Labaih  20.000 pok jien bac di danak dak “kayua adei pachreih bac” yaom abih tih labaih 40 tỷ đồng hu Viettel alin hadiah ka dom adei anek saih dalam thun bac bahrau  2021-2022. Ni lac thun ka 8 danak dak  “Kayua adei pachreih bac” di Viettel hu peih ngak song lac thun camereip yaom pok jien bac di yaok adei anek saih tagok jang 2 mbang dut song dom thun dahlau deih, yaok pok jien bac hu yaom  2 triệu đồng. Tanut palih ruah dom adei anek saih taduan hu pok jien lac boh sang hu rai duik biak kan kandah, min hu hatai kham merat yam tagok dalam rai duik, pasram megru song ka oh taduan hu dong meng dom danak dak pachreh bac halei . Hadei di 7 thun peih ngak, danak dak hu jao labaih 170.000 pok jien bac ka dom adei anek saih kan kathaot  hu rai duik kan kandah dalam negar, yaom abih tih labaih  170 tỷ đồng.

Tui yaok pataom di Vụ pato pakai Đại học (Mintri Pato Megru), tamat tukvak ramik veik hatai caong tut angan pilih ruah meng điểm pakacah tamat THPT thun 2021, hu 358.0650 anek saih pakacah hu ramik veik hatai caong. Tui nan, hadei di tuk ramik veik, hu 85.000 hatai caong tagok jang duk haong dom hatai caong dahlau di nan tuk anek saih pakacah ngak harak gar tut angan pakacah bac tamat. Yau nan, rilo anek saih langiu di bruk salih hatai caong, daok tut angan pabak hatai caong piah hu rilo jalan tame đại học. Dom sang bac urak ini daok peih bruk pilh ruah meng harei 13 tal harei 15-9. Dom sang bac brei thau điểm chuẩn dalam harei 16/9.

Tui pasang iek di gah pato megru, di ban raya HCM dok  5,3% anek saih di dom pakat bac oh  ginup  pandap piah bac online. Piah khik  ka tong abih anek saih  di ban raya HCM hu bac online, Sở Pato megru ban raya HCM hu panuac ieu dong brei 15.000 thiết bị, ieu pataom  40.000 thiết bị pandar bloh, 30.000 thiết bị pablei bayar góp yaom lap piah dong ka anek saih dalam tuk vak bac daa. Tui panuac ieu nan di Sở pato megru  ban raya HCM, Ubbhap bini ban raya  HCM hu sarak dong jien laba lagaih song amaik ame khin blei trả góp, tuk vak dong  yaom laba oh tapa  24 bilan.

Di tỉnh Sóc Trăng, bruk pato akhar haroh saong sap ndom panuac puac di urang bangsa tuk halei jeng hu gah pato megru sangka tacei pato. Urak ini dalam tỉnh hu 506 sang bac meng mầm non tal THPT, dalam nan hu 146 sang bac hu pato akhar haroh Khmer, hu 1.586 tal bac saong hu labaih 42.000 anek saih daok tui bac (kuhria gam dom sang bac PT bangsa gam bac gam daok). Gam haong nan, Sở Pato Megru jeng brei khik dom mbang pakacah piah pachreih bruk bac akhar haroh Khmer dak harei dak tagok khang kajap saong hu kein laba, yau bruk peih pakacah vak akhar siam janih sap Khmer pakat tỉnh, tapa nan hu daong ngak brei pambak tabiak bruk bac akhar haroh Khmer dalam dom sang bac phổ thông.

Pambuak tal bruk dom nghệ sĩ dang tabiak ieu rik pataom  song ngak pahla ba tal rilo bruk kamlah gauk dalam bhap bini, ngak ka rilo menuac cong khin jabat Công an tame duah thau piah ngak brei cambaih laih, Trung tướng Tô Ân Xô, Chánh Văn phòng, urang brei panuac di mintri Công an, ndom lac, bruk menuac urang, kapul nyaom dang tabiak ieu rik dong mik va yam tapa kan kandah lac sa bruk hu makna biak siam. Karja pachreih tui song pambuan palagaih ka bruk ni. Min, dom menuac urang, kapul nyaom dang tabiak ieu rik dong brei ngak njauk tui hukum. Bruk jak ba, taduan mek, parabha, pandar jien, pandap, brei peih ngak njauk tuk, njauk jalan, njauk menuac urang, tantu, cambaih laih. Hukum oh brei ngak dom bruk ngak pahla piah duah laba ka drei eng. Pakauk bruk bleik saleik, pathau khan suan piah blah mek, pandar cai suan hukum jien, pandap di kapul nyaom menuac urang rik dong.

Trợ lý Akaok Mintri Quốc phòng Australia Andrew Hastie ndom lac dom gilai lin tasik taneh ia ini oh ngak tui panuac di Bắc Kinh ka bruk lac taong abih dom gilai tame dom bhum tasik di Biển Đông brei khan ka karja Trung Quốc thau bruk hu mbaok di drei. Ong Hastie lac: “Dom gilai haong kapal haok di bol bala Australia (ADF) daok ngak tui dom quyền tự do nao mai angaok tasik saong angaok langik tui hukum dunya di Biển Đông saong kol dahlak pachreih tui dom taneh ia karei ngak dreih yau nan”

Singapore dok ngak iek  robot nao khik iek, patui ngak hukum di dom ban hu dui atah dalam 3 adit. Dalam tuk luac harei melam, robot  nyu  tự động cih vak veik dom bruk ngak suan yau jnuk pakao hala, pataok radaih oh njauk labik; pablei salih suan hukum saong oh ngak njauk bruk pacang caga jit Covid-19,  bloh ba khaw tin thaot binguk ka jabat chức năng.

Lào daok caga ngak tượng Phật glaong 100m di Đặc khu Kinh tế BungThatLuang di ban ine Viêng-chăn. Bruk padang ngak tượng Phật Thích ca piah yaih khan ilamu, raidiuk, sajarah dak padang saong cakrok Đạo Phật di Lào, bo tapa nan daok caong lac ngak jeng prein dui pachreih yaok triệu tuai bhum Đông Nam Á saong angaok dunya nao tal Lào, rik daong jhul patagok bruk du lịch di taneh ia ini./.

Urang lang: H.Pha & M.Phuong – 11/9/2021