Harei raya bingu bal pataih Ban raya Ho Chi Minh rah tabiak dalam 10 harei, meng harei 24/1/2025 tal 2/2/2025 (ieu lac harei 25/12 saka ia bilan tal abih Harei 5 Tet Ula Naih). Harei raya Ula Naih 2025 hu praong glaong dalam bruk hu rilo sambo bar bingu saong mbau pahe bingu gaom haong maong iek dom tac pham nghe thuat karei. Langiu di nan, mbang akaok meti rah tabiak di Harei raya bingu bal pataih lac sa janih mblang parang iek ilamo meng kal - Tamia rối ia. Dom mbang parang iek Tamia rối ia lac dalam dom var page Harei 1-2-3 Tet Ula Naih. Taphia nan daok hu dom danak dak tamia lân sư rồng yaok melam yaok harei.

Danak dak “Xuan halan hatian thun 2025” kayua Tỉnh Đoàn Tây Ninh pambuak haong Kapol Urang Dam dara Viet Nam tỉnh peih ngak meng harei 24/12/2024 tal harei 15/2/2025. “Xuan halan hatian” oh lac piah dom uranaih Tây Ninh brei mboh bruk nao dahlau dalam bruk ngak, bo daok lac lagaih dalam bruk pambuak  bhap bini, klak rabha anit ranam saong ba mai sa Tet drei sir ka dom urang takik patauh jamo. Danak dak oh lac pandap bo daok lac asar kadha jum pataom, bruk ngak daong manuac sia saong anit ranam urang karei, piah thun birau  hu ndung bak anit ranam.

Tal urak ini, tinh Binh Phuoc hu 241 hop tac xa daok ngak bruk. Dalam nan 136 hop tac xa daok dalam bhum mikva bangsa takik, brei bruk ngak ka 5.680 urang ngak. Dom hop tac xa daok dalam bhum urang bangsa takik, jeng pambuak bruk ngak saong pablei tabiak pandap panda tui chuoi yaom kaom. Dom hop tac xa ini dalam dom thun tapa hu saong daok daong rilo baoh sang rahra bangsa takik patagok kinh te, daong patruh eik patrun kathaot di bhum palei.

Tỉnh Sóc Trăng hu 72 km ar tasik, yaok thun gaok kan kandah kayua pandiak bhang tua riya, njom ia mbak. Bilan thu thun 2025, UB bhap bini tỉnh Sóc Trăng kuhria ba tabiak jalan pacang caga dahlau pandiak bhang tua riya, njom ia mbak, khik ginup ia pala drak, ia menyum ka athur raong, ia pandar ka bhap bini. Huyen Cù Lao Dung hu ar tasik atah 17 km, bhian njom ia mbak. Meng akaok thun, UB bhap bini huyen hu pathau khan tacei pato piah yaok baoh sang, doanh nghiep, labik ngak tabiak pandap brei caga dom bruk pacang njom ia mbak.  Di huyen Long Phu, jeng hu padang ngak  dom jalan , dalam nan hu patui iek bruk njom ia mbak, brei thau nong ndo sara di labik njom ia mbak, piah hu ia ka bruk pala drak, ia pandar di rahra.

Labik jit ndaih baoh di sa gah ngak mbang pablei salih di labik ngak kong Giao Long, huyen Châu Thành, tinh Bến Tre ngak ka jaik 300 urang njauk jit bahrau takik jang ye di sa sang bac di ban Bến Tre rah tabiak jit ini. Gah y te pachreih sang bac brei ka anek saih njauk ruak padeih bac takik abih 7 harei tal tuk abih ruak. UB Bhap bini Ban Bến Tre pandar Pasak Y te ban pasang iek catang, duah mboh saong pacang caga, taong ruak ndaih baoh, srap gap ginup labik pabak jru cavao, radaih daong samar drah saong taong ruak.

Trung Quoc meda patui peih praong dom danak danak daong piah pachreih urang blei salih dom pandap klaak tapa pandar dom pandap birau. Sarak daong bruk salih birau radaih oto hu peih ngak pambak praong veik gam haong dom radaih  hu tanut chuan tathuak thak nerak di Trung Quoc. Thun ini, dom pandap taka so yau phone tangin, may tinh bang, kong tangin thong minh mbang camereip hu daong tui hatai caong khin di bhap bini. Trung Quoc  jeng pambuak sanya pakhang bruk daong salih birau  di dom gah yau kong nghiep, menyek ndien, radaih, logistics.

Hu takik abih 6 urang metai dalam mbang juak gauk rah tabiak di sa harei adat aguma di urang tui aguma Hindu di Ấn Độ. Mbang juak gauk ini daok ngak tagok bruk suh sah ka bruk salamat di dom harei raya praong di Ấn Độ tuk dom harei anak tal rah tabiak harei raya Kumbh Mela praong abih dalam sajarah urang tui aguma Hindu haong 400 trieu urang nao haji hu mbaok tame. Gaok bala ngak njauk rambuas bhian rah tabiak di dom labik paling di Ấn Độ dalam dom harei adat aguma praong kayua bruk pasang iek rilo urang menuac oh ka kajap saong oh hu salamat.

Urang ruak kum di Nhat Ban kuhria rah tapa sa adit glong abih meng thun 1999, ngan haong 317.800 mbang urang ruak, dalam nan hu dom bruk haduh hatai pambuak tal ruak glo akaok saong phoi. Mentri Y te,  Lao động saong  Phúc lợi Nhat Ban iew bhap bini brei ngak siam dom jalan pacang caga dahlau ruak kum, klak nyom mbak dalam bhap bini yau cuh siuk pacang idung pabah, rao tangin tuk nao saman…jeng yau klauk jru vaccine pacang ruak kum./.