Mai ngak bruk haong Mban thuong vu Tinh uy dom tinh Ben Tre, Tra Vinh saong Vinh Long dalam page ini, ndem ka bruk pagam 3 tinh, Tong bi thu Tô Lâm  khan lac, bruk pagam Vinh Long, Ben Tre saong Tra Vinh jeng sa don vi hanh chinh - kinh te birau lac bruk palih ruah birau piah ngak brei patagok veik  tui jalan pagam, sumu gauk saong kein lagaih. Bruk pagam tame nan  peih tabiak labik birau daong ka gauk hu ralo abih  di dom bhum palei, pakhang bruk ngak mbang. Klau tinh hu bruk kinh te, lagaih ralo bruk ngak, piah ngak jeng hasa tinh patagok sumu gauk saong abih gah.

Kong ty Co phan Pajeng ba Jalan pasei Viet Nam peih ngak danak dak daong trun 10% yaom harak ve  radaih ka anek saih nao pakacah THPT, nao pakacah saong tame bac di dom sang bac dai hoc, hoc vien, cao dang, trung hoc chuyen nghiep saong pato bruk ngak. Harak ve daong ndik radaih mai veik yaok anek saih 1 vé saong sa vé ka gauk gar nao tui. Danak dak piah klak  rabha, daong saong pabak prein ka dom adei anek saih pakacah thun 2025.

Tinh ndoan Bac Lieu birau peih bruk Chien dich Dam dara halan hatian thun 2025. Chien dich piah patagok bruk brei ngak dahlau, halan hatian di dam dara dalam bruk patagok kinh te - xa hoi; padang palei pala birau; khik brei salamat raidiuk xa hoi, quoc phong, sron mbon, abih di nyu lac dom labik kan kandah, bhum urang bangsa takik, agama. Mbang ini, Mban thuong vu Tinh doan Bac Lieu hu daong 9 danak dak padang mbang ngui birau ka dam dara kuhria tui jien lac 560 trieu dong. Kapol Pachreih bac tinh Bac Lieu alin 30 paok jien bac ka dom adei uranaih  raidiuk kan kandah.

Hadei tuk ba tabiak jien mek hareik kuhria kilo hu ba tame ngak, mbiah tal ini rilo labik daok di bhap bini di TPHCM daok pataom hareik yau dahlau diah kayua oh ka hu tacei pato ngak di karja palei. Hu mboh di ralo labik di TPHCM, hareik tuh tame thung prong, oh mboh parabha hareik. Dom urang lambaok gah pataom hareik  khan lac cang hu harak tacei pato cambaic laic di karja labik drei ngak bruk.  

Di huyen Lắk, tỉnh Đắk Lắk saong tỉnh Đắk Nông birau rah tabiak bruk jru mek kayua mbang bimao glai oh thau meng halei mai, ba tal 8 urang ba tame sang iek ruak. Bac si CKII Huỳnh Thị Đoan Dung – Pho akaok khoa gah Khoa Hoi suc tich cuc – Pacang jru mek, Sang iek ruak  Đa khoa bhum Tây Nguyên khan lac, urang ruak pandik tian, glaok ta-ok, having akaok saong medil lac ruak bimao mek. Dalam nan hu urang ruak trak gan, than urak ini daok tui iek ruak.

Mentri Y te Philippines khan lac oh pacang cakak ban ine Metro Manila dalam tuk huac dom urang ruak dau mua khi pambak samar. Urak ini dom labik iew brei cuh pataik pacang pabak idung min daok brei ngak tui hatai. Yau nan min daok huac, bhap bini ban Davao blei tanyiak pacang idung pabak biak ralo, yaom lac Jabat Y te ban ini lac oh njauk bruk kayua ruak dau mua khi oh njom mbak tapa yawa langik.

Jabat chuc nang Thai Lan cap mek kol pablei matuy  tapa dom taneh ia di labik taphia negar Lào, chap mek hu meteh tan matuy. Thai Lan daok peih ngak khang dom bruk  cap mek kol matuy. Dalam 2 bilan, bilan 4 saong bilan 5 meng blaoh, dom jabat chuc nang hu pasang iek 31 bruk ngak suan hukum, chap khik 34 urang, chap mek jaik 30 trieu asar matuy patau, labaih 4,5 tan matuy patau tinh the saong labaih 125 kilo heroin.

Kuhria khat lahik jien padai  kayua bala meng langik tasik dalam 5 bilan akaok thun di Australia tagok tal 2,2 tỷ AUD (sumu 1,4 tỷ USD). Dalam nan, khat lahik trak  abih lac kayua ribuk ia sua trak abih kuhria meng dahlau mai. Ta-eng bhum Đông Nam bang Queensland daok gaok ribuk oh bhian mboh angan  Alfred di bilan 3 meng blaoh. Ini lac ribuk nhiet doi tuh tame bhum gah Timun taneh ia Đại Dương ini dalam 50 thun tapa./.