Hu rilo urang Quoc hoi hu mbaok yer tangin njauk hatai, Quoc hoi brei tapa Sarak di Quoc hoi ka bruk ramik pagam jabat hanh chinh pakat tinh thun 2025. Tui nan, dalam negar hu 34 jabat karja pakat tinh, hu 28 tinh saong 6 ban raya. Dalam Sarak hu ndem cambaic laic; karja dom tinh, ban dahlau tuk pagam tame brei patui bruk ngak tal tuk hu karja di tinh, ban hadei ramik pagam tame ngak bruk. 

Page harei 12 bilan 6, TPHCM tame ngak bruk iek dahlau karja dua pakat di 102 phuong, xa. Piah ngak iek bruk nan, Thanh uy TPHCM hu padang 10 kapol ngak bruk pasang iek, tacei pato. Bi thu Thanh uy TPHCM Nguyễn Văn Nên kakei lac, ini bruk ngak iek akok meti piah caga tame bruk ngak biak duh ka bhap bini dalam tukvak anak tal. Yau nan ye, ong caong khin dom urang jakar yaok bruk ngak, labik ngak, ngak tui jalan ba tabiak, pasang iek dom bruk ngak blaoh bo oh ka njauk tui hatai caong khin piah ngak brei lagaih, bruk ngak hu sanang sane tui dom bruk ba tabiak.

Piah rik tame tani tanat labik daok di baoh sang kan kandah, meng rilo phun jien karei di gauk, meng akaok vaktu ngak bruk  di Nyaom roya Đảng bộ tỉnh mbang XI mbiah tal ini, dalam tinh  hu jaik 474 ti dong. Ben Tre ngak hu 9.210 baoh sang ka urang kathaot salih ka sang taik tahak, kuhria abih tih  hu jaik 474 ti dong. Ben Tre  kham merat tal harei 30/6 meda ngak hu salah 1.947 baoh sang ka urang kathaot. Ben Tre  jeng daok jak ba bruk “ 45 harei melam”, pasamar  peih ngak salah danak dak padang sang daok ka urang di tinh Ben Tre.

HĐND tinh Ca Mau birau njauk gauk peih ngak danak dak mek veik taneh, bayar jien taneh, daong saong padang veik labik daok birau ka urang piah mek taneh ngak jalan peih drah samar Ban Cà Mau - Đất Mũi karja buh jien tame ngak drah samar. Jalan peih drah samar Ban Cà Mau - Đất Mũi atah labaih 90 km, hu 4 jalan radaih, nduac gam haong jalan raya 1 saong jalan Ho Chi Minh, lac jalan puac abih jalan dalam negar Viet Nam jaik 2.000 km meng gah Barak Pác Bó tal gah Meraong negar. Tui kuhria ngak salah dahlau thun 2030.

Di Dak Lak, hajan praong dui atah rilo adit tapa, ba tal doanh nghiep saong urang pala durian haduh hatai huac baoh durian khut khat,  dalam tuk nan daok labaih 2 bilan tra brei paik baoh. Tui So Ngak nong saong Moi truong tinh Dak Lak, taneh pala durian dalam tinh hu 38.800 ha, meblah jiak 22% taneh pala durian dalam negar. Yau nan min,  taneh pala saong labik papaok baoh hu brei taka so pablei tabiak negar langiu daok biar. Bruk pandar ilamo - kong nghe dalam bruk pala daok takik, baoh praong sit oh sumu gauk. Abih di nyu nan lac, pambuak bruk oh hu kajap, labik ngak tabiak baoh durian oh hu buh jien tame ngak brei siam sumu gauk.

Gilang Dunya cakak trun bruk kuhria dahlau ka bruk cakrok di Campuchia trun daok 4% dalam thun ini, kayua rilo kan kandah kayua bruk ngak mbang di dunya jeng yau dalam negar. Tui gilang pariak Dunya di  Campuchia, taneh ia ini brei jhul pakhang bruk parilo jalan ngak mbang patagok gah kinh te saong duah bruk ngak dalam tuk kinh te dunya kan thau dahlau yau urak ini, abih di nyu nan lac yam tapa bruk pambak tame gah padang taneh riya jeng yau bruk pablei tabiak negar langiu  gah jhik khan ao, pataom tame gah ngak tabiak ndap nda saong jitvu  ngak tabiak rilo jien laba.

Sa mbang langik pandiak catang pambak praong gah barak An Do tagok glong tal 47.3 do C. Pandiak oh ka bhian mboh nga kan kandah tal raidiuk bhap bini brei mboh bruk dak harei dak kan kandah  gah co so ha tang y te ngak bruk tapa prein di taneh ia Nam A ini. Thun blaoh,  langik pandiak dui atah yaok bilan  di An Do ngak metai labaih 100 urang saong dui atah tal labaih 40.000 urang mebuh having pandiak.

Hu takik abih di nyu 49 urang metai kayua ia ribuk sua di Nam Phi hadei langik la-ar  gam hajan saong tuyet laik di dom labik dalam negar. Dahlau di nan harei 10 bilan 6, hu 7 urang metai kayua ia ribuk sua, tuk radaih buyt pajeng anek saih  gaok ia ribuk ba theik nao. Tui urang jakar pak ini, takik abih di nyu 58 sang bac saong 20 sang iek ruak ia ribuk ngak khut tayak. Labaih 500 urang panduan ba nao labik karei daok kayua sang danaok ia ribuk theik atau khut tayak./.