Mintri pato magru hu ba tabiak panuac parabha mbang pacacah tamat THPT 2020 jeng 2 mbang piah khik ginup bruk pacang caga jit

Page ini (3/8), Mentri Y tế brei thau hu veik 1 urang Covid-19 birau. Urang ruak lac kumei, umo 60 thun, daok di huyện Bình Sơn, tỉnh Quảng Ngãi, bhian tame rivang gauk gar urang di Sang iek ruak Đà Nẵng. Yau nan, kuhria tal harei ini, Việt Nam hu abih tih 621 urang ruak Covid-19, dalam nan hu 6 urang metai.

Anak bruk njom mbak ruak sarau kadhau, di mbang nyaom baai tapak pakat negar ka bruk pacang caga jit COVID-19 harei kabroi, Thủ tướng rajaei Nguyễn Xuân Phúc ieu kakei dom mintri, dom gah, dom tỉnh ban jhui suh sah rilo, kham marat padam jit, pacang labik brei daok paatah di gauk. Mbang ni, jit di pakat bahrau, kayua yau nan ye, yaok bhap bini njauk lac sa urang lin, yaok 1 baoh sang, puk palai, khu phố lac sa daning pacang caga jit. Thủ tướng ieu kakei langyah tui hukum dom urang tame negar saong daok dalam negar suan hukum, abih di nyu nan lac dom jalan ba urang negar langiu tame Việt Nam.

Harei ini, tỉnh Thừa Thiên-Huế brei pa-atah di gauk ngan saong dom labik ngak mbang. Cambaih laic lac dom hotel, pasak oh brei peih bruk mbang menyum, payak lakhah pataom ralo manuac. Kapal kik di dom labik mbang menyum saong labik pasram rup pabhap brei daok atah di gauk takik di abih 2 met saong yaok kapal caik pandap mbang oh tapa 4 urang. Jeng dalam harei ini, tỉnh Đak Lak brei atah gauk ngan saong abih ban Buôn Ma Thuột, pacang cakak dom labik piah padam jit. Đắk Lắk hu 3 urang ruak Covid-19.

Mintri pato magru hu ba tabiak panuac parabha mbang pacacah tamat THPT 2020 jeng 2 mbang piah khik ginup bruk pacang caga jit. Mbang 1 lac dom tỉnh, ban oh daok dalam bhum mbuan njom glaong, tui njauk jalan ba tabiak. Mbang dua lac dom tinh, ban daok dalam bhum njom glaong yau ye Đà Nẵng, Quảng Nam, meda peih bruk pacacah hadei. Dom anek saih lac F1 và F2 ka oh pacacah mbang 1 hu ye pacacah gam mbang haong dom tỉnh mbuan njom glaong.

Jaik 200 anek saih sang bac THPT Ngô Quyền di huyện kaoh pulao Phú Qúy, tỉnh Bình Thuận tame tal bhum taneh piah caga tame pakacah THPT 2020. Ini lac huyện tok taeng dalam negar brei ba nek saih meng kaoh pulao tagok bhum taneh piah pakacah. Sang bac brei 1 urang y tế saong 5 gru pato nao gam piah daong ka anek saih. Dom anek saih di sang bac THPT chuyên Trần Hưng Đạo, ban Phan Thiết saong daok veik dalam ký xá sang bac. Tỉnh  Bình Thuận brei peih ngak sumu gauak dom jalan pacang caga jit Covid -19 di taong abih dom labik pakacah.

Trung Quốc hu ba tabiak tanut kakei sambo hijao ka rabuk Hagupit, tui kuhria tuh tame tỉnh Chiết Giang saong Phúc Kiến di melam ni (3/8). Kapul daong manuac ieu kakei bhap bini daok tapen tasik njauk panduan nao labik karei dahlau maong 8 masup page ni. Hagupit lac mbang rabuk ka 4 taong tame Trung Quốc dalam thun ni ngan haong hangin praong tagok tal 83 km/h. Ia di dom kraong saong danao di rilo tỉnh, ban Trung Quốc daok tagok samar, ngak kan kandah tal bruk pasang iek rabuk. Đài Loan (Trung Quốc) jeng ba tabiak panuac kakei di tasik yau haong rabuk Hagupit.

Tổng thống Philippines Ro-dri- go Duterte hu brei tapa kadung jien negar thun 2021 ngan saong phun jien abih tih 91 tỷ 65 USD, pataom tame ka bruk salih birau gah y tế saong khik brei ginup pandap mbang. Kadung jien 2021 glaong jang 9,9% dut saong kadung jien thun 2020, meda khan brei Quốc hội dalam 30 harei. Urak ini, Philippines daok kan kandah saong dom mbang urang ruak Covid-19 tagok yaok harei yaom lac hu brei pacang meng kreh bilan 3. Philippines hu 98 ribau 232 mbang urang ruak, dalam nan hu 2 birau 039 urang metai.

Kapul nhập cư dunya(IOM) brei thau, labaih 200 urang tame negar suan hukum bahrau hu daong sraong di lingiu tasik gah pai di Libya dalam 24 maong tapa. Bruk daong duah urang lahik jeng daok peih tabiak. Meng akaok thun 2020 tal urak ni, labaih 6.500 urang tame negar suan hukum hu sraong daong di bhum tasik Libya. Bruk sarau kadhau rahtabiak samar di negar ni meng thun 2011 tuk urang dang akaok negar dahlau dieh Muammar Gaddafi njauk cuh metai, bhap bini klak negar nao duah labik daok bahrau./.

Urang lang: Thu Thảo – Ái Nghiêm – 03/08 10:34:48

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân