Langiu dom alat ragam taong, yuh, urang Cam daok hu alat ragam taih. Kanhi di urang Cam ngak meng abong kra nduh meh, hu pagam kayau lapih ngak mbaok. Angaok abong kra nduh hu pagam kreim katin, praong sumu takai ine, atah labaih 0,65m, hu dua tangi pagam di talei saong katung meng gai kreim hu kak meng bilau iku saik mbeik kavong yau siuk. Kanhi nan lac alat ragam biak gheih mekre di urang Cam saong biak kan pandar. Kanhi hu dua janih, ka sa lac kanhi ndam, ba palao urang metai. Ka dua lac Kanhi pandar dalam rija roya angaok bimong, kalan iew lac “abap”, tok ong Kadhar uak Kanhi saong daoh, pok meyaom dom po yang.

  Tui NNƯT Thành Văn Lũy, daok di palei Banya -Bỉnh Nghĩa, xã Bắc Sơn, huyện Thuận Bắc, tỉnh Ninh Thuận lac ong Kadhar, dua kanhi  nan hu dua sap: kò saong kí. Tuk uak, daok la, caik di pha, tangin hanuk tung siuk, tangin ieu mbat talei. Tui adat tuk pachah yawa kanhi brei dui 3 sap kò, 3 sap kí brei thau abih gauk angaok dunya hu meng am duong. Nghệ nhân ưu tú Thành Văn Lũy daoh Damnei Cei Thun haong uaw Kanhi khan brei kol drei thau ka hatai sahneng di urang Cam dalam bruk pandar Kanhi.