Oh hu radaih saong menuac sia nao mai bak jalan, dalam ngin, pandiak biak khang, dalam riyak tasik biak praong, langik jeng daok hijao mekre saong dom anek menuac daok pak ini jeng daok hu hatuang hatian chreih chrai anit ranam ka raidiuk. Hu sa palei joa kandang, bak hatai anit ranam gauk saong bak pren diukrai yau nan angaok pulao Trường Sa.

Meng pabah lamnge Cam Ranh, nao tapa jaik 300 hải lý, kol dahlak meng tal ban sit Trường Sa, tuk thun bahrau daok mai jaik tal. Di kreh pandiak khang, di sa binah di pulao gheih mekre ini, lac sa palei yau dom palei karei di ngaok taneh ia hu thaot binguk yau akhar haroh S.

Sa palei sron mbon ngan saong dom baoh sang biak siam mekre. Di sa palei bo bruk ngak mbang kinh tế di yaok baoh sang oh glaong biar jang gauk hadom, daok dalam dom baoh sang oh karei gauk hadom. Menuac sia dalam palei gam haong dom urang lin pak ini jeng daok harei harei tabiak tasik saong khik pulao. Harei tất niên, urang ba gauk papaok bánh chưng, ba gauk pok sap daoh takơ, lai tame sap riyak, sap ngin. Sa-ai Lâm Ngọc Huynh,  sa rahra daok di pulao Trường Sa khan lac: Meng 25 tal 30 Tết, yaok sang mbang tất niên piah dom sang karei mai taom gauk. Sang ini ngak dahlau 1 harei, bloh tal sang karei piah abih gauk hu taom gaok gauk rilo jang. Var lisei tất niên, sang halei jeng hu sa salao likei pok da-a muk kei. Drei jeng ngak hasit bánh chưng, pei nung saong mứt raya, mứt la-u pok tagok bàn thờ ka harei Tết bui sambai jang.

Yaok harei, dom urang likei jeng daok tabiak tasik taong cap ikan, hadang, daok dom urang kumei ye daok di sang sak halam, pala njam, raong pabui.  Tuk biar harei l;aik trun, urang ndik radaih juak pajeng anek naih nao angaok jalan bak halui kayau piah ba drei tame ngin tasik mbak carak. Urang daok tapen gauk yau sa baoh sang, anit ranam gauk, jum pataom gauk. Raidiuk di labik ini harei bloh harei tapa nao yau nan, oh srau kadau, oh jar var…

Dom anek naih praong tagok dalam chreih chrai, bui sambai saong khang kadang. Kol nyu harei harei hu nao bac, hu me-in sambai, hu pabak dom ilamu piah palagiah haong lingik tasik kan kandah di labik akaok riyak, jhung ngin. Adei Nguyễn Trần An Thuyên, anek saih tal bac 4, sang bac tiểu học ban sit Trường Sa lac: Anek bac tal 4 haong dom adei. Dom bài tập kan ngak ye anek tacei pato dom adei. Anek takre bac môn Tiếng Việt. Praong tagok anek khin ngak bác sỹ, kayua anek khin pasiam ruak ka menuac sia.

 

       Tal bac di pulao Trường Sa biak karei. Meng dom anek naih mầm non 3 thun tal anek saih tal bac 4, tal bac 5 jeng bac sa tal bac haong gauk. Bruk pato bac di sa tal bac yau nan oh lac mbuan ka dom gru pato. Ini lac camereip di abih gru Bành Hữu Tình halan hatian mai pato di pulao Trường Sa. Ngan saong gru, bruk hu pato di labik akaok riyak, jhung ngin gam lac vinh dự, gam lac sa bruk ngak ginreih. Thau cambaih bruk ngak praong di drei, urang gru ranaih umo thun ini daok ba dom hagait siam mekre di abih ka bruk pabam pajaih di pulao Trường Sa: Meng trách nhiệm saong hatung hatian di sa gru pato, dahlak kham merat ngak bruk abih drei. Dahlak maong dom kamuan yau anek, yau adei di drei piah tacei pato dom kamuan dak harei dak naih joi jang. Meyah dom kamuan tame baoh taneh bac ye oh lah hagait dom anek saih pak nan.

.

Dom thun tapa, meng hu bruk sangka di Đảng saong Karja, nan ye raidiuk di rahra ban sit Trường Sa oh padeih salih bahrau. Jamriak halang ia tasik hu buh jien blei nan ye bruk kurang ia taba urak ini oh daok lac bruk duh hatai di dom menuac sia bhum pulao. Điện jeng hu mai tal yaok baoh sang meng hu năng lượng ngin, năng lượng ia harei ngak ka bhum palei ini hu hadah tagok. Taphia di nan, piah paglaong bruk iek ruak ka bhap bini, ka urang jakar, urang lin angaok pulao, dom thun tapa, ban sit Trường Sa hu pabak brei rilo thiết bị y tế  bahrau oh lah hagait di baoh taneh. Oh lac pabak bruk iek ruak ka rahra, ka urang jakar saong urang lin nagaok pulao, labik ini daok jeng labik pambak tame di dom urang nao taong cap ikan di tasik. Sa-ai Võ Thị Song daok di ban sit Trường Sa brei thau: 'Pak ini, urang lin saong bhap bini kết nghĩa haong gauk. Bộ đội daong ka kol dahlak biak rilo. Meyah ruak kik, bệnh xá abih hatai iek glang. Dom harei lễ, tết ye dom sa-ai gah kết nghĩa da-a drei tagok me-in. Meyah sang halei hu ngak hagait jeng da-a gah kết nghĩa mai. Bak hatai anit ranam gauk.

 

       Tasik lingiu daih meda oh joa kandang min daok hu dom urang lin harei melam medeih piah khik caga. Dom sa-ai jeng daok dang khik ka palei negar sron mbon. Labik nan, harei harei jeng hu sap chuông baha yava atah, sap bac bài ê a, sap menuk aknjok di jalan pandiak. Pulao Trường Sa harei ini hu me-om bak sambo hijao meng dom dhar phun bàng vuông, phun tra, phun phong ba, bão táp. Lingiu di bruk daong ka menuac sia pak ini pacang ngin, pacang ribuk, nyu daok yau brei mboh hatai caong yam tagok khang kadang anak dom kan kandah, rambah rambup. Piah hu mboh di anak meta dom kadha siam mekre, bình dị min bak pren khang di labik akaok ngin, atah di baoh taneh yaok rituh hải lý, ngan saong kol dahlak, Trường Sa bika jaik, kayua nan lac sa binah ralow darah di palei negar anit ranam./.

 

HỆ PAPAR SAP BANGSA VOV4 BHUM BAN RAYA HCM

Labik daok: 75 Trần Nhân Tôn, Phường 9, Quận 5, TP.Hồ Chí Minh
Yam ndok : Trần Văn Thao
Phaok yam ndok: Cao Thị Thoa, Trần Xuân Thân