Khaw tin 19h , harei  26/6  

# Kapul urang QH ban raya HCM mbang 13 kayua akaok negar ong Trương tấn Sang pan akaok hu mbang taom gaok saong UBMT negar VN ban raya HCM saong dom cử tri hadei di mbang nyaom ka 7. Di mbang taom gaok, cử tri ban raya hu taong yaom glaong bruk ngak, trách nhiệm di kapul urang QH ban raya HCM dalam mbang nyaom. Dom urang QH kham merat hu mbaok tame ginum meyai saong hu ralo panuac abih hatung hatai rik tame ka dom dự án hukum pambuak tal rai diuk di bhap bini. Taphia di nan, cử tri ban raya jeng brei mboh hatai suh sah ka dom bruk pambuak tal salih barau pato megru, dom bruk kinh tế, xã hội, kadung jien karja jeng yau quốc phòng an ninh; dom cuang kandah tavak tavaiy dalam peih ngak hukum urak ini.

# Di Hà Nội, mintri Y tế saong Bảo hiểm xã hội Việt Nam pambuak bruk peih mittinh harei bảo hiểm y tế Việt Nam. Brei panuac di mít tinh, akaok mintri Y tế Nguyễn Thị Kim Tiến breu thau, mintri daok pambuak bruk saong dom jabat chuc nang pataom tame paglaong bruk blei abih bảo hiểm y tế, paglaong jang chất lượng iek ruak saong trun takik chi phi bo bhapbini njauk buh jien di drei tabiak tuk nao iek ruak meng bảo hiểm y tế.

# Di ban sit ĐN, rayo sap ndom VN jabat daok di bhum kreh negar barau peih nyaom meyai urang pambuak bruk thun 2014. Dalam nyaom meyai, Bí thư đảng ủy, TGĐ rayo sap ndom VN Nguyễn Đăng Tiến taong yaom glaong dom kham merat di jabat daok di bhum kreh negar dalam thun tapa tuk ngak hu ralo khau tin, kadha vak siam hu chất lượng glaong; samar  brei thau chip taong abih  dom gah, dom bruk ngak hu, dom jak jeng saong dom bruk oh ka ngak hu di 9 tỉnh bhum kreh negar.

# Di pasak Công nghệ sinh học ban raya Hồ Chí Minh barau rah tabiak “ Nyaom darak – parang iek pajaih ngak nong mbang ka 2 thun 2014 kayua So ngak nong saong cakrok palei pala ban raya peih ngak. Nyaom darak saong parang iek hu yaih khan tal mikva urang nong ban raya saong dom tinh, ban daok jaik taphia dom pajaih phun pala, anek raong hu chat luong glaong pambuak saong brei dom alamu barau dalam raong glang saong pala drak, rik daong paglaong bruk meriak gauk di  dom janih pandap kaya nong ban raya Ho Chi Minh saong dalam taneh ia.

# dalam mbang pakacah ĐH thun ini, tỉnh đoàn Đắc Lắc ieu pataom hu jaik 500 urang đoàn, dam dara mai meng dom đoàn trường saong kapul đoàn hu mbaok tame daong ka anek saih saong gauk gar anek saih. Dom kapul dam dara, sinh viên halan hatian hu mbaok tame bruk khik iek trật tự an toàn jalan mbak, tacei pato ngak harak gar, tacei labik pakacah, jak ba dom kapul nyaom, menuac urang daong radaih nao mai, lisei huak, sang daok saoh, sang daok lap jien ka anek saih saong gauk gar anek saih.  

# Dom harei tapa, dalam tinh Tra Vinh hu hajan ribuk ngak ka labaih 2 rabau hecta padai hè thu daok tathak njauk jaleih abih, ngak khat lahik tal nang suat, chat luong athar padai saong jien mek tame di urang ngak nong. Amuk Phạm Thị Huệ, daok di xã Thạnh Phú, huyện Cầu Kè – urang kham merat yuak dahlau 8 công padai jaleih ndom lac : “Padai barau tathak, njauk hajan jaleih. Hajan hamit, padai oh ka tathak siam min njauk yuak, kayua piah suai lavik nyu bruk tal ala, khat lahik rilo jang. Padai ndih yau nan 3 ratuh labaih,  padai dang 2 ratuh labaih. Urak ini, urang nao ngak apah abih paje, daok taneh tambok ye mac yuak hu.  

# Piah paglaong akaok sahneng di dom mban, ngành, kapul nyaom saong bhap bini ka bruk pacang cakak ruak tangin takai cambuai, sở y tế tỉnh bến Tre barau peih bruk pathau khan “rao tangin saong jabol piah pacang cakak jit ruak tangin takai cambuai” thun 2014. Piah kuhria caga pacang cakak jit ruak tangin takai cambuai, ong Nguyễn Văn Thắng, phó giám đốc sở y tế tỉnh Bến Tre ieu dom pakat, dom ngành jhul pakhang bruk pathau khan pacang cakak jit ruak tangin takai cambuai, kham merat patrun tal tanut biar di abih bruk metai lihik kayua ruak saong patagok bruk pasang iek, duah mboh chip, lpacang padam abih dom sruh jit ruak.

Khaw tin dunya

# Dom cei gru, nai gru saong saong dom nek saih sang bac Nguyễn Du – Sang bac di urang Việt daok di ban ine Viêng-chăn, Lào barau peih bruk rik pataom daong urang jakar, urang lin saong bhapbini daok khik caga bien gioi saong pulao kaoh. Di tuk peih bruk, rik pataom hu 25 trieu 500 rabau kíp, sumu labaih 3.000 đô la Mỹ. Yaom lac yaom jien oh glaong, min bruk rik daong brei mboh hatai kak kajap di gru pato, anek saih sang bac Nguyễn Du ngan saong taneh ia, palei negar.

# Nyaom darak pasar pablei salih dunya SAITEX mbang ka 21 barau peih tabiak di ban Giôhannexbớc negar Nam Phi. Nyaom darak SAITEX thun ini hu mbaok labaih 800 đơn vị parang iek mai meng dom taneh ia, ngan saong dom nền kinh tế praong saong barau patagok nan lac Nam Phi, Trung Quốc, Ấn Độ, Braxin, Thổ Nhĩ Kỳ, Pakixtan, Indonesia, Malaysia saong  Việt Nam./.  

# Tui kuhria, hu jaik 500 rabau urang I-rắc nduac klak sang danaok dalam dom harei tapa kayua bruk methuh gauk khang di ban sit Mô-xun saong dom bhum jaik taphia. Rilo sang pak ini njauk padang lieu bat atau daok dalam labik padang tam ala lingik pandiak khang 45 độ C. Anak bruk yau nan, danakdak padai brah dunya hu patabiak sa bruk drah samal piah brei pandap mbang menyum ka dom urang gaok kan kandah kayua bruk methuh gauk di I-rắc./.