Harei harei, mboh di anak meta rilo menuac kan kandah dalam bhap bini, sa-ai Sity Hara tuk halei jeng suh sah dalam hatai saong sahneng lac “Anit ranam brei nao, lac haniem phul daok miat”, sa-ai nao taom gaok, ndom biai haong dom urang kaya meda, hu jien padai piah daong ka dom urang kan kandah, menuac oh patuah dalam raidiuk. Rilo thun tapa, dahlau meng tuk yam tame thun bac bahrau, sa-ai Sity Hara haong dom urang dalam mBan lambaok urang Islam tỉnh An Giang hu jak ba, ieu pataom jien padai, brei yaok ratuh pok jien bac piah daong prein ka dom adei anek saih, SV nao bac da-a.

Thun 2019, sa-ai Sity Hara hu padang Kalup kapul “Urang kumei Cam An Giang ba gauk tabiak truh kan kathaot”, dui pachreih hu jaik 1.000 urang di 9 sang megik daok di 5 xã dalam tỉnh An Giang hu mbaok tame. Meng tuk Kalup kapul tabiak rai, dom hội viên oh lac daong ba gauk patagok bruk ngak mbang di sang, bo bruk hu mbaok tame kalup kapul daok hu daong ka dom adei sa-ai kumei khang hatai jia saong rik daong tame bruk patagok di puk paga, di rahra. Sa-ai Sity Hara khan lac: “Ngak bruk pahla brei tabiak meng hatung hatai. Piah ngak hu yau nan, drei brei mboh hu bruk kan kandah di urang karei. Kayua yau nan ye hulin caong rik daong prein yava di drei piah daong ka mikva. Hulin haong mBan đại diện tuk halei jeng kham merat ngak meng bruk sit di abih piah daong ka mikva puk palei di drei, abih di nyu lac dom sang kan, sang jaik kan.”

Dom thun tapa, sa-ai Sity Hara hu jak ba, ieu pataom jien ndo meng dom kapul nyaom, menuac urang piah padang ngak sang jum pataom, sang anit ranam, daong ka urang kan kathaot, urang kan kandah ka sang daok, yaok baoh sang yaom 80 triệu đồng. Hu daok dalam baoh sang praong, siam kayua mBan lambaok urang Islam tỉnh An Giang alin hadiah brei, amuk A Sé daok di ấp Phũm Xoài, xã Châu Phong, ban sit Tân Châu khan lac, meng ini sang amuk tok kuhria ngak mbang, raong dom anek mbang bac. Bau tal angan sa-ai Sity Hara, oh lac ta-eng amuk A Sé, bo mikva urang Cam bhian ieu haong angan anit ranam lac Mari.

Thun 2021, tapa dom urang krein dalam taneh ia saong langiu negar, sa-ai Sity Hara hu jak ba dom kapul nyaom, menuac urang rik daong ka bruk ngak pahla hu labaih 7 tỷ đồng. Daok kuhria meng akaok thun tal ini, sa-ai hu jak ba padang ngak 8 baoh sang jum pataom, sang anit ranam. Ong Hj JacKy, Akaok mBan lambaok urang Islam tỉnh An Giang brei thau.  “Kamuan Sity Hara nyu abih hatai jai haong mikva puk palei, tuk halei jeng abih drei haong puk paga, tuk halei jerng nao duah jien piah gam haong Ban đại diện ngak siam dom sarak, jalan ngak di Ban đại diện ba tabiak. Anak tal, Ban đại diện Cộng đồng Hồi giáo tỉnh An Giang haong kamuan Sity Hara daok ba tangin tame haong karja ngak siam bruk daong ka urang kan kathaot, padang sang anit ranam brei ka mikva hu labik mbang, labik daok siam mekre”.

Meda lac, dom bruk ngak, dom rik daong di sa-ai Sity Hara hu ba mai kein laba ka bruk an sinh xã hội di mikva urang Cam, jeng ye di tỉnh An Giang. Dom bruk ngak di sa-ai nyu pamedeih tagok hatai anit ranam gauk di anek menuac, truac hadah tagok dalah pui ngak pahla di yaok urang, rik daong siam dalam bruk peih ngak sarak an sinh xã hội, tui bruk patrun kathaot di puk palei./.

Urang lang: Hani Pha – 31/10