Page ini,Quoc hoi mbang 15 patui mbang nyaom ka 9, mbang ka 2. Tui kuhria mboh dahlau, ngak bruk meng harei ini tal abih harei 27/6, Quoc hoi pataom langyah pasang iek rilo asar kadha  hu makna praong. Dalam nan Quoc hoi pang dom harak pathau khan saong ginum biai ka bruk ramik pagam don vi hanh chinh pakat tinh; sarak brei buh jien tame ngak jalan  Vanh dai 4 TPHCM; bruk ngak iek dom jalan, sarak dac thu, abih di nyu piah buh jien tame ngak brei parilo jalan pasei. Gah langiu bruk nyaom biai, dom urang jakar  Quoc hoi ndem lac, bruk ramik pasiam dom jabat karja pakat tinh saong ramik karja pakat xã brei ngak samar, piah ba mbuan lagaih ka bhap bini jeng yau doanh nghiep.

Dalam 10 thun peih ngak Sarak di Mentri Chinh tri ka bruk “ Jhul khang bruk bac da-a saong ngak tui jalan diukrai siam mekre di Ho Chi Minh” rilo co so ndang di Soc Trang palih ruah bruk ginum biai, pambak praong labaih 3.000 bruk ngak hu pagam bruk ngak di jabat, don vi. Tapa bruk bac megru saong ngak tui panuac tacei pato di Wa Ho, urang dang,  kong chuc, vien chuc saong urang ngak bruk brei mboh bruk ngak di drei, nao dahlau dalm bruk ngak jengyau paglong jalan sahaneng ngak bruk daong ka bhap bini; pasiam bruk iek lap, atah bhap bini saong padang thaot binguk bruk ngak di urang jakar hadah krah, sami samar.

Tapa 4 bilan peih ngak brei abih baoh sang oh daok taik tahak, tal puac bilan 4 meng blaoh, dalam tinh Tay Ninh ngak blaoh abih bruk ba tabiak, jao brei jaik 700 baoh sang kuhria tui jien kalabaih 60 ti dong. Tay Ninh lac tha dalam 15 tinh , ban dalam negar ngak hu baoh samar oh daok baoh sang taik tahak dahlau harei 30 bilan 4. Tinh Tay Ninh kham merat tal  puac thun ini oh daok baoh sang kathaot tui tanut chuan pakat negar.

Di Nyaom biai kuhria iek veik bruk salih jalan janih phun pala di taneh hamu padai tukvak meng thun 2021 - 2025 tinh An Giang hu salih taneh pala padai oh labaih tapa pala njam patam, phun mbang baoh hu labaih 34.000 ha. Tui nan, dom bhum pala phun mbang baoh, dalam nan hu rilo janih pa-ok lac pa-ok  Hòa Lộc, pa-ok keo. Dom bruk salih tapa pala njam patam hu daong dom baoh sang bhap bini duah jien tame, hu bruk ngak tani tanat.

Meng harei 11 tal harei 13 bilan 6, dom tinh Nam Trung Bộ, Tây Nguyên saong Nam Bộ hajan praong 30 -150 mm, hu labik labaih 200 mm; meda hu jalan khang biak khang labaih 200 mm dalam 6 tuk. Yau nan ye, Mentri ngak nong saong Moi truong caong khin dom tinh, ban brei hu jalan  pacang caga ia ribuk sua, glut jaleih taneh saong ia dauk;  hu jalan pacang khik phun padai, njam patam, kaya ikan; dom KCN, di thi tapen kraong craoh; Cara manuac urang piah ngak bruk daong tuk hu bala rah tabiak samar abih. 

Rajaei Thai Lan daok kuhria brei cakak ndien saong internet di bhum taphia negar Campuchia piah pacang dom bruk pachot pagat tapa tong dai, abih di nyu nan lac bruk saw kadau di labik taphia negar dua taneh ia oh ka abih. Bruk ba tabiak nan hu pok tagok Hoi dong An ninh Negar piah pasang iek langyah dalam tukvak anak tal. Dahlau di nan, Campuchia ba bol lin tabiak truh labik meblah gauk jaik ceik Chong Bok, piah hu siam veik. Yau nan min, dom jalan pacang urang tame tabiak  negar hu dom balai khik iek taneh taphia negar ngak bruk catang.

Sa urang likei umo 35 thun saong dua anek metai hadei apuimbang sang di gait daok tal 7 sang chung cu glong di gah Tay Nam ban ine Delhi di Ấn Độ. Tui So Daong padam khuah Delhi lac thau apui khuah di bhap bini jaik  mblang kapal haok dunya di ban ine New Delhi. Apui khuah samar  gam thak me-om jhuk. Dom urang tadau trun meng sang glong tal 7. Klauk anek ame oh diuk hu. 

Takik abih 10 urang metai saong rilo urang njauk rambuac trak dalam mbang patuh phao di sa sang bac trung hoc di ban Graz, gah meraong negar Áo. Ini lac bruk patuh phao metai rilo manuac abih dalam sajarah  mesruh di negar Aó. Gah pathau khan khaw tin negar ini khan lac bruk patuh phao tuk mon 10 harei 10 bilan 6, tui tukvak pak ini, tuk sa urang patuh phao tame dua tal bac. Dom khaw tin medil lac bruk patuh phao kayua sa anek saih bac blaoh di sang bac ini saong urang ini pametai drei eng pak labik nan./.