Njauk jru mek dalam bilan hè nan lac bruk huac kanda di rilo manuac urang, abih di nyu lac tuk nao rivang ma-in di bhum taneh bahrau hu langik tasik karei jang. Yau nan ngak habar palih ruah saong khik piah pandap mbang ka nyu siam? Meyah oh patuah drei njauk jru mek ye brei ngak yau habar?

Pandap mbang menyum njauk rao ka hacih dahlau si mbang 

Bác sĩ Đinh Tấn Phương - akaok khoa cấp cứu Sang iek ruak Nhi Đồng 1-TPHCM – brei thau, sang iek ruak hu taduan manuac urang njauk jru mek kayua pandap mbang luac thun, dalam nan rilo di abih laik tame bilan pandiak bhang. Bác sĩ Phương ndom lac bilan hè langik pandiak, meyah oh khik piah pandap mbang ka nyu siam ye laghaih ka vi khuẩn tamuh khang, ngak khut pandap mbang. Urang mbang njauk janih pandap ini mbuan ba tal njauk jru mek, abih di nyu lac uranaih.

Taphia di nan, tame bilan hè rilo baoh sang, jabat xí nghiệp, sang bac peih bruk nao rivang ma-in nan ye bruk ngak pandap mbang huak oh tanit tanat yau daok pak sang. Meyah mbang dom pandap mbang pablei langiu jalan dhuan oh thau cambaih asal di nyu, oh khik hu hacaih sa-at pandap mbang menyum atau dom pandap takik mboh hu jeng mbuan ba tal njauk jru mek pandap mbang menyum, ngak ka mbang nao me-in oh daok bui sambai. Bác sĩ Phương bei thau, makna ba tal njauk jru mek pandap mbang menyum nan lac dom asal dinh dưỡng dalam pandap mbang mbuan salih chất saong ralai jeng chất oh siam kayua dom jru mek di vi khuẩn (bhian gaok vi khuẩn Salmonella, E.Coli), kayua njaom virus, anek ruak atau kayua pandap panda njaom jru mek (jru hóa học, jru mek hu dalam pandap mbang menyum).

Hadei di tuk mbang jaik sa mon atau rilo jang, hu tal 90% urang njauk jru mek meda njauk taglon ta-aok, pandik hatung, aih craoh. Dom triệu chứng karei yau ye pandik akaok, hawing akaok, kan daok dalam rup, pandiak glaong jeng meda hu min nyu tui janih jru mek saong tui janih vi khuẩn. Hadei di njauk jru mek pandap mbang menyum bhian gaok meyah njual ye lahik aia, glaih glar. Dxaok meyak njauk trak, urang ruak meda mboh sốc, pandik rup babhap saong gaok mai ba tal metai lahik.

Hadei di tuk mboh yau njauk jru mek pandap mbang menyum, urang ruak njauk brei pabak ia ka nyu samar drah (abih di nyu lac urang taha saong uranaih) tui jalan bhian menyum aia pandiak caik la-ar atau oresol, min menyum mbiah  piah plaih bruk lahik aia. Hadei di nan, nao tal jabat y tế daok jaik di abih piah hu jalan langyah ka nyu lagaih.

Di sang iek ruak, dom bác sĩ meda cấp cứu, taong ruak, taphia di nan peih ngak dut iek mẫu ruak saong dom dut iek karei piah taong yaom ruak yau habar, duah tabiak makna di nyu saong ba tabiak jalan taong ruak ka nyu njauk./.

Urang lang: jasi-23/7

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân