Dang akaok nyaom biai di Mentri Chinh tri, Mban Bi thu brei panuac ka bruk peih ngak dom Sarak, sarak tamat kuhria di Trung uong, mentri Chinh tri ka bruk ramik bruk ngak saong padang jabat karja, Tong Bi thu Tô Lâm jao ka dom Mban Thuong vu dom tinh uy, ban uy, njauk ndem tak dom rajakar  ngak praong dang kaok maong iek, kuhria tukvak ngak salah blaoh bruk ramik jabat karja dom pakat, ba dom kapul, labik, jabat pakat tinh, pakat xa bahrau meda ba tame ngak bruk meng harei 1/7/2025 njauk tui pato tacei di Mentri Chinh tri, Mban Bi thu. Gam haong nan tui iek, langyah lagaih sarak ka urang jakar padeih bruk tui sarak.

Akok UB bhap bini tinh Ca Mau hu mbaoh harak angan rajakar padeih huu dahlau thun umo, padeih bruk tui Sarak 178 dalam mbang ka 3. Kuhria abih tih 66 urang brei padeih bruk, dalam nan hu 39 urang padeih hưu dahlau umo thun saong 27 urang padeih bruk. Dahlau di nan, dalam 2 mbang camereip, tỉnh brei ka 153 urang jakar padeih bruk. Kuhria abih tih hu 3 mbang, Cà Mau hu 225 urang padeih bruk. Hadei 3 mbang brei padeih  bruk ka urang jakar, kuhria abih tih jien bayar labaih 250 ti dong meng kadung karja. Jien bayar ka urang glong abih lac 2 ti dong.

Pasang iek tapak bruk padang tatua Bình Gởi, sa banah hu makna di danak dak Vanh dai 3 ban raya Ho Chi Minh, jalan tapa Ban Thuận An, tinh Binh Duong, Phaok Thu tuong Rajaei Mai Văn Chính pandar dom labik hu pambuak patui veik lang talaih abih dom tavak tavaiy, kan kandah. Gam haong nan pandar po buh jien tame saong urang dang ngak brei kham merat jang veik, samar drah padang piah ba danak dak hu salah blaoh samar abih, khik kajap hu kajap khang saong salamat abih.

 Lime bilan akaok thun ini, bruk ngak tabiak nda nda kong nghiep di tinh Ba Ria – Vũng Tàu tagok jaik 8%, dang kaok nyaom gah ngak tabiak kaya ndap nda. Dom gah hu mboh tagok glong rilo mbang. Yau bruk ngak tabiak tagok labaih 26%, gah jhik menyim tagok labaih 25%. Tapa nan hu mboh, yaom lac dom gah gaok kan kandah, min bruk patagok khang di dom gah ngak tabiak ndap nda khik hu bruk patagok kong nghiep di tinh dalam 5 bilan akaok thun 2025.

Dalam tinh Tien Giang hu tapol pabui labaih 300 ribau drei, pataom rilo di huyen Chợ Gạo, Gò Công Tây, Châu Thành. Dom harei ini, yaom pabui di Tien Giang kurang takik, pabui di var hu yaom meng 7 trieu dong tal 7,2 trieu dong/ta (patui yaok tapol pabui), trun labaih 300 ribau dong/tạ dut haong adit dahlau. Ngan haong yaom ini, urang raong glang jeng hu jien laba labaih 2 trieu dong/tạ. Bruk njauk ndom lac jien buh tabiak raong tapol pabui mbang ini tagok glaong, rilo meng lac palai jien ka bruk pacang caga jit tả pabui chau Phi daok mbuan tamuh veik.

Yaok ribau urang Islam pataom mai labik Ceik Arafat di ban Mecca di Saudi Arabia, piah ngak adat rukun Haji thun ini. Rajaei Saudi Arabia, brei kuhria caga  rilo bruk piah plaik njiak kan kandah kayua langik pandiak, dalam nan brei peih praong veik 50.000 met vuong di labik hu pacang pandiak, brei yaok ribau urang y te hu mbaok piah ngak bruk saong pagam labaih 400 mac jamraih ngak la-ar di dom labik  sampayang.

Sa mbang riyak nhiệt tasik oh ka mboh nyu ngak karam sa bhum tasik praong jaik 40 trieu km² vil taom dan Dong Nam A saong Thai Binh Duong dalam thun 2024, ngak kan kandah praong tal he sinh thai saing bruk ngak mbang dalam bhum. Tui Kapul Kuhria langik tasik Dunya (WMO) labik Dong Nam A - Thai Binh Duong hu mboh nhiet do kuhria rah tapa di thun 2024 glaong jang dut haong tanut bhian di tukvak 1991-2020. Ia tasik dalam bhum jeng daok glaong tagok jaik 4 mm yaok thun – tapa tanut kuhria rah tapa dalam dunya lac 3,5 mm.

Kapal haok Resilience di kong ty ahaok Nhat Ban - Japon Ispace par tagok Ia Bulan, brei mboh bruk roh duah hu siam mekre birau angaok langik ini. Bruk kham merat nan mbuan gaok kan kandah tuk kapal haok  padeih lahik pambuak labaih 1 minit 45 giay dahlau tuk par trun baoh taneh. Kapal haok urak ini oh ka thau cambaic laic./.