

Tinh Dong Nai ba tame ngak iek dahlau jabat karja di harei 12 bilan 6. Dom don vi hu palih ruah ngak iek dahlau jabat karja pakat xã birau nan lac: phuong Phước Tân, phuong Hàng Gòn, xã Xuân Lộc, xã Đại Phước saong xã Phú Lâm. Bruk ngak iek nan hu: langyah bruk ngak tui phan mem khik iek harak gal dalam bruk ngak pakat xa saong ngak tui tacei pato di jabat pakat angaok, brei langyah harak gal ka bhap bini - jabat karja - peih bruk jitvu karja pakat negar saong ngak harak gal karja langiu bhum palei.
TPHCM hu jaik 100.000 anek saih pakacah tamat THPT thun 2025, tagok jaik 9.000 anek saih dut haong thun dahlau. Ban raya brei 171 labik ngan haong labaih 4.200 duk bilik pakacah. Thu truong Mentri Pato megru Phạm Ngọc Thưởng khan lac, TPHCM lac bhum palei hu anek saih pakacah tamat dang dhi 2 dalam negar. Yau nan ye, Ban raya njauk brei kuhria caga dahlau meda rah tabiak kan kandah.
Tinh doan Ben Tre peih ngak tabung glong Chien dich “ Dam dara halan hatian he” thun 2025, ngan haong kadha “ Dam dara Ben Tre nao dahlau, halan hatian, kham merat ba ilamo, kong nghe, salih pandar so, pakacah gauk ngak tui danak dak abih sang oh daok taik tahak, tame padang ngak Ben Tre hijao”. Makna praong lac dom bhum palei daok padang palei pala birau, palei pala birau paglong, palei pala birau kieu mau thun 2025, dom xa an toan khu saong xa kaoh pulao.
Giai Marathon dunya “Mekong Delta Marathon” Hậu Giang mbang ka 6 ngan haong kadha “ Gam haong ayut pahadah” meda hu peih ngak di bilan 7 anak tal. Tui kuhria mboh dahlau hu labaih 10.000 urang hu mbaok tame, dalam nan hu 2.000 uranaih. Tapa pakacah yai nduac ini, Hau Giang pachreih pasram patia the thao saong pakhang prein yawa bhap bini. Tapa bruk pakacah nan, tinh Hau Giang caong khin yaih khan ka ilamo, anek manuac saong dom siam gheih di Hau Giang, rik tame jhul pakhang bruk cakrok gah yulit bhum palei.
Urak ini, urang raong arieng tasik di tỉnh Tra Vinh mek arieng akaok meti di thun 2025. Jaik abih mek hu kein laba glong, kayua yaom arieng tasik pablei tagok meng 200.000 - 450.000 dong sa kilo, glong jang tukvak ini thun dahlau meng 20 tal 30%. Yaom nan, urang raong arieng laba labaih 160 -180 trieu dong sa hecta sa bilan. Urak ini, arieng tasik hu jeng janih raong duah jien tame ralo di dom labik tapen tasik tinh Tra Vinh.
Jabat pacang caga tham nhũng di Indonesia daok peih praong bruk pasang iek kapol urang pambang jien 53,7 ti Rupiah, sumu 3,3 trieu dola My pambuak tal bruk ngak harak gal ka urang nao ngak bruk negar langiu, dom bruk ngak suan hu Tong cuc Di tru. Jabat pasang iek di Uy ban pacang caga tham nhũng daok sahaneng dom bruk tham nhũng di Bo Nhan luc, bo dalam dom harak gal di trú, labik brei harak gal nao ngak bruk saong brei harak adat daok veik.
Yaom lac hu dom taneh ia hu salih birau bruk pacang caga jit ruak dau mua khi, min Gah Y te dunya khan lac daok khik bruk ngak brei samar chip y te bhap bini, kayua dom urang njom ruak dau mua khi parilo tagok, abih di nyu nan lac di bhum Tay Phi. WHO iew dom taneh ia pakhang bruk duah thau, duk iek ruak, langyah gen piah thau dom chung virus birau saong klauk jru caga ruak.
Rajaei Trung Quoc caong khin taong abih dom sang iek ruak pakat ngaok brei pabak jitvu ngak bran te ngak langiu dalam tuk ndik tapui dahlau puac thun ini. Bruk nan piah jhul pakhang bruk “labik ndih tapui salamat” ka urang kumei. Gah Y te Dunya kakei bruk ngak te bran gah langiu ka urang kumei metian prein yawa karo caong khin ndih tapui takik pandik saong bruk ngak yau nan hu pambak praong di rilo taneh ia di dunya./.
Viết bình luận