Tui hukum birau brei tapa, yaok diuk pasang, urang brei kuhria tukvak ndih tapui anek, dom urang anek saong ndih anek dahlau atah anek hadei lagaih tui umo thun, tui prein yawa, bruk bac da-a, bruk ngak, jien duah tame saong raong pato anek di drei, diuk pasang sumu gauk.

UBND TPHCM ba tabiak jalan ngak piah khik takai po buh jien tame ngak ka danak dak Pabah tasik pajeng ba pandap dunya Can Gio. Sarak dac thu pataom tame dom asar kadha yau: brei ngak dahlau jalan mbak, logistics, gilang khik piah ndap nda, mblang radaih tame tabiak; daong ngak sarak adat karja, brei abih takik tukvak padang ngak; pachreih doanh nghiep ngak logistics. UBND TPHCM brei mboh bruk padang ngak Pabah tasik pajeng ba ndap nda dunya di Can Gio lac sa dalam dom bruk ngak suai lavik dalam bruk ngak brei cak rok patagok kinh te tasik Viet Nam.

Huyen Cao Lanh, tinh Dong Thap birau mek hu angan palei pala birau paglong thun 2024. Dalam dom thun tapa, huyen buh tame labaih 1.443 ti dong piah padang ngak 725 danak dak pambuak jalan mbak dalam bhum, ngak salah jalan nao mai dalam palei gam ngak ar pacang labik pala drak, padang ngak ha tang tui tanut palei pala birau, pablei pala birau paglong. Dom danak dak padang ngak hu salah blaoh saong ba tame ka bhap bini pandar, rik tame jhul patagok kinh te - xa hoi.

Gah chuc nang tinh Bac Lieu daok ba tabiak rilo jalan kuhria caga saong langyah siam dom bruk ngak suan lih tame paga pacang ar tasik bien Dong. Jalan ar tasik bien Dong di tinh Bac Lieu atah jaik 53 km, oh lac jalan nao mai tapen tasik hu 24 tatua, bo daok lac paga pacang yaok pluh ribau hecta taneh pala drak, raong kaya dalam ia, glai pacang caga saong labik diukrai di bhap bini gah dalam ar. Meng thun 2010 mbiah tal ini, tỉnh Bạc Liêu hu 975 urang ngak suan bruk di jalan ar pacang.

Harei kabroi 3/6, di Dong Nai, gah chuc nang peih bruk pasang iek labik rah tabiak bala, ngak brei cambaic laic bruk sa urang likei metai di huyen Vĩnh Cửu dalam puh pakak di sang gait tuk pagui patrauk limen. Dahlau di nan harei 2/6, ong L.V.T (umo 66 thun, daok di puk 4, xã Mã Đà) mboh hu 4 drei limen tame apuh mbang njam patam phun pala di ong, yau nan ye ong patauk. Labaih  mon 6 tuk harei 3/6,  urang mboh rup tau ong di apuh tram, bein pa-ok atah sang labaih 100 met yau nan ye khan karja palei thau.

Harei ini meda peih ngak Adat tagok rai Tong thong mbang ka 21  di Han Quoc, hadei tuk UB khik iek palih ruah pakat negar Han Quoc jao brei harak palih ruah gam tame ka ong Lee Jae-myung lac  urang di dang Dan chu doi lap mek hu 51,7% hala phieu njauk hatai. Dalam panuac sanya tuk jak ba urang buh phieu, ong Lee Jae-myung khan lac brei paglong jien daong ka uranaih tal umo 18 thun, kuhria tui jien daong ka dom urang ngak nong, trun jien bao hiem yaok bilan ka dom diuk pasang…piah paglong raidiuk di bhap bini.

Urang padang Microsoft Bill Gates brei mboh, ralo drap ar kaya di ong hu pandar tame ngak brei paglong dom jitvu y te saong pato megru di chau Phi dalam 20 thun anak tal. Bilan dahlau, urang kaya meda Bill Gates khan catuah meda brei buh tabiak 99% drap ar di drei bo ong kuhria jaik 200 ti dola My di thun 2045, tukvak  kadung jien  di ong jaik padeih ngak bruk.

Urang jakar Nigeria khan lac ia ribuk sua rah tabiak di adit tapa di bhum Kreh negar ini, ngak khat lahik trak hu jaik 200 urang metai, labaih 3 ribau urang brei panduan ba nao labik karei samar, ngak khut tayak takik abih 2 ribau drap ar, ba theik sang danaok saong klau baoh tatua jaoh jaleih. Tong thong Nigeria Bola Tinubu brei mboh rajaei daok kham merat jak ba urang duah daong, gam peih bruk panduan ba bhap bini tal labik hu salamat./.