Labaih 15 thun papar sap Cham angaok riyak sap ndom VN 

Piah pabak bruk khan brei thau ka labaih 180 rabau urang Cam daok di dom  tỉnh, ban bhum Nam Trung bộ saong Nam Bộ, dalam nan rilo meng daok di dom tỉnh lac: Ninh Thuận, Bình Thuận saong An Giang, ngak tui tacei pato di Urang pan akaok Rayo sap ndom VN, meng thun 2005, Jabat lambaok Rayo sap ndom VN daok di ban raya HCM hu peih Danak dak papar sap Cam atah 30 minit yaok mbang, saong yaok harei hu papar sap 4 mbang angaok riyak AM - 657 Khz. Mesup meng 6 tuk meteh tal 7 tuk, jala pandak meng 10 tuk meteh tal 11 tuk, biar harei meng 14 tuk meteh tal 15 tuk saong melam meng 19 tuk tal 19 tuk meteh.

Tapa 15 thun, Danak dak oh padeih salih bahrau ngan saong dom asal kadha biak gheih, kak kajap haong ilamu, adat cambat, tanarakun saong raidiuk di mikva . Di thun camereip, yaok harei tok hu sa blah khau tin saong yaok adit tok hu 4 kadha, tal harei ini, danak dak hu 2 blah khau tin yaok harei, meng khau tin dalam taneh ia tal khau tin dunya saong hu dom kadha bahrau, pabak hatai caong di mikva, yau ye: Kadha “Urang iek ruak”, Kadha “Urang ngak hamu caong thau”, Kadha “Hukum negar saong Raidiuk”, Kadha “Dom bangsa Việt Nam”, Kadha “Ranam sap bangsa Cam”, Kadha  “Menuac gheih bruk siam”… Yaok thun, danak dak hu padang ngak saong papar sap 365 danak dak. Abih di nyu nan lac, Danak dak harei adit hu sahneng duah biak rilo, hu padang ngak tani tanat jang, suai lavik jang, hu yaih khan dom bruk ilamu, daoh takơ duh ka mikva urang Cam. Bruk ba danak dak hu 2 urang papar sap yau ndom biai nao mai nan ye nyu ngak ka danak dak biak chreih chrai, dui pachreih urang pang rilo jang.

Lingiu di bruk papar sap angaok riyak negar, thun 2013, Danak dak papar sap Cam daok hu ba tagok blah website VOV4.VOV.VN gam haong 11 danak dak papar sap dom bangsa adei sa-ai karei karei. Blah web Cam gam gam hu dom khau tin bahrau ka bruk chính trị, kinh tế, ilamu, xã hội pambuak pagam tal urang Cam saong dom bangsa takik di Việt Nam; dom sarak di Đảng saong Karja ngan saong bhum bangsa; dom yaom glaong ilamu di 54 bangsa adei sa-ai.

Dom urang ngak Danak dak papar sap Cam lac dom urang vak, urang lang sap, urang papar sap haong 1 urang ramik sap saong pang iek suan - njauk. Meng tukvak papar sap di danak dak yaok harei 4 mbang, yaok mbang 30 minit, yaok urang njauk ngak  “ 6 dalam 1” bruk lac: vak, biên tập, lang sap, puac danak dak, ramik panuac saong pang iek, gam ba tagok blah website Chăm. Meda lac, meyah oh anit bruk, oh ranam sap ndom di bhap bini Cam ye kan kak kajap hu haong danak dalam luac 15 thun tapa yau dom urang daok ngak di danak dak ini. Sa-ai MuSa Phương, urang ramik sap saong pang iek suan njauk di danak dak khan lac:

“ Meng harei yam takai tame ngak bruk di rayo tal urak ni, hulin biak sahneng kuhria …sap ndom di urang  Chăm ".

Hu bruk sangka tacei pato di dom pakat urang pan akaok Rayo sap ndom VN , gam haong hatai anit bruk ngak, kham merat yam tapa dom kan kandah, dom urang ngak danak dak hu ngak brei danak dak sap Cam dak harei dak salih bahrau, cakrok, pabak dak harei dak glaong bruk khan brei thau di bhap bini urang Cam daok grauk labik dalam taneh ia. Abih di nyu lac, danak dak daok hu bruk abih drei pambuak bruk di dom  urang daok di dom tỉnh, ban. Sa-ai Bá Minh Triều, sa dalam dom urang pambuak bruk haong Rayo sap ndom VN daok di tỉnh Ninh Thuận ndom lac:

“Tapa  15 thun ye  Meng nan thun pambuak song danak dak , Hulin hu rayo sap nsdom biak sangka, hu bac megru di dom adei saai đồng nghiệp di rayo sap ndom VN ".

Rilo thun tapa, yaok mbang mai dom palei Cam ngak bruk, dom urang ngak danak dak jeng mboh bruk rap ar saong hatai anit ranam di mikva palei nan. Nan lac dom urang pang rayo biak takre danak dak, nan ye bo urang mboh anit ranam dom menuac ngak danak dak papar sap Cam.

Gru Phú Năng Lành, umo 58 thun, daok pato di sang bac THCS Nguyễn Bỉnh Khiêm, huyện Thuận Nam, tỉnh Ninh Thuận maong danak dak papar sap Cam lac jalan piah thau dom bruk, dom kadha dalam taneh ia, lingiu dunya, jeng yau duah thau ilamu dom bangsa adei sa-ai. Lac urang trak tian haong ilamu bangsa Cam, dalam labaih 10 thun tapa, gru lac urang pang rayo kak kajap haong danak dak papar sap Cam di rayo sap ndom VN. Gru pang danak dak 2 mbang di tukvak 14tuk meteh saong 19 tuk melam yaok harei. Danak dak papar sap Cam lac oh kurang hu ngan saong gru haong dom urang dalam sang di gru:

"Dalam bruk ngak jang yau dalam rai duik, hulin mboh rayo sap ndom VN lac brei hu Rayo pato mik va bruk ngak mbang ngak huak … ."

    Caong khin di gru Phú Năng Lành jeng lac caong khin di rilo mikva urang Cam daok pak ini. Kayua yau nan ye, anak tal, Danak dak papar sap Cam daok ngak brei paglaong chất lượng jang piah pabak bruk khan brei thau di mikva, rik daong tame bruk khik ramik sap ndom, panuac puac, akhar vak, haroh cih saong ilamu di bangsa Cam./.

Urang lang : Mousaphuong -1/1