Daok di jalan palei Bình Tiến, xã Xuân Phú, bein dâu  Ba Hương danei angan grauk labik haong phun dâu bak baoh, kanjik katam meng gha tagok tal jung phun. Yaok thun, tal bilan paik baoh dâu  tathak  meng bilan 4 tak bilan 5, tuai ba gauk tuh mai piah rivang, thoak binguk hoang phun dâu.

Sa-ai Lê Quang Việt – po bein dâu Ba Hương khan lac, bein ini dahlau diah pala rilo janih njam patam kaya nong karei di gauk. Mbiah tal thun 2000, sa-ai Việt salih tapa pala dâu da. Urak ini bein di sa-ai  hu labaih 100 phun dâu, yaok thun mek jien tame labaih 500 trieu dong.

Ngak nong lavik thun, sa-ai Việt thau hu hatai takre di darak pasar, brei tabiak pandap dulich kaya nong labaih 10 thun ini mai. Bein dâu Ba Hương di sa-ai Việt hu jeng labik ngak iek ka bruk padang ngak palei pala birau paglong, thau ba tame pandar veik meng bruk salih janih phun pala, ramik pasiam mbaok meta palei pala. Dom jalan tuh betong samu tapak, hacih sa-at, rik daong  oh lac takik ka bruk ba mbuan lagaih ka bruk ngak dulich. Sa-ai Lê Quang Việt khan lac:

“ Meng kan glaih glar jang dut saong urak ini, ngak bruk hagait jeng meng tangin, takik pandar mac moc. Ia ribong hu luac thun, pabak ginup ia pruh, yau bilan pandiak thu ini jeng daok hu ia”

Jak jeng di palei pala birau paglong hu daong ka bruk ngak nong di bhap bini dak harei dak kaya meda, ngak tabiak rilo bruk ngak nong  birau ba mai kein laba glong yau bein ca cao Xuân Lộc (xã Suối Cát). Ini lac bruk ngak nong gam rivang dulich rik tame paglong jien mek tame  meng phun pala, paglong yaom palei pala birau.

Ong Trương Văn Mỹ - Yam ndoc Hợp tác xã ca cao xã Suối Cát brei thau: Meng thau pandar ilamo ky thuat nan ye bein ca cao brei rilo baoh tagok tal 100 tấn sa thun. Thun 2020, ong Mỹ ngak iek brei tabiak pandap biak siam, dalam nan hu 2 pandap lac sô cô la, tapung ca cao mek hu 3 patuk OCOP.

Tapa HTX, bruk pablei pandap kaya nong hu tani tanat. Urak ini, bhum pala pandap tamo di HTX hu labaih 70ha. Bruk ngak tabiak pandap hữu cơ tanut chuan VietGAP hu dom kong ty dalam saong langiu negar taong yaom biak glong. Ong Trương Văn Mỹ brei thau: 

 “ Mbaok meta puk palei salih birau mboh cambaic laic, yau jalan mbak praong laneng lanoi, sang danaok hacih sa-at praong siam. Bhap bini padang sang danaok, jien mek tame, anek bik hu nao bac da-a mboh bui sambai hatai ralo, raidiuk bhap bini hu paglong”.

Tal puac thun 2023, huyen Xuân Lộc  hu 14/14 xã mek hu chuan palei pala birau paglong saong 9xã palei pala birau kieu mau. Meng “ bhum taneh pui” dalam samar mesruh metak, urak ini Xuân Lộc nao dahlau di tỉnh Đồng  Nai saong lac sa dalam 3 huyen di dalam taneh ia padang ngak palei pala birau paglong.

Bí thư Huyện uỷ Xuân Lộc Lê Kim Bằng khan lac: Xuân Lộc lac bhum taneh anh hùng saman mesruh metak pacang kol Mỹ. Tuk hu sron mbon veik, bhum taneh ini daok patagok ilamu anh hung dalam ngak mbang pala drak, ngak kaya meda bhum palei. Raidiuk bhap bini di huyen dak harei dak tagok, urak ini jien mek tame di bhap bini  kuhria rah tapa sa thun labaih 90 trieu đồng sa urang. Ong Bằng khan lac, anak tal  huyen Xuân Lộc daok patagok jang bruk ngak hu, mek hu rilo jak jeng jang dalam bruk ngak nong, palei pala:

 “Mek hu tanut chuan palei pala birau paglong lac jalan peih tabiak piah patui jalan yam tagok gah anak. Bruk pamong tal jaik abih lac ngak habar akaok thun 2025, huyen Xuân Lộc mek hu tanut chuan palei pala birau kieu mau tui jalan ngak tabiak pandap panda kaya nong khang kajap”.  

Dalam mesruh metak, Xuân Lộc hu manuac sia dalam negar thau tal lac “bhum taneh apui”, ye urak ini Xuân Lộc lac labik nao dahlau dalam padang ngak palei pala bahrau camereip abih dalam taneh ia. Oh dang veik di labik nan, urak ini, Xuân Lộc daok yam tal bruk lac jeng huyện palei pala birau paglaong akaok meti di taneh ia./.