Tui Akaok Mentri Noi vu, mbiah tal ini, Rajaei hu brei lagaih, sarak ka 23.000 urang jakar, cong chuc, vien chuc padeih bruk njauk tui sarak ramik jabat karja dalam tukvak 1. Yam tame dalam sa banah tukvak 2, meng ini tal puac thun brei daok labaih 90.000 urang jakar, cong chuc, vien chuc brei hu langyah. Mentri Noi vu hu ba tagok Rajaei sarak salih ka Sarak 29 piah ngak jalan patakik urang ngak bruk karja pagam haong bruk pasiam veik saong paglaong ilamo urang jakar cong chuc, vien chuc, jeng yau brei sarak lagaih ngan haong urang jakar.

UBND TPHCM tacei ba jalan ka dom so, dom ban, dom gah UB bhap bini quan, huyen saong Ban Thu Duc pambuak bruk daong urang jakar, kong chuc, vien chuc, urang padeih bruk hadei ramik pagam jabat, don vi karja. Dalam nan, Akok UBND TPHCM caong khin dom doanh nghiep Karja, peih bruk ngak kinh te, yaok kuhria bruk palih ruah. So Noi vu dang tabiak ngak bruk, pambuak haong dom jabat yaok kuhria, tacei pato saong pambuak bruk, duah bruk ngak.

Hoi dong Bhap bini tinh Ninh Thuan tapa sarak rabha labaih 105 ty dong ngak danak dak jalan ngak pakat negar patagok kinh te - xa hoi bhum mikva urang bangsa takik saong bhum ceik thun 2025. Phun jien ini hu rabha ka dom so, dom gah saong 6 huyen piah peih ngak dom danak dak: patagok bruk ngak nong, ngak glai karo kajap pagam haong chuoi yaom kaom; buh jien tame ka co so ha tang njauk ka hu piah duh ka bruk ngak mbang saong raidiuk; paglaong gah pato megru, sangka prein yava rahra, jhul tagok bruk likei kamei samu gauk, daong ka kapul urang bangsa takik, pathau khan saong pasang iek bruk ngak danak dak.

Mbiah tal tukvak ini,  urang ngak nong tinh Hau Giang  yuak hu labaih 200 ha padai He thu aval, yuak hu labaih 6 tan sa hecta, biar jang labaih 17 tạ sa hecta dut saong bilan ini thun dahlau. Hadei tuk yuak blaoh, padai tathak  hu urang blei  di hamu  yaom meng 6.300 - 6.500 dong sa kilo. Yaom nan trun meng 800 - 1.100  dong sa kilo dut saong tukvak ini thun dahlau.

Di tinh Long An, kayua bruk oh caik hatai caga dalam bruk pacang caga jit ruak nan jit tả pabui chau Phi tamuh pambak praong gilac. Bruk pablei nduac pabui ruak jeng daok rah tabiak, urang raong glang sit, oh ngak tui bruk karo salamat sinh hoc…Gah ngak nong pachreih, caga jit, urang raong glang brei ngak tui 2 asal kadha: Karo salamat sinh hoc taong abih saong caga abih. Meng akaok thun tal ini, dalam tinh Long An rah tabiak 18 labik tamuh jit haong labaih 710 drei pabui njauk pametai lahik.

Indonesia daok ba tabiak bruk pajeng ba dom drei te giac Java tal Labik roh duah saong iek glang tê giác Java (JRSCA) yau sa binah di danak dak pabam pajaih sa dalam dom janih athur daok biak takik di dunya ini. Hu dom bruk yau brei mboh trun takik hu rilo janih karei dalam dom drei tê giác Java di glai glo. Yau nan ye, bruk pajeng te giac ini tal JRSCA meda daong pacang caga sa but pajaih haong gauk saong pakhang bruk pasiam veik di kapol te giac.

Labik khik ramik kra dhen Tacugama daok dalam glai nhiet doi jaik ban ine Freetown di Sierra Leone anak meta brei kareik pambang. Ini lac labik daok karo salamat ka dom drei kra dhen hu daong di dalam negar, min bruk meblah pandar taneh suan hukum daok ngak kan kandah tal labik khik ramik ini. Bruk kareik labik khik ramik Tacugama jeng dui patui bruk Sierra Leone lahik jien mek tame meng bruk jirah rivang dalam tuk dom bruk rik daong jien ka negar ini daok gaok kan kandah.

Urang Islam di Ai Cập jeng yau rilo taneh ia Ả rập daok cang tukvak tame Roya Al-Adha meng harei 6 bilan 6 saong dui atah  tal harei 9 bilan 6. Sa dalam dom adat siam gheih abih dalam dom harei akok meti di Al-Adha lac panuac da-a sapahyang hadei tuk ia harei tame ceik, hadei di nan sik ngak rilo athur, rivang baoh sang, but pajaih puk paga saong suak yakat/ khat ka urang kan kathaot. Dalam dom harei jaik tal Roya, bhap bini ramik sang danaok, blei kaya mbang, ndap ma-in, khan ao birau ka uranaih, abih di nyu lac blei athur raong piah ngak rilo ngak kuban./.