UBND TPHCM birau brei ka Mban cih vak saong Mentri Tu phap thau bruk pataom mek panuac ka du thao sarak pasiam veik, pabak dom asar kadha di Hukum negar thun 2013. Bruk  mek panuac duah thau hatai sahaneng di bhap bini pak TPHCM  tui jalan taom gaok tapak saong online, dalam nan brei panuac tapa ung dung VneID lac jalan birau, samar, mbuan lagaih. UBND TPHCM taduan hu labaih 1trieu 800 ribau mbang urang payua panuac tame. Dom panuac nan jaik abih njauk hatai, asar kadha di sarak; yau nan  min daok hu dom panuac kuhri kuhria asar kadha di yaok paka hukum brei ramik pasiam, brei mboh jalan sahaneng brei panuac dak padang Hukum negar piah hu siam mekre.

UBND tỉnh Bình Dương daok roh duah dahlau bruk padang ngak Jalan pasei do thi ka 2, pambuak TPHCM Thu Dau Mot haong TPHCM. Danak dak kuhria abih tih atah jaik 22 km. Jalan hu padang ngak piah pabak ka bruk pajeng ba meng 30.000 – 40.000 urang sa mon sa mbang nao, caong khin pambuak TP.Thu Dau Mot haong TP.HCM haong dom ban sit daok jaik  jalan ini. Tui kuhria, jalan pasei  nan hu labaih 13 labik ga padeih saong 1 đề pô.

Sang bac Akhar tapuk - Ilamo - Nghe thuat Khmer Nam Bo saong Nhan van, di Dai hoc Trà Vinh, birau jao brei harak tamat bac ka 558 saih bac bac tamat thun 2025. Ini lac sang bac akaok meti di Viet Nam taduan bruk ngak pakat negar ka bruk pato pato pakai saong khik ramik ilamo, nghe thuat Khmer Nam bộ. Harei jao brei harak tamat bac lac brei mboh bruk pato pakai di sang bac, tui nan lac prein khang piah dom urang birau bac tamat blaoh tabiak ngak bruk, rik daong cakrok patagok dalam bhap bini saong khik ramik ilamo bangsa takik.

Piah rik daong peih ngak brei cak rok patagok GRDP sumu 8% tagok, tỉnh Tien Giang  hu harak likau Thu tuong Rajaei pabak 3.015 ti dong meng phun jien trai phieu Rajaei tame bruk ngak di karja thun 2025 di tinh piah buh tame 11 danak dak hu makna prong, atah tal harei hadei. Thun ini, Tien Giang hu phun jien di karja buh tame ralo labaih 7.000 ti dong. Kuhria tui phun jien  hu jao brei, dom po buh jien tame ngak pataom tame peih ngak dom danak dak tui njauk tukvak ba tabiak.

Dalam bilan 6 ini meda hu 2 mbang ia ndik tagok glong kuhria rilo thun di tasik gah Pei. Mbang 1 meng harei 12 tal harei 14 bilan 6, mbang 2 meng harei 24 tal 26 bilan 6. Mbuan ba tal dauk di dom labik di kaoh pulao Cà Mau tagok. Vien Khoa hoc thuy loi gah Meraong negar brei thau dahlau, brong ba ia Cái Lớn - Cái Bé, Xẻo Rô di Kiên Giang njauk brei pambuak tani tanat haong dom don vi khik iek, bhum palei piah ngak bruk.

Thu tuong Campuchia Hun Manet khan lac jalan ngak bruk di Rajaei taneh ia dalam bruk kham merat langyah bhum tapen negar urak ini haong Thai Lan lac brei ngak miat miat saong khik hasa jalan tapa dom hukum saong bruk ndem meyai haong gauk, eiw bhap bini brei jum pataom gauk daong ka bol lin saong jia tui Rajaei. Pambuak tal bruk taong paoh gauk di labik tapen negar  Campuchia - Thái Lan harei  28/5, ong Hun Manet khan lac, meyah bruk nan oh pacang hu sumu, urang metai meda tagok tal 100 urang saong taong gauk ralo rah tui labik taphia negar.

Trung Quoc tame bilan ia ribuk, dalam nan hu bhum gah Meraong negar tame bilan ia ribuk praong. Tui Metri Thuy loi Trung Quoc, yam tame bilan ia ribuk sua, meda rah tabiak hajan praong, ia ribuk sua saong dom mbang langik oh lagaih meda tagok, bruk pacang caga ribuk di negar ini meda gaok biak rilo kan kandah. Meng akaok thun mbiah tal ini, jaik abih  dom bhum palei dalam taneh ia ini gaok langik “pandiak bhang”, tua riya rah tabiak di dom bhum gah Meraong negar. Pandiak glong jang 0,80C dut haong tukvak ini dom thun dahlau.

An Do hu 22 mbang urang metai kayua COVID-19 saong labaih 2.700 urang njom SARS-Cov-2 dalam 7 harei tapa. Bruk parilo urang njom COVID-19 di An Do lac pambuak tal dua bien the birau di chung Omicron lac NB.1.8.1 saong  LF.7. Dom anek ruak nan meda njom mbak ralo min ngak jadal idung, glaih glar, pandik tarakon saong dom jalan hatung pruac. Gah Y te Dunya daok dak angan tame nyom dom anek ruak tui iek”./.