Palei Thượng Minh, xã Hồng Quang (huyện Lâm Bình, tỉnh Tuyên Quang) urak ini hu 94 sang gam haong 500 menuac lac urang bangsa Pà Thẻn. Dom thun tapa, urang Pà Thẻn daok pak ini tuk halei jeng khik ramik ilamu meng kan di bangsa drei.

Ilamu chat pui di urang Pà Thẻn 

Mai tal palei Thượng Minh, drei hu mboh di anak meta dom urang kumei  Pà Thẻn ngui cuk khan ao meng kan hadah tanyak daok la tapen kik menyim khan bai. Khan ao meng kan di urang Pà Thẻn hu dom labik biak karei, biak mekre, hu rilo sambo màu saong dom bingu biak gheih karei di gauk. Meng hatai sahneng sambo meriah  lac sambo di pui, sambo di ia harei, yang pui lac yang ginreih abih di bangsa, urang kumei mek sambo meriah lac sambo hu pandar rilo angaok khan ao pambuak haong dom tanyiak patih saong jhuk, pablak tame dom jalan bingu la sambo hijao, katam... ngak jeng blah khan ao biak mekre meta, hadah tagok di bhum ceik glaong, glai ram. Dom blah khan ao hadah pambuak haong dom pandap cuk tanyak yau kaong pariak, katap 3 hala, khan mbar akaok ngak ka mbaok meta urang kumei Pà Thẻn yau hadah tanyak jang.

Urang Pà Thẻn hu dom ilamu biak karei di bangsa drei, abih di nyu lac dom adat meng kan yau: chat pui, likau hajan, likau khon, paling lisei bahrau, paling yang man pateok... Dalam nan, harei pataom chat pui lac sa adat cambat biak ginreih dalam hatai sahneng di urang bangsa Pà Thẻn, kayua tui hatai sahneng di urang, yang pui lac yang ginreih di abih, pui hu ba mai ka urang bangsa Pà Thẻn bruk siam mekre, likau po yang sraong daong ka rahra hu sron mbon, pandap panda hu salamat, pateok but khmaot, jhul kadun likuk ruak kik saong ba mai prein khang biak khang...

Tui ong Húng Văn Hín, daok di palei Thượng Minh, harei pataom chat pui di urang Pà Thẻn bhian rah tabiak di tuk salah bruk ngak nong, hu peih tabiak ngak meng bilan 10 saka ia harei mbiah tal bilan 1 thun hadei. Dom pandap paling yang dalam adat chat pui biak mbuan, tok hu sa drei menuk tuk, 10 cavan alak patih haong dom mbaik njuh angaok glai piah am jeng dhang meriah bhong. Adat jeng dui atah dalam jaik 1 tuk, meng kakuh yang taneh, yang hamu likau adat chat pui mbiah tal tuk hu jaik 10 likei dam khang kadang chat tame pui daok khuah saong dhang pui meriah bhong meng dua plaak takai saoh bo oh pandung, oh huac hagait.

Meng yaom glaong ilamu hadah krah, thun 2013 “Harei pataom chat pui” di urang Pà Thẻn hu pok brei angan lac Inem krung ilamu phi vật thể pakat negar, ini jeng lac kadha praong piah dui pachreih tuai du lịch daok dalam saong langiu taneh ia mai tal xã Hồng Quang jeng yau huyện Lâm Bình, tỉnh Tuyên Quang./.

(Urang lang: Mousa Phương – 23/05)

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân