa-ai buh jien tabiak labaih 500 triệu đồng padang ngak sang halăm praong labaih 1.500m2 gam haong mejam njam pala dalam aia, pruh aia tự động.

Dom pandap panda meng sang halăm tal mejam njam pala dalam aia hu padang ngak tui ilamu di Isarel, hu peih tự động ngan haong jalan pruh ia nduac nao mai daong pabak ginup asal dinh dưỡng piah ka phun cakrok patagok siam di abih, aia di gah ala bingun jeng meda raong ikan hu. Sa-ai Nhàn jeng urang akaok meti di palei pala njam hacih sa-at pablei tabiak darak pasar.

Tui sa-ai Nhàn, bruk sa-ai buh jien tabiak piah padang ngak sang halăm hu daong ka njam oh gaok nerak tachauk meng gah lingiu par tame nan ye patrun hu biak rilo bruk pandar jru khik caga phun pala, tabiak hu njam siam brei ka urang blei mbnag. Langiu di nan, dalam tukvak pala, jhui trun pajaih pataom dalam sa mbang haong gauk. Bruk trun pajaih tui yaok mbang, yaok labik saong yaok tukvak karei di gauk piah pablei tabiak darak pasar rilo janih njam karei di gauk dalam harei saong daong ka urang pala njam pablei hu yaom.

Urak ini, bein njam pala dalam aia di sa-ai Nhàn rilo meng pala dom janih njam: xà lách, tamun aia, njam sabei, xà lách xoong Nhật Bản, cải thìa, cải bẹ dúng, njam puan ... Njam pala dalam aia di sa-ai Nhàn hu rilo urang thau tal saong daok hu mbaok di dom darak prong di bal sit Long Xuyên. Yaok bilan, sa-ai paik pablei meng 1-2 tấn njam dom janih. Njam patam pablei tabiak tani tanat, hadei di kaoh abih phun jien buh tame, sa-ai Nhàn daok laba hu jaik 20 triệu đồng sa vụ (tui yaok janih njam, tui yaok tukvak). Bruk njauk biai nan lac, njam pala dalam aia di sa-ai Nhàn jeng hu mbaok di dom siêu thị dalam pasak tỉnh An Giang, min oh tuk halei ginup pablei.

Bruk pala njam dalam aia di sa-ai Nhàn nan lac bruk ngak nong tui ilamu glaong akaok meti di palei. Piah pabak dom janih njam hacih sa-at brei ka urang blei mbang. Taphia di nan, peih bruk pablei salih hu brei thau labik ngak tabiak, yam tal padang angan pablei salih, cakrok labik pablei tabiak, ba  tame pablei di dom cửa hàng, siêu thị, darak pasar. Tapa nan, daong padang hatai jia ka urang blei mbang jeng yau khik hu kein laba ka urang pala./.

Urang lang: Jasi-22/4

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân