Pathau khan pacang caga Covid-19
Meng meteh bilan ini mai, yaok harei dua var page saong biar harei, sap meng baoh loa di ong Đỗ Quang Cảm hu jeng bhian randap saong mikva bangsa Jarai, Bana dalam xã Ia Pết, huyện Đăk Đoa. Ong bui sambai khan lac, Tết blaoh, ong blei sa baoh loa piah sang drei daoh karaoke tuk lahe, min birau daoh hu dua klau mbang ye salih tapa ngak bruk karei. Lac urang dang akaok Mặt trận negar xã Ia Pết, ong likau băng pathau khan ka bruk pacang caga jit Covid-19 meng klau sap Kinh, Ba Na, Jrai, hu ba tame phone pan tangin, yaok harei baoh loa kẹo kéo di sang ong hu ba nao tal 8 puk palei peih brei ka mikva pang.
Sap peih tabiak meng loa yaok harei hu rik ka daong mikva dom bangsa daok di xã Ia Pết thau cambaih bruk “ pacang jit yau pacang khamang” di Karja. Rilo ndam lakhah dalam xã brei padeih, dom ndam metai oh daok bruk pataom rilo manuac mbang menyum rilo harei yau dahlau diah. Ong Đỗ Quang Cảm kuhria mboh dalam sa bilan jaik ini, dalam xã hu 57 urang meng labik karei mai jeng hu nao tal jabat karja brei thau bruk y tế, eng drei daok dalam sang 14 harei tui quy định:“Bhap bini bangsa takik hu urang taha oh thau akhar haroh, MTTQ di xã khol dahlak pandar loa kẹo kéo peih băng tui 3 sap, tal palei halei peih sap palei nan mboh bruk pathau khan hu lagiah jang. Bhap bini urak ini thau cuk siuk pacang pabah idung, daok anak sang jeng cuk, rao tangin meng sabon yaok harei, urang daok atah mai brei khan y tế.”
Daok di palei Piơm, ban sit Đăk Đoa, mikva agam kitô di giáo xứ Phao lô H’neng hu salih birau bruk ngak adat di agama. Dahlau di tuk hu bruk brei daok atah gauk, takik taom gaok gauk, mikva hu cha xứ pathau khan meng thaot binguk ka bruk mbuan pambak ruak saong mbuan metai kayua jit Covid-19. Urak ini, salih ka bruk pataom gauk tame nhà thờ page harei sanecar saong harei adit yaok adit ye mikva eng drei bac kinh di sang. Bruk ngak di giáo xứ hu khan tal mikva tapa mban ngak bruk agama. Ong Lick daok di pelei Piơm, ban sit Đăk Đoa brei thau, meng bruk tacei pato di linh mục, sang hlei ngak adat cambat di sang nan, jeng khik hu bruk ginreih saong hatai jia tame agama: “Linh mục langyah ka bruk pacang jit corona, peih phim hu asar kadha yau pathau khan di urang jakar. Urak ini, khol dahlak oh daok nao lễ tra, oh pataom ralo manuac, khik rup drei khik ka urang karei. Ngak yau nan lac biak siam, jalan ngak njauk. Ngan saong giáo xứ jeng ngak tui biak siam.”
“Pacang jit yau pacang khamang” - bruk pacang jit Covid-19 di huyen Đăk Đoa hu abih menuac sia pachreih tui, oh lac urang Kinh atau urang bangsa takik, oh lac agama hlei. Harak pathau khan pacang, caga jit lang tui 3 sap Kinh, Ba Na, Jrai hu ba tal sang, ba tagok angaok dom blah mạng xa hoi yau zalo, facebook di dom kapol nyaom. Mặt trận negar huyện pambuak saong dom halau janeng, urang duh ka agama, taha palei, urang hu angan je gam gam khan brei thau, tacei pato jalan pacang caga jit tal yaok palei, yaok baoh sang. Gam haong nan, dom kapol nyaom di palei hu brei jaik 6.000 blah khẩu trang, 500 klaik sabon saong 300 klaok ia jru pametai anek ruak brei ka mikva dom bangsa Ba Na saong Jrai.
Thau ka bruk pacang caga jit Covid-19, mikva ngak tui siam bruk daok atah di gauk, halan hatian brei padeih jaik 20 ndam lakhah, abih hatai rik jien, drap ar tame daong ka urang pacang jit. Ong Đinh Ơng, Akok Ủy ban Mặt trận Negar Việt Nam huyện Đăk Đoa brei thau, bhap bini dom bangsa, dom agama di Đăk Đoa hu jum pataom pambuak gauk piah pacang caga jit:“Bruk Jum pataom dalam bhap bini biak glaong, oh lac tui agama atau oh tui agama. Mboh di anak meta, khol drei pamedeih tagok hu hatai ranam bangsa, bruk jum pataom gauk pacang jit.”
Jit Covid-19 daok rah tabiak dalam negar drei. Thau pamedeih tagok bruk jum pataom dom bangsa, agama yau di huyện Đăk Đoa, Gia Lai, jia lac abih manuac sia meda ba gauk pacang hu bruk njaom mbak di virus SARS-CoV-2./.
Urang lang: Aí Nghiêm -17/4/2020
Viết bình luận