Hlăm dŭm thŭn giăm anei, phung tue jĕ giăm taih kbưi truh hŏng ƀuôn prŏng Pleiku čiăng ksiêm dlăng kơ dhar kreh, mnơ̆ng ƀơ̆ng mnuih ƀuôn sang kơ anăn ƀrư̆ hrue ƀrư̆ lu. Thŭn 2019, đảng viên Rơ Mah Hiu ti ƀuôn Tiêng 1, să Tân Sơn, ɃP. Pleiku jhŏng pŏk leh sang mkra mnơ̆ng ƀơ̆ng huă jiă knhuah Jrai hlăm wăl gŏ sang pô. Hlăm anăn mâo sang krum djuê ana Jarai, mâo dăp ênŭm čing čhar, hgơr, bŭng piêo, rup krah... Jing jih jang mnơ̆ng juăt mưng hŏng mnuih djuê ana Jrai. Mkra dŭm mnơ̆ng ƀơ̆ng mơ̆ng dliê, mâo mnga tei hŭng, hla hbei ƀlang... Mbĭt hŏng kan krô, mnŭ phưi, kan êa hnoh, mâo mnuih ƀuôn sang Jrai hlăm ƀuôn rông lehanăn pla mjing, lehanăn sač yao. Khădah mnơ̆ng ƀơ̆ng mkra mjing ƀuh jing hơăi mang, ƀiădah mâo mnâo mnañ mdhư̆ mdhưi, iêo jak leh phung tue jĕ giăm lehanăn taih kbưi lông hriê ƀơ̆ng knư̆ hrue knư̆ jing lu. Hlăm klei pŏk sang huă ƀơ̆ng anăn, mâo êpul bruă Đảng ƀuôn Tiêng 1, đảng viên Rơ Mah Hiu dưi thâo săng kơ hdră êlan kơ bruă mđĭ kyar hiu čhưn ênguê, lehanăn kriê pioh knhuah gru dhar kreh. Mbĭt anăn, ñu ăt hgŭm djăp ênŭm hlăm klei mjuăt hriăm kơ bruă bi mdoh mnơ̆ng ƀơ̆ng huă, lehanăn hdră mkŏ mjing bruă čhưn ênguê hlăm yang ƀuôn. Nao djŏ hdră, sang huă ƀơ̆ng ñu ƀrư̆ hrue ƀrư̆ đĭ kyar, Hiu dưi mâo leh ênoh hrui wĭt hơĭt, lehanăn dưi đru mơh kơ mnuih riêng gah hlăm ƀuôn lŏ mâo prăk kăk thĕ thiăm:

 “Gŏ sang mâo klei mĭn pŏk anôk huă ƀơ̆ng čiăng lŏ mâo thiăm prăk yua kơ găp djuê, lehanăn mjing bruă knuă mă kơ mnuih riêng gah mbĭt. Tơdah mâo tuê čiăng hmư̆ tông čing, dlăng kdŏ čhuang, snăn iêo êpul tông čing lehanăn phung kdŏ čhuang hriê mdah. Pô tla prăk mưn kơ êpul tông čing lehanăn phung kdŏ čhuang, čăng kơ digơ̆ dưi ngă nanao bruă anei, lehanăn đru bi kriê pioh knhuah gru dhar kreh, mbĭt anăn mjing sa ênoh hrui wĭt kơ digơ̆ mơh”.

 Tân Sơn jing să krĭng nah êngao ƀuôn prŏng Pleiku. Ti anei mâo 5 boh ƀuôn. Hlăm anăn mâo 2 boh ƀuôn Tiêng 1 lehanăn Tiêng 2 lu jing mnuih djuê ana Jrai sơăi. Mơ̆ng thŭn 2016 truh kơ ară anei, kyua mâo hlue ngă hdră mtrŭn 06, dŭm boh ƀuôn mnuih ƀuôn sang djuê ƀiă ti să mâo leh mđing uêñ lŏ bi mrâo, mkra wĭt êlan klông, lehanăn rŭ mdơ̆ng sang bi kƀĭn ƀuôn. Mnuih ƀuôn sang mjuăt hriăm kơ bruă hiu čhưn ênguê yang ƀuôn, bi kriê pioh, lehanăn dưn yua dhar kreh čing čhar, bruă pơ̆k mñam djuê ana pô... Hlăm bruă lŏ hma pla mjing, mnuih ƀuôn sang bi dlăng kriê wiê ênăk kphê, lŏ mkra êlan nao kơ hma, rŭ mkra krĭng truăn kơ bruă pla mjing mnơ̆ng pioh čhĭ kơ ala tač êngao. Boh nik, 63 boh gŏ sang ƀun ƀin, giăm ƀun mâo đru leh hŏng ênoh jih jang truh 1,3 êklai prăk pioh mdơ̆ng mrâo kyua sang hđăp leh sô tĭ hluh ƀrôč, đru mnơ̆ng pla, mnơ̆ng rông pioh duh ƀơ̆ng. Ară anei, hlăm 350 gŏ sang mnuih djuê ana Jrai hlăm să Tân Sơn, ară anei knŏng adôk mă 3 gŏ sang ƀun, hrui wĭt kah knar grăp čô mnuih knhal jih thŭn 2023 jing 43 êklăk prăk. Mbĭt hŏng anăn, dŭm boh ƀuôn mâo leh sơăi êpul tông čing, êpul bruă pơ̆k mñam, lehanăn ta brei êlan kơ mnuih ƀuôn sang mâo klei mjĕ mgiăm, mtô bi hriăm knhuhah gru dhar kreh djuê ana Jrai. Rơ Châm Joi, đảng viên ƀuôn Tiêng 2, să Tân Sơn, ƀuôn prŏng Pleiku brei thâo:

 “Ară anei grăp boh sang mâo leh sơăi đang kphê, lăn ngă lŏ. Mnuih ƀuôn sang bŏ hŏng klei mơak. Ară anei knŭk kna ngă leh êlan, mtrŭt mjhar jih jang mnuih bi blei hră ênua bruă mdrao mgŭn mâo leh truh 95%”.

Phạm Văn Hiếu- Khua bruă Đảng să Tân Sơn, ƀuôn prŏng Pleiku brei thâo, mta kñăm mơ̆ng hdră mtrŭn 06 mơ̆ng êpul kiă kriê bruă Đảng ƀuôn prŏng Pleiku jing iêo jak mđĭ bi lar bruă duh mkra ala ƀuôn krĭng mnuih djuê ƀiă. Kyuanăn, hlăm dŭm thŭn êgao, bruă Đảng să lehanăn êpul bruă Đảng dŭm boh ƀuôn mâo leh klei kiă kriê, gĭt gai jih jang bruă kđi čar, hluê ngă dŭm hdră bi hmô hlăm klei duh mkra lehanăn hlue ngă dŭm hdră êlan djŏ guôp hŏng dŭm boh ƀuôn mnuih djuê ƀiă. Hlăm anăn, bruă Đảng, lehanăn bruă sang čư̆ êa bi mă bruă mbĭt hŏng mnuih ƀuôn sang bi mlih ana mnơ̆ng pla, mnơ̆ng rông, ba yua klei kreh knhâo hlăm klei duh ƀơ̆ng, kñăm mđĭ ênoh mâo hrui wĭt mơ̆ng mnuih ƀuôn sang, đru bi hrŏ ƀun hŏng klei kjăp:

  “Mơ̆ng leh mâo hdră mă bruă, lehanăn hdră mtrŭn mơ̆ng bruă Đảng čar, bruă Đảng ƀuôn prŏng, snăn klei hdĭp mda mnuih ƀuôn sang mâo leh klei bi mlih, ênoh gŏ êsei ƀun hrŏ nanao hlăm grăp thŭn. Lu gŏ êsei mâo leh knŭk kna, bruă mặt trận, mbĭt hŏng phung thâo bi đru, mjing leh klei găl bi mlih klei hdĭp mnuih ƀuôn sang”.

   Dŭm boh tŭ dưn ti să Tân Sơn, ƀuôn prŏng Pleiku, Gia Lai brei ƀuh, klei djă yua hdră mtrŭn mơ̆ng Đảng nao hlăm klei hdĭp, mjing leh boh tŭ dưn klă mngač, ngă bi mlih jih jang klei hdĭp mnuih ƀuôn sang, klei hdĭp digơ̆ đĭ nanao./.