Kayua jit ruak COVID-19 tamuh tabiak, salih ka bruk duh urang maong iek nao tal rạp maong iek tapak, Sang daoh Tây Đô hu ba danak dak daoh takơ  "Dạ cổ Cầm Thi" tagok tapak angaok Youtube, Zalo, Facebook di Sang daok tuk kreh bilan 11 saong caik veik ka rahra maong iek dalam tukvak atah brei padeih kayua jit ruak.

Lingiu Sang daoh Tây Đô, Pasak Ilamu ban Cần Thơ jeng hu peih bruk salih số tapa dom kadha, dom danak dak daoh tamia ba tagok angaok blah web. Jaik di ini, Pasak Ilamu ban hu padang tagok saong parang me-in danak dak daoh takơ dhar phor dom kapul nyaom, menuac urang di labik pacang caga jit Covid-19 ngan haong kadha “Cần Thơ – Sap dane meng baoh hatai”.

Ban Cần Thơ jeng hu padang dom gilang tapuk, miuyim ảo tapa web piah ka dom adei anek saih duah thau ka dunya, ka gah langiu. Dalam rilo bilan peih bruk pacang caga jit Covid-19, rilo tal bac online ka ilamu diukrai, duah thau ilamu hu peih tabiak rilo. Sa-ai Nguyễn Thanh Tùng, dahlau daih ngak Bí thư Đoàn Sang bac Đại học Cần Thơ – urang peih dom tal pato pakai ilamu ba danak dak, ndom puac anak menuac sia tapa blah web: Tal pato bac di dahlak oh bak menuac bac piah hu ndom biai nao mai, pambuak bruk siam haong urang bac, piah ka dom urang bac pabak hu dom asal kadha pambuak tal bruk bac. Gam haong nan, dom urang bac meda taom gaok, ndom biai nao mai atau bac megru ilamu di gauk, abih di nyu lac dalikan pambuak pagam dom urang bac haong gauk.

Sở Ilamu, Thể thao saong Du lịch TP Cần Thơ jeng daok khik ramik dom blah khau tin di ban, bhian brei thau dom bruk ngak saong padang thaot binguk 3D dom labik du lịch piah brei ka tuai mboh cambaih jang tuk duah thau. Amuk Nguyễn Thị Hồng Nhung, Phaok Yam ndok Cty du lịch Hồng Hiếu brei thau: Dalam tuk padeih kayua jit Covid-19 saong tal tuk peih ngak veik, Cty tuk halei jeng hu taom gaok, ndom biai nao mai haong tuai tapa mạng xã hội, urang ngak di Cty hu pato pasram dom ilamu ngak clip, thaot binguk yaih khan du lịch piah dui pachreih tuai: “Jaik abih lac kol dahlak taduan tuai tapa jalan hotline di Cty. Luac dalam dom harei jit ruak, kol dahlak tuk halei jeng ba tame dom thaot binguk bahrau, pabak dom khau tin nao jaik haong tuai jang. Tuk peih veik bruk ngak, peih veik labik pah brei tuai daok ye tuai duah tapa Facebook di Cty saong hotline piah hu tacei jalan brei thau.”

Jit ruak Covid-19 nyu ngak kan kandah biak trak tal gah ilamu - du lịch TP Cần Thơ jeng yau dalam negar, min jeng lac tuk piah ka gah du lịch jhul samar bruk chuyển đổi số. Bruk ba drei tame haong công nghệ 4.0 jeng hu daong ka dom kapul nyaom, doanh nghiệp haong bruk khan brei thau hu salih bahrau biak khang piah daok veik saong cakrok patagok tui rilo jalan ngak jang./.

Urang lang: M.Phuong -27/11/2021