Meng langik tasik siam laghaih, bhum taneh ini lac pasak di dom janih phun mbang baoh, phun công nghiệp, phun glai, phun jru chất lượng glaong, sản lượng prong yau cà phê, amariak kalu, bơ, durian, cao su, bei plom, kayau, sâm Ngọc Linh… 

Ilamu công nghệ hu labik dang prong, pambuak pagam dom pren khang piah ka dom tỉnh Tây Nguyên cak rok patagok khang kajap, jeng bhum ngak mbang kinh tế prong di taneh aia. Kayua yau nan ye, bruk jhul khang roh duah, pandar ilamu công nghệ tame bruk ngak mbang daok hu peih ngak siam di dom bruk ngak mbang  kinh tế grauk dom tỉnh Tây Nguyên. 

Di Đơn Dương, huyện hu mblang taneh pala njam prong abih di tỉnh Lâm Đồng ngan haong taneh pala yaok thun abih tih labaih 27.000 héc ta. Peih bruk salih janih phun pala, Đơn Dương kham merat buh jien tame ngak brei cak rok patagok bruk ngak nong công nghệ glaong. Dalam huyện hu labaih 10.000 héc ta njam patam bingu hu ngak tui jalan công nghệ glaong. Hu dom bruk ngak njam hữu cơ tui jalan thong minh hu bai jien mek tame meng 1 tỉ 2 tal 1 tỉ meteh 1 thun. 

Ong Huỳnh Sơn, Yam ndok HTX Sơn Uyên daok ngak tabiak, pablei salih di huyện Đơn Dương, brei thau, doanh nghiệp di ong mek hu kein laba biak rilo  meng angan je “Đà Lạt – Pataom veik meng taneh siam”: “Meng tuk taduan mek hu angan Đà Lạt-Pataom veik meng taneh siam” ye pablei njam hu siam jang, bo angan je jeng siam. Tuk angan je siam bloh manuac urang mong mboh hu. Dom labik halei bo taduan mek hu angan nan, lac urang ngak biak siam”.

Peih tabiak ngak meng sang kareih mbuan mbiah, meng thun 2004 ngan haong dom pandap panda mbuan mbiah. Tal harei ini, huyện Đức Trọng hu jaik 10.000 ha ngak kaya nong tui jalan pandar công nghệ glaong. Jien mek tame hu glaong jang meng 2 mbang meteh tal 3 mbang meteh bruk ngak taniak kuhria rah tapa dalam huyện. Meng chất lượng kaya nong dak harei dak glaong hu daong ka dom pandap panda pabak hu hatai caong khin biak glaong pabak ka bruk pablei tabiak negar langiu. Amuk Phạm Thị Thanh Thủy, Phaok Akaok UBND huyện Đức Trọng brei thau:  “Pandar khang công nghệ glaong tame  bruk ngak nong jeng lac sa dalam dom bruk ngak njauk brei ngak dahlau di puk palei dalam tukvak anak tal. Kayua yau nan ye, puk palei hu ba tabiak dom jalan ngak. Ka sa lac daok brei buh jien tame ngak khang gah công nghệ thong tin tame dom janih pandap prong khang di puk palei. Kadua lac daok daong piah dak padang dom chuỗi pambuak bruk ngak tabiak saong pablei tabiak pandap panda tapa dom jalan lac doanh nghiệp hợp tác xã, tổ pambuak bruk”. 

Meng thun 2018, Đức Trọng hu ba công nghệ 4.0 IoT tame ngak nong  kong nghệ glaong ba mai jak kein laba cambaih laih saong dak harei dak cak rok patagok, peih prong, dui pachreih hu rilo urang buh jien tame ngak. Ong Nguyễn Như Thủy, po cơ sở Thủy Fam, huyện Đức Trọng, tỉnh Lâm Đồng khan lac: “Dalam tuk ngak công nghệ glaong ye dak harei drei dak pasiam tagok. Yau urak ini nyu patagok ilamu công nghệ Iot pruh aia tui điện toán đám mây, drei daok atah atau jaik ye drei jeng meda peih tui hatai caong khin di drei ka hadom aia pruh. Doanh nghiệp, blei pandap piah blei tabiak negar langiu jeng caong brei hu sa blah ba-ar chứng nhận Vietgap, gam haong nan drei daok hu sa blah ba-ar chứng nhận “Đà Lạt-pataom veik meng taneh siam”, dom janih pandap paglaong yaom”.

Dom bruk ngak nong pandar công nghệ glaong hu peih tabiak jalan ngak kaya meda brei ka yaok ribau urang nong di dua huyện Đức Trọng saong Đơn Dương. Cak rok patagok bruk ngak nong công nghệ glaong, lac jalan oh salih karei hu, rik daong paglaong yaom gah ngak nong dalam tukvak mbeik drei yam tame dunya./.