Pahadar 90 thun harei padang Mặt trận bangsa Yasa Việt Nam (18/11/1930-18/11/2020), di Hà Nội

Thủ tướng Rajaei brei buh jien daong dahlau ka dom tỉnh bhum kreh negar samar pasiam dom khat lahik kayua hajan ia sua. Tui nan, brei daong dahlau 80 tỷ đồng meng jien caga di kadung jien karja pakat negar thun 2020 brei ka 3 tỉnh lac: Quảng Nam, Thừa Thiên-Huế, yaok tỉnh 20 tỷ đồng saong Quảng Trị 40 tỷ đồng. Thủ tướng kakei UBND 3 tỉnh nan oh caik brei rah tabiak bruk pagam pambak tame sarak, cai pandar suan jalan, tham nhũng, palai pajoa. Abih mbang hajan ia sua, UBND dom tỉnh: Quảng Nam, Thừa Thiên-Huế, Quảng Trị brei pasang iek, taong yaom, yaok pataom dom khat lahik kayua bala meng langik tasik, payua tagok mBan tacei jalan pakat negar ka pacang caga bala meng langik tasik, pok tagok Thủ tướng Rajaei pasang iek, tabiak yaom daong meng kadung jien karja pakat negar brei ka kadung jien karja yaok tỉnh ban.

Pahadar 90 thun harei padang Mặt trận bangsa Yasa Việt Nam (18/11/1930-18/11/2020), di Hà Nội, Ủy ban Trung ương MT negar Việt Nam taom gaok 90 urang hu angan je dalam dom bruk jak ba, dom bruk pacacah gauk anit ranam taneh ia, dak padang raidiuk ilamo di puk palei. Nan jeng lac dom urang hu angan je dalam dom gah: daong gauk cak rok patagok bruk ngak mbang, patruh eik patrun kathaot, peih bruk an sinh xã hội, khik siam mekre puk palei; gam haong gauk gar dalam sang ngak siam bruk rik prien, rik jien padai, taneh riya piah ngak jalan padang ngak palei pala bahrau, đô thị văn minh; jak ba khik ramik haci hacih alam môi trường, dak padang raidiuk ilamo. 90 urang lambaok di bol bhap rahra hu pok mayaom mbang hu lambaok di 54 bangsa di Việt Nam. 

Mintri ngak nong saong patagok palei pala pambuak haong UB bhap bini tỉnh An Giang bahrau peih nyaom biai taong yaom “danak dak yaok xã 1 janih pandap (OCOP) vaktu 2018-2020 bhum gah Meraong”. Kuhria tal bilan 10/2020, hu 11 tỉnh, ban di gah Meraong peih bruk taong yaom, dak hạng pandap OCOP. Dalam nan bhum taneran kraong CL hu dom pandap OCOP dang ka 3 dalam negar ngan saong 370 janih pandap. Bruk njauk menyai nan lac dom tỉnh dalam bhum taneran kraong CL saong bhum Đông Nam bộ hu jalan ngak gheih, patagok kein lagaih di dom janih pandap dalam bhum yau ye baoh kayau, padai brah, du lịch sinh thái piah pilih ruah, pataom tame patagok dom janih pandap OCOP biak karei di yaok puk palei, padang talei pambuak bruk khang kajap. 

Pasak kuhria mboh dahlau bruk langik tasik pakat negar hu khan brei thau ka bruk langik tasik suai lavik. Tui nan, meng urak ni tal puac thun 2020, jeng meda daok hu meng 1-2 mbang ribuk saong áp thấp nhiệt đới angaok Biển Đông saong mbuan tuh tapak tame mbaok haluh negar drei, rilo abih lac di gah krieh saong gah maraong negar drei. Kayua yau nan ye, njauk caga hangin khang angaok tasik kayua njauk kan kandah di langik laar di dom bilan praong di bilan laar thun 2020-2021; caga pacang dom mbang hajan mbiah, hajan praong di dom tỉnh bhum kreih negar meng mateh bilan daok veik di bilan 11 tal bilan 12/2020.

Mesup ini (17/11), ia ndik di Cần Thơ tagok tal tabung glaong di abih dalam thun, ngak brei dauk rilo jalan tapen kraong Hậu haong kraong Cần Thơ. Ia tagok glaong ngak brei dauk 1 binah tapen kraong bến Ninh Kiều, nduac tame rilo sang bhap bini haong mblang bein di rilo jabat, labik ngak bruk di karja. Ia meng kraong Hậu jeng nduac tame ngak brei dauk rilo jalan dalam ban sit di tuk mesup haong biar harei sup. Urak ini ia di gah ala bhum taneran kraong CL daok tagok samar kayua hu triều cường. Tui dom urang hu ilamu gah langik tasik, ini lac mbang triều cường praong dalam thun, bhap bini njauk caga pacang ia dauk di dom bhum taneh biar saong dom labik daok tapen kraong.

Tui blah yaok pataom Worldometers, kuhria tal maong 6 dah page harei 17/11, 217 negar saong bhum taneh hu labaih 55 triệu 3 rituh ribau urang njom Covid-19, labaih 1 triệu 330 ribau urang metai saong labaih 38 triệu urang thit ruak. Mỹ lac negar njauk Covid-19 biak trak damak, ngan haong labaih 11,5 triệu urang ruak saong 252.500 urang metai. Dom negar di châu Âu jeng daok having akaok haong mbang jit bahrau tamuh veik, abih di nyu nan lac Prang haong Italia jeng hu labaih 500 urang metai dalam 24 maong. Pasak jit di châu Á jeng lac Ấn Độ. Dom urang njom Covid-19 di negar ni tagok tal 8,8 triệu, dom urang metai lac labaih 130.550 urang.

Hãng thông tấn negar Triều Tiên (KCNA) brei thau, dalam mbang nyaom di Mintri Chính trị đảng Lao động, Chủ tịch Kim Jong Un hu panuac tacei brei pacang Covid-19 ka nyu khang jang.Ong Kim Jong Un ndom tal bruk njauk khik caga di tanut biak glaong, padang 1 daning pacang cakak catang saong patagok rilo jang bruk pacang jit ruak. Tui gah Y tế dunya (WHO), kuhria tal harei 5/11, Triều Tiên ngak hu labaih 12.000 mbang bruk dut iek Covid-19 min mbiah tal urak ini oh ka mboh urang ruak halei njom. Taneh ia ini brei thau, labaih 6.000 urang mboh yau njom ruak, dalam nan hu 8 urang negar lingiu saong 174 urang njauk brei daok karei dalam adit puac abih di bilan 10.

Tổng thống Nga Putin hu brei tapa bruk padang ngak pasak hậu cần di hải quân Nga daok di Sudan taphia Biển Đỏ, krieh jalan tasik pambuak châu Âu saong châu Á. Labik di Sudan brei ka hải quân Nga patok saong ngak pasiam tal 4 chiến hạm, dalam nan hu gam dom gilai pandar hệ thống jhul năng lượng hạt nhân. Labik nan daok hu khik saong pabak pandap mbang menyum ka dom bruk suai harei di hải quân Nga, labaih 300 urang lin hu daok di pak ni. Sanya di dua gah Nga saong Sudan tui kuhria dui atah 25 thun. Sanya ni meda hu dui atah jang 10 thun mayah mboh khin./.

Urang lang: Thu Thảo – M. Phương – 17/11 15:27:03

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân