Baoh sang bui sambai An Vũ
Baoh sang bui sambai An Vũ hu ngak pasiam veik di thun 2013, meng hatai caong di nhạc sĩ Vũ Thành An saong ong taduan hu bruk daong di rilo urang ngak pahla daok dalam saong langiu taneh ia. Baoh sang bui sambai An Vũ taduan iek glang, raong pato dom uranaih gaok kan kandah, uranaih njauk amaik ame klaak, uraniah oh hu amaik ame saong urang taha daok sa drei. Di baoh sang ini, urak ini daok iek glang saong raong pato 60 uraniah umo meng 3-19 thun, 1 uraniah 13 bilan haong 1 urang taha umo 82 thun. Urak ini baoh sang hu 4 sơ khik iek. Vil val sang lac mblang bein hijao, hacih, hu bein pala kruac aik, dom janih njam hijao. Labik ndih daok, labik mbang huak saong labik bac da-a di dom adei biak tani tanat, haci hacih. Abih menuac daok tapen gauk yau adei sa-ai di sa baoh sang. Sơ Huỳnh Thị Ngoan hu mbaok meng dom harei camereip bahrau padang tabiak. Sơ Ngoan khan lac: Dom sơ tuk halei jeng maong iek dom uraniah pak ini yau anek di drei, anit ranam saong iek glang, daong ka dom adei oh daok sahneng lac drei metui medar, salih tame nan lac bruk anit ranam gauk, jum pataom gauk di adei sa-ai dalam sang.
Adei Vũ Thanh Thủy (12 thun) khan lac: “Adei tame daok pak ini hu 6 thun. Sang adei biak kan kandah, ame lahik, amaik nao ngak raong 3 adei sa-ai min bruk ngak oh tani tanat. Amaik ba adei tame ini piah adei hu mbang bac siam jang”.
Daok adei Y Hinh (14 thun) metui amaik ame tuk bahrau 2 thun, blaoh hu ba tame ini. Y Hinh brei thau: “Daok pak ini, kol adei hu bac rilo kadha, meng bruk mbang menyum tal bruk ndom puac haong ayut sahabat, haong urang praong thun. Dom sơ tuk halei jeng pato kol adei diukrai siam mekre, tari taring piah ngak hu dom caong khin di drei”.
Yaom lac yaok adei hu sa thar vak oh patuah jamo karei di gauk min thau anit ranam gauk, jum pataom gauk tuk mai daok haong gauk dalam sa baoh sang. Hu dom adei tuk praong jeng menuac jeng urang, hu bruk hit ngak mbang min jeng daok mai veik pak ini piah daong dom sơ iek glang ka dom adei karei.
Sơ Mai Luyến brei thau: lingiu tuk bac, dom adei daok hu dom sơ pato paik capi, megru daoh saong bac sap Engrish. Yaok adit, dom sơ hu caik sa harei puac adit ndom biai haong dom adei ka jalan diukrai siam mekre di anek menuac. Dom adei daok hu nao daoh tamia pamere bhap bini... Yaom lac nao halei, ngak bruk hagait, dom adei tuk halei jeng hu bui sambai, hu haniem phul dalam baoh sang bui sambai ini.. Hu dom adei hadei di sa tukvak daok dalam baoh sang ini, hu amaik ame mai taduan mek veik, bruk palao gauk di 1 urang dalam sang ini thei jeng haiy, min taong abih gauk jeng uan tabuan kayua dom adei hu mai veik haong amaik ame di drei.
Yaok uraniah ndih tapui tabiak jeng hu quyền hu iek glang, hu anit ranam, hu bac da-a... min jeng hu dom adei oh patuah jamo najuk dom khat lahik. Meng hu dom gavang tangin anit ranam, dom baoh hatai peih praong, raidiuk dom adei hu trun meneing dom pandik harao, hu pabak meneing dom bui sambai./.
Urang lang: M.Phương - 31/5/2020
Viết bình luận