
Mbang nyaom ka 46 di UBTVQH kuhria ngak bruk dalam 6 harei, meng harei 3 tal harei 6 bilan 6 saong harei 9 tal harei 10 bilan 6. Mbang nyaom ini, UBTVQH caik rilo tukvak piah padang ngak hukum. Tui nan, UBTVQH jeng hu brei panuac ka danak dak ramik jabat karja pakat tinh thun 2025; pasang iek, brei tapa dom sarak ramik jabat karja pakat xa thun 2025. Pasang iek hukum Sarak di Quoc hoi ka bruk ramik pasiam atau atah klak bruk khik iek jien padai, jien bilan hu tui bruk ngak di dom jabat di Karja…
Tui kuhria dalam bilan 9 ini, Danak dak jalan patagok bruk ngak mbang kinh te Dong Tay tinh Soc Trang brei ba tame ngak bruk. Ngan haong danak dak hu makna praong dalam, samar, bruk praong brei ngak dahlau piah patagok kinh te xa hoi, Danak dak Jalan patagok kinh te Dong Tay tinh Soc Trang tuk ngak salah blaoh pambuak haong gah Pei tinh Soc Trang haong dom tinh lac: Bạc Liêu, Hậu Giang, Cần Thơ saong Cà Mau; jalan mbak pambuak dom bhum ngak nong, ngak glai saong pabak ka bruk nao mai, pajeng ba ndap nda di bhap bini hu lagaih.
Roya baoh kayau negar Meraong mbang ka 21 ngan haong “ Ngak nong khik halau gha - Bangsa khik suan sap - Yam tame dunya” daok peih ngak di Labik Yulit ilamo Suoi Tien, TPHCM. Roya dui atah tal abih bilan 8, yaih khan tal tuai damuai dom siam gheih, kaya meda dom janih baoh kayau bhum taneh pandiak takik hajan. Tui nan iek praong bruk ngak di dom urang ngak nong saong khik dahlah apui takre, pambak praong bruk siam gheih meng kan dak baoh kayau jeng thaik binguk siam gheih. Roya thun ini oh lac parang iek pataom tame ralo janih baoh kayau bingi di gah Meraong negar daok yaih khan rilo pandap OCOP di dom bhum palei dalam negar.
Dom harei tapa, di tỉnh Tien Giang rah tabiak rilo mbang hajan praong gam gam ngak baoh panat saong durian laik yaom. Urak ini, urang blei durian Ri6, janih 1 yaom meng 25 - 45 ribau dong sa kilo. Baoh durian gaok hajan ralo rilo nyu pran khang yau nan ye oh pablei tabiak negar langiu hu ba tal laik yaom biar. Panat saong durian lac dua janih phun hu taneh pala rilo saong brei ralo baoh abih di tinh Tien Giang ngan haong labaih 40.000 ha. Yau nan ye, dua janih baoh panat saong durian laik yaom, po bein gaok rilo kan kandah.
Pambuak tal bala ngak 1 urang metai di labik rivang ma-in Bàu Trắng, UBND huyen Bac Binh, tinh Binh Thuan brei padeih dom bruk peih radaih oto, radaih moto pajan cuah tal tuk hu sarak tacei pato, ngak tui dom harak gal saong ginup bruk ngak mbang tui njauk hukum. Labik rivang ma-in Bau Trang hu Mentri Ilamo, The thao saong Yulit dak angan Labik rivang main pakat Negar thun 2019. Ngan haong labik gheih mekre yau daok tamo, dalam dom thun tapa Bau Trang hu jeng labik rivang di ralo tuai damuai dalam saong langiu negar.
Sa bruk pasang iek taong abih bruk salamat ka urang ngak hu dom jabat chuc nang di Indonesia peih ngak hadei tuk glut jaleih lubang patau di bhum Cirebon, Tây Java. Kuhria tal tukvak ini, hu 17 urang metai, 6 urang karei njauk rambuac, 8 urang daok lahik. Rajaei tinh Tay Java khan lac patui veik bruk pacang mek patau, mbuan ngak jhak tal alam moi truong saong mbuan rah tabiak bala ka urang ngak bruk ini.
Hang AstraZeneca ba khaw tin tame ka bruk jru ruak ung thu tasau Camizestrant ngan haong bruk taong yaom lac jalan ngak birau. Khaw tin di jru Anh - Thụy Điển hu brei thau, brei mboh jru daok hu ngak iek tukvak puac abih brei mboh bruk trun hu meteh khoi u tamuh atau ngak metai ka urang ruak ung thu tasau. Dom urang caong khin bruk roh duah nan meda peih tabiak jalan taong ruak birau ka dom urang ruak ung thu mboh ralo ini.
Dom sang bac, abih di nyu lac sang bac langiu karja, di Thái Lan brei saluh tapa bac online dalam tuk rilo urang ruak COVID-19 di Thai Lan tagok ralo. Langiu di nan, rilo sang bac di negar ini hu peih bruk pruh jru pametai anek ruak di taong abih bilik bac, ndap nda ka anek saih, sinh vien. Meng bilan 1 tal kreh bilan 5, Thái Lan hu labaih 187.000 mbang njom saong 46 urang metai kayua COVID-19. Mentri Y te cong cong Thai Lan jeng hu peih bruk iek ruak online saong brei jru oh hu taom gaok tapak./.
Viết bình luận