Thu tuong Phạm Minh Chinh birau hu harak tacei ba cambaic laic, kham merat ngak hu salah bruk oh daok baoh sang taik tahak dalam negar dahlau harei 31 bilan 8; dalam nan hu daong ka gauk gar urang lin liet si, urang hu buh prein daong ka cach mang dahlau harei 27 bilan 7. Mbiah tal ini, dom pakat, karja palei daong padang labaih 205.000 baoh sang ka urang sang taik tahak, dalam nan ngak blaoh ba tame daok hu 147.000 baoh sang, padang ngak hu jaik 58.000 baoh sang; 21 dalam 63 tinh, ban oh daok sang taik tahak.

Meng harei 12/6 tal harei 30 bilan 6, TPHCM ba tame ngak iek dahlau karja dua pakat di 102 phuong, xã birau hadei tuk ramik pagam. Tui nan, Ban raya peih bruk jao brei adat hukum ngak bruk, yaok bruk ngak meng pakat huyen trun pakat xa hadei tuk pagam tame, hadei dom harak hukum karja hu ba tame pandar ngak tui meng harei 1 bilan 7. Ban raya jeng hu patabiak dom sarak brei padeih bruk ngak di Ndang bo Ban Thu Duc, dom quan, huyen jeng yau dom dang bo xã, phuong, ban sit klak dahlau.

Tinh doan Soc Trang pambuak haong Bộ Chỉ huy Quân sự tỉnh Soc Trang, So Pato megru Soc Trang peih tal bac Bilan bac dalam bol lin ka 92 lin uranaih. Tapa dom bruk bac pasram dalam bol lin daong ka dom adei uranaih thau sahaneng calah gah jang, thau kuhria anit ka rup drei, baoh sang, padang jalan sahaneng jum pataom, pambuak ayut sahabat, pasram patia jalan sahaneng, sangka iek rup eng piah diukrai jak jeng siam mekre, sahaneng merat gheih.

Mbiah tal ini, urang ngak nong Tien Giang yauk hu blaoh 19.000 hecta padai bilan Xuan He 2025. Dalam bilan Xuan He 2025,  ngak urang nong yuak hu labaih 61 tạ sa hecta saong padai ngak tabiak hu jaik 116.000 tấn pablei. Piah ngak hu padai bilan Xuan He 2025 anak bruk lagik oh lagaih, karja palei parabha tukvak tam drak padai pataom tame, sumu haong bruk caga langik pandiak bhang tua riya saong njom ia mbak lagaih haong yaok bhum taneh.

Kong an tinh Bac Lieu birau chap mek ong Dương Văn Hòa, ndih tapui thun  1949, daok di xa Vĩnh Bình, huyện Hòa Bình daok ngak ja pandap mbang ka hadang girong hijao, hadang su, hadang the. Di labik ini hu 35 kadung pandap mbang daok papaok saong 55 kadung mbao pandap mbang  hu ngak tabiak meng dahau ngan haong rilo angan karei di gauk, kuhria abih tih hu 1 tấn 800 kilo. Iek veik gilang khik piah, rajakar duah mboh veik 1.800 kadung ndap, abih tih trak jaik 36 tấn. Ong Dương Văn Hòa khan lac hu nngak tabiak ndap mbang ka hadang ja pablei tabiak ka urang.

Hadei tuk mentri Quoc phong Campuchia tabiak harak ka dom bruk birau rah tabiak di taneh tapen negar Campuchia - Thái Lan, Thu tuong Hun Ma-nét khang panuac lac: Rajaei brei patui bruk khik kajap bruk pambuak haong Thái Lan jhul pakhang bruk duk kuhria veik brei padang jamang tapen negar daok veik di dua taneh ia, tui jalan sarak di Uy ban taphia negar Campuchia - Thái Lan, tui dom jalan ginum biai di Rajaei dua taneh ia saong hukum dunya.

Ginum biai bruk pablei salih di Mỹ saong Trung Quốc di London, Anh dui atah harei ngak bruk ka 2, tuk dom urang ilamo ginum biai kinh te di dua gah langyah bruk jien je, dom bruk kan kandah taneh daok biak takik - phun jien meda lac bruk kan kandah dalam bruk pablei kaya di dunya saong ngak suai cakrok patagok kinh te. Tong thong My khan lac, dom bruk ginum biai gah pablei salaih haong Trung Quoc  daok rah tabiak siam mekre.

Urang jakar Ấn Độ khan lac, pajeng pandap Wan Hai 503 tuan hala dok Singapore apui khuah di jalan tal ban Mumbai di Ấn Độ. Rilo mbang patuh khang saong thaot binguk apui khuah meng gilai. Labaih 40 kong-ten-nơ ndap laik trun tasik. 18 dalam 22 urang dalam gilai chat tabiak truh apui khuah daong hu siam abih gauk. Urak ini, oh ka thau yau halei dom urang daok veik di gilai kapal nan./.