Cập nhật ngày: 13/7/2015

1# Kadung jien daong uranaih Việt Nam pambuak bruk saong Ủy ban bhapbini  huyện Ngân Sơn, tỉnh Bắc Cạn peih bruk padang ngak sang gam daok gam back a anek saih sang bac Trung học cơ sở Thuần Mang. Bruk oadang ngak sang gam daok gam bac ka anek saih sang bac Trung học cơ sở Thuần Mang hu  padang barau 10 haduk daok ka anek saih saong urang jakar khik iek anek saih, ramik pasiam dom  công trình phụ trợ. Abih tih yaom jien padang ngak lac 2,3 tỷ đồng kayua Kadung jien daong uranaih Việt Nam jak ba Tổng công ty khí Việt Nam daong. Tui kuhria, bruk padang ngak nan hu  ngak blaoh dahlau di tuk tame thun bac barau 2015 - 2016. 

 

2/ Peih ngak sarak salih janih phun pala bilan hè thu di dom taneh padai oh ngak hu kayua pandiak bhang, urak ini dalam tỉnh Quảng Trị hu pala jaik 600 ha phun ratak naih salih ka phun padai. Ong Võ Văn Hưng, giám đốc sở ngak nông saong patagok palei pala tỉnh Quảng Trị brei thau, kayua caga hu janih phun salih ka nyu lagaih haong langik tasik, tal urak ini hu dom kein laba tuk camereip meng bruk salih taneh ngak padai tapa pala phun ratak naih. Bhap bini thau hu bruk pala drak barau.

3# Darak pablei athar craih biak tani tanat. Tui yaom urak ini meng 20.000 - 25.000 đồng/sa kg athar craih that, rilo sang urang nong di huyện Nghĩa Hành, tỉnh Quảng Ngãi hu ba taneh klak saoh, di bhum taneh dhaong piah pala phun craih amek athar. Hadei tuk kaoh  bloh phun jien buh tabiak ngak, urang pala craih di Nghĩa Hành laba hu 15 triệu đồng/sa ha. Mboh hu laba meng bruk pala craih, rilo sang di Nghĩa Hành buh jien tame ramik pasiam, pambak praong taneh pala craih.  

 

4/ Tỉnh Nghệ An daok peih ngak ralo jalan daong ka urang nông pala, ngak, saong pablei kaya nông. Bruk njauk biai nan lac, tỉnh hu daong sa mbang 300 triệu đồng sa mô hình ka urang nông piah pasaim veik mblang hamu hadei di tuk ngak salah bloh bruk yau Yuan lac “dồn điền đổi thửa” ngan saong mblang hamu praong pala ratak lo saong padai, daong meng 30 tal 100% yaom pajaih, 25 tal 50% yaom khak drak.

5# Tal urak ini hu labaih 20 sang di dom plaei bhum atah bayah dalam xã Cư Drăm saong  Yang Mao, huyện Krông Bông (Đắk Lắk) buh phun jien tabiak pala menaih di angaok taneh praong abih tih jaik 30 ha. Tui taong yaom, phun menaih diuk hu dalam pandiak bhang, takik halak halin, lagaih saong bhum taneh mbuan ceik di labik ini. Bruk njauk biai nan lac, pala phun meniah abih takik phun jien min kein laba glaong.

 

6/ Tỉnh Bình Thuận barau hu var ngak bruk saong kapul chuyên gia Canada ka bruk peih ngak dự án kỹ năng bruk ngak VN. Dự án nan kayua jabat patagok dunya Canada daong oh bayar veik yaom 20 triệu đô la Canada piah pasiam bruk khik iek pato megru kỹ thuật saong pato bruk ngak di VN; pasiam jalan taom gaok dom danak dak pato megru kỹ năng lagaih, siam ka urang kamei, dam dara, bangsa takik saong bhap bini palei pala di dom labik pato megru kỹ thuật saong pato bruk ngak.

7# Tổng cục Chính trị bol bala bhapbini Việt Nam barau peih bruk parang iek saong brei giai mbang pakacah rup cih thieu nhi toàn quân thun 2015. Ngan saong kadha “par glaong dom caong khin”, hadei di labaih 3 bilan peih tabiak, mban peih bruk taduan hu 586 blah rup cih di 570 urang meng 50 đơn vị đầu mối di mitri Quốc phòng. Dom rup cih biak mekre ngan saong kadha “hatai anit ranam taneh ia, ranam Wa Ho, pok je sang urang lin, hatai ranam tasik pulao, caong khin chinh phục đại dương atau vũ trụ, caong khin hòa bình ka baok taneh, bruk jum pataom…Chất liệu piah cih jeng hu rilo jnaih, yau ye: sơn dầu, pagam ba-ar sambo màu, baar báo, pagam athar brah, kacing ao, kanduh baoh, hala phun thu, bingu thu, …

 

Patui di ini dom khau tin dunya:

8/ Akaok mintri pablei salih Australia An-đru Rốp hu dom panuac ndom biak lạc quan ka hiệp định pambuak bruk xuyên TBD (TPP) tuk ndom lac thỏa thuận ini meda hu mbaoh tangin dalam “3 tal 4 adit tal” tuk lambaik 12 taneh ia hu taom gaok gauk.

9# Mintri Y tế Hàn Quốc barau brei thau, taneh ia oh hu urang halei njaom Hội chứng hô hấp bhum Trung Đông (MERS) dalam 5 harei hamiet saong oh hu urang halei metai kayua MERS dalam dua harei tapa. Tui mintri ini, abih tih urang njaom MERS jeng lac 186 urang kuhria meng harei 6/7. Urang metai lahik jeng lac 35 saong tỷ lệ metai khik tamo 18,8%. Kayua yau nan ye, rajaei Hàn Quốc meda brei tabiak panuac lac abih bruk khủng hoảng kayua MERS, suai abih di puac bilan 7.

 

10/ Barau ini, jabat pacang cakak saong patrun bala di TL brei thau, pandiak bhang hu patrun di 27 dalam 40 tỉnh njauk gaok kan kandah di atneh ia ini. Hu yau nan meng hu dom jabat chức năng ba tabiak dom jalan ngak yau daong ba ia tal dom labik njauk pandiak bhang piah pandar, piah pala dtak, rok bingun, ngak hajan./.

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân