Mơ̆ng đưm đă dih, êpul êya mnuih djuê ana Êđê mâo klei thâo săng klă hlăm bruă răng mgang wăl hdĭp mda, hlăm anăn mâo bruă răng mgang dliê jing mnơ̆ng hlăm mngăt leh anăn phŭn agha mơ̆ng mnuih Êđê. Hluê si klei bhiăn djuê ana Êđê čuăn kơ bruă răng mgang dliê akŏ êa, răng mgang kyâo djiêo hnoh êa, răng mgang dliê ti pin êa, răng mgang kyâo ti wăl dliê hrông, răng mgang dliê ti wăl dliê mrâo. Răng mgang dliê jing răng mgang hnoh êa kơ ƀuôn sang. mta 231 mơ̆ng klei bhiăn djuê ana Êđê mâo klei čuăn: “Lăn ala, hnoh êa, kyâo dliê jing bŭng, jing êi, jing rŏng mơ̆ng aê aduôn. Aê aduôn jing pô răng mgang ƀăng k’ưp, dlăng kriê dliê, kriê dlăng ana K’tơ̆ng, ana Kdjar, hlei pô ksĭn mmiă dliê leh anăn lăn dliê mơ̆ng pô mkăn srăng ba phat kđi”. Mphŭn dô dih mnuih Êđê tơdah duah lăn rŭ mjing ƀuôn sang, tal êlâo hĭn srăng nao duah dŭm anôk dliê myang amâodah dliê akŏ êa jing krơ̆ng kơ hnoh êa:

“Hnoh êa jing yuôm bhăn sơnăk, hnoh êa msĕ si êa ksâo amĭ, ana kyâo mtâo yang brei kơ drei drei srăng răng mgang, amâo mâo brei drei bi rai, drei srăng bi răng mgang, anei jing ana ktê, ana săn leh anăn lu ana kyâo yuôm mkăn, đưm dih êlâo kơ čiăng druôm kyâo srăng akâo kơ yang êlâo”.

Hŏng mnuih Êđê, adôk dliê jing adôk klei hdĭp, luič dliê srăng luč jih jang kyua dhar kreh dliê jiă kma hlăm ai tiê klei mĭn mơ̆ng mnuih Êđê. Mơ̆ng hlăk mrâo k’kiêng, phung anak ĭ mưng leh mơ̆ng ênai kdrăp giêng mrai amĭ mơ̆ng ana kyâo dliê, bung gui dưi hrĭ mñam mơ̆ng mnơ̆ng dhơ̆ng hlăm dliê, truh kơ wĭt hŏng aduôn aê atâo tiêt jing dŭm kyâo sang msat ăt mơ̆ng kyâo dliê hŏng boh tŭ ba wĭt anak mnuih kơ ƀruih lăn kyua dliê jing klei hlŏng lar.

Y- Đhiăm Ayun (Ama Nghiêm) ti ƀuôn Tu, să Ea Tul, kdriêk Čư̆ Mgar, čar Dak Lak brei thâo, mnuih Êđê hdĭp mbĭt hŏng dliê, kyuanăn dliê mâo nanao hlăm dŭm klei khan Êđê msĕ si Dam Săn, Dam Yi…leh anăn hlăm dŭm klei mmuñ ênhiang mtă mtăn kơ anak čô. Čiăng mkra mjing dŭm kdrăp pĕ tông ăt nao duah mnơ̆ng hlăm dliê.

  “Klei mmuñ Eirei mơ̆ng mnuih Êđê aduôn aê kreh mtô êlâo dih, mâo dŭm klei mmuñ kơ ƀuôn sang, klei khăp êkei mniê amâodah dŭm akŏ mkăn, mâo nanao dŭm ênhiang mmuñ mă rup bi hmô mơ̆ng čư̆ dliê jing lu êdi”.

Dliê hŏng mnuih Êđê amâodjŏ knŏng mnơ̆ng dhơ̆ng, ngăn dŏ, ƀiădah dliê lŏ jing mnơ̆ng hlăm mngăt. Grăp knhuah dhar kreh mơ̆ng mnuih Êđê djŏ tuôm hŏng dliê, mơ̆ng sang krum dlông truh kơ ênai čĭng kwang.  Y- Om Ksor (kreh iêo Ama H’Lim), khua dlăng bruă Đảng ƀuôn Ky, ƀuôn hgŭm Thành Nhất, ƀuôn prŏng Ƀuôn Ama Thuôt brei thâo, êlâo kơ druôm sa bĕ kyâo dliê čiăng wĭt yua, diñu kreh ngă yang čiăng akâo kơ yang dliê leh anăn dlăng dlăng kyâo. Anei jing sa klei đăo knang mâo boh tŭ dưn hlăm mngăt, bi êdah kơ klei mpŭ hŏng dliê kyâo mơ̆ng mnuih djuê ana Êđê.

 “Dŭm klei mmuñ, klei duê kơ klei răng mgang dliê jing jăk êdi, Đưm dih grăp čô hluê ngă sơăi. Phung aduôn aê đưm lač klei răng mgang dliê kyâo jing yuôm bhăn êdi. Kyuanăn, êlâo kơ druôm sa bĕ kyâo, ăt ngă yang êlâo, bi êdah klei mpŭ hŏng dliê kmrơ̆ng.”

Adôk dliê jing wăl dhar kreh mơ̆ng mnuih Êđê ăt srăng adôk leh anăn đĭ kyar. Tơdah luč dliê, dhar kreh êbâo thŭn mơ̆ng mnuih Êđê knŏng adôk mă hlăm klei yăl dliê kyua ñu srăng luč ti anăp klei đĭ kyar mơ̆ng dŭm klei mrâo. Čiăng êdi klei hrăm mbĭt mơ̆ng jih jang êpul êya yang ƀuôn čiăng kơ dhar kreh mnuih djuê ana Êđê, dhar kreh dliê, adôk nanao truh kơ ênuk êdei anăp./.