Peih tabiak mbang nyaom ka 11 - HĐND tỉnh Bình Thuận (mbang X) 

Pahadar 100 thun harei manek aruah akaok negar dahlau dieh ong Lê Đức Anh, dah page ni (1/12/2020) Thủ tướng Nguyễn Xuân Phúc ba akaok kapul urang dang akaok Đảng, kanja nao pok bingu, cuh gilau di Thừa Thiên Huế. Aruah Akaok negar dahlau dieh ong Lê Đức Anh ndih tapui di harei 1-2-1920 di huyện Phú Vang, tỉnh Thừa Thiên Huế. Ngan saong 99 thun umur, labaih 80 thun umur Đảng, Đại tướng Lê Đức Anh ba abih rai di drei ka bruk cách mạng hadah hadai di Đảng saong bhap bini.

Mesup ni (1/12), mbang nyaom ka 11 - HĐND tỉnh Bình Thuận (mbang X) hu peih tabiak. Thun ni, dalam tuk jit prong Covid-19 rah tabiak srau kadau, cuang kandah tal yaok janih dalam rai duik, bruk ngak mbang ngak huak, urang jakar tỉnh song dom pakat, dom gah samar tacei pato khang dom bruk ngak, jalan ngak samu gauk, gam pacang caga jit, gam patagok kinh tế-xã hội. Akaok HĐND tỉnh Nguyễn Mạnh Hùng ndom lac: Dom bruk hu pasang iek ginum biai song batabiak ngak di mbang nyaom ni hu makna biak prong, peih tabiak jalan ngak brei jayah dom bruk ba tabiak di Nyaom roya Đảng bộ tỉnh mbang ka 14 song jalan patagok kinh tế - xã hội 5 thun tukvak 2021 – 2025 di tỉnh.

Bier harei ini (1/12), taong abih 129 sang iek ruak di dom mintri, dom gah, công lập saong tư nhân meda nyaom baai online ndem ka bruk pacang caga jit hadei di tuk urang njom Covid-19 di ban raya HCM bahrau duah mboh. Tui Sở Y tế TP, mbang ginum baai piah paglaong bruk pacang caga jit Covid-19 dalam dom labik iek ruak hadei di tuk urang njom virus corona meng urang daok karei. Tal urak ni, ban raya HCM hu mek mẫu dut iek, brei daok karei 235 urang, pacang cakak dom labik bo 2 urang bhian nao tal.

Di Đồng Nai, mesup ni, gah y tế tỉnh peih bruk dut iek drah 2 urang F1 pagam tal urang ruak 1347 song 296 urang Việt meng Prang mai dalam harei 30/11 piah pacang caga Covid-19. Tui pasak pasang iek song pacang caga ruak kik Đồng Nai, pasak hu dut iek labaih 296 urang bahrau mai meng negar langui.

Harei 1/12, hu takik di nyu 5 mbang radaih apui nduac tapa ban Nha Trang njauk padeih nduac kayua ia dauk jalan pasei. Tổng công ty jalan pasei Việt Nam brei thau njauk brei padeih nduac 2 sruh radaih apui SE22 nduac meng mblang radaih Sài Gòn saong SE21 nduac meng mblang radaih apui Đà Nẵng. gah jalan pasei jeng brei padeih nduac radaih pui SE3, SE1 di mblang radaih pui Nha Trang; radaih pui SE21 di mblang radaih pui Đà Nẵng… gam tui di nan brei dom sruh radaih pui bahrau piah pajeng tuai nao tapa bhum ia dauk. 906 tuai di dom sruh radaih pui njauk padeih di mblang radaih pui Nha Trang saong Cây Cầy daok hu pajeng meng radaih ôtô tapa labik njauk ia dauk piah nao viek.

Jit Covid-19 daok ngak ka rilo negar dok dang anak bruk njom mbak khang mbang ka 3. Châu Âu dok lac pasak di jit ruak di dunya tuk hu labaih 18,1 triệu urang njom Covid-19. Karja Italia oh brei peih pasa Giáng sinh song batabiak adat giới nghiêm dalam negar. Dom nhà thờ dok peih pambah mbang, min adat giới nghiêm 22tuk dalam negar hu batabiak pandar. Pháp kreih pambah mbang tong abih labik padeih padei trượt tuyết hu angan je dalam bilan lễ hội, yaom lac khat lihik trak ka gah kinh tế. Thủ tướng Tây Ban Nha Pedro Sanchez jeng daok sahneng tal bruk uan raok Giáng sinh tok brei pataom gauk 6 urang.

Mỹ hu manuac njom Covid-19 dalam bilan 11 glaong jang abih dom negar hu urang njom jit ruak dalam thun, ngan haong 4 triệu urang njom dalam bilan 11, glaong jang abih tih dom urang njaom dalam di dom negar karei di dunya, oh kuhria Ấn Độ saong Brazil. Dom chuyên gia y tế brei thau dahlau lac negar Mỹ meda daok hu dom urang njom glaong di abih dalam dom bilan puac thun. Dom sang iek ruak di dom tinh, bal daok ngak bruk abih prein di drei saong daok mbuan laik tame bruk quá tải tuk menuac ruak caong tame sang iek ruak daok tagok glaong.

Rajaei Angola bahrau njauk hatai brei peih pabah mbang negar veik ka yaok pluh ribau drei lamen meng Botswana nao veik palei negar piah langyah bruk lamen di negar gah merong châu Phi ni yam tapa bruk pasang ike di dom gah chức năng. Meng 130.000 drei lamen glai, Botswana lac labik dok di meteh tapon lamen di châu Phi song lac negar hu rilo lamen abih di dunya. Tui kapul khik caga dunya - lamen oh hu biên giới, bruk Angola peih pabah mbang negar veik hu daong palagaih ka tapon tapon lamen nao mai dalam glai, saong daok hu dong ka Botswana patrun patakik kan kandah meng bruk hu biak rilo janih athur ni./.

Urang lang: Thu Thảo – Hani Pha – 01/12 15:32:36

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân