Thŭn 2022, tui si klei čiăng mơ̆ng boh klei msĕ si ară anei, Bruă kƀĭn ala mâo ruah leh dŭm phung khua phŭn bruă, khua anôk bruă hlăm dŭm mta msĕ si: Bruă lŏ hma, bruă ngăn prăk; knơ̆ng prăk, êlan klông dŭ mdiăng, bruă rŭ mdơ̆ng, bruă ksiêm dlăng bruă knuă, bruă hâo hưn, lehanăn bruă ksiêm dlăng. Jih jang klei dleh dlan klei gun kpăk dŭm klei awăt êdu, lehanăn djăp mta klei adôk kƀah awăt hlăm bruă knŭk kna kiă kriê mâo nanao klei ksiêm dlăng hŏng klei klă, hlak mblang hŏng lu hdră êlan mâo hlăm klei êmuh, hlăm anôk bi kƀĭn bruă kƀĭn ala. Klei êmuh lehanăn wĭt lač klei êmuh mâo leh phung khua phŭn bruă, khua anôk bruă, dhar bruă bi mgăl truh hnơ̆ng čiăng bi mngač jih jang djăp mta bruă hŏng klei klă mngač kñăm dưi mâo hdră mghaih msir hŏng klei djŏ. Pô bi ala Trần Văn Lâm, hlăm êpul bi ala bruă kƀĭn ala čar Bắc Giang brei thâo:  Jih jang klei êmuh ƀrư̆ hrue djŏ hŏng hŏng mta kñăm. Kdrêč phung khua phŭn bruă lehanăn knŭk kna wĭt lač amâo lŏ mâo ôh klei bi dêč, bi ñĕ amâo mâo blŭ mdiêr ôh”. 

Klei tŭ jing hlăm grăp blư̆ êmuh, lehanăn wĭt lač klei êmuh mâo sa ai tiê kñăm bi rŭ mdơ̆ng, tui duah hdră êlan jăk bruă knŭk kna kiă kriê dôk ngă lehanăn ngă leh lehanăn srăng ngă. 

Tơdah djăp mta klei êmuh, lehanăn wĭt lač klei êmuh, phung bi ala bruă kƀĭn ala lehanăn phung khua phŭn bruă, phung khua prŏng hlăm knŭk kna bi êdah leh klă klei ngă bruă hŏng klei klă nik, lač djŏ kơ jih jang djăp mta bruă dôk gun kpăk, kñăm tui duah hdră ruh mgaih hŏng klei djŏ, snăn klei ruah dŭm mta bruă pioh ksiêm kñăm thâo ƀuh klă ya mta klei awăt kƀah hlăm grăp mta bruă mâo knŭk kna kiă kriê. Jih jang bruă kƀĭn ala ksiêm kơ bruă bi liê ngăn prăk amâo mâo djŏ ti dua boh sang êa drao Bạch Mai lehanăn Việt Đức anôk rŭ mdơ̆ng mrô 2 jing sa klei bi hmô. Leh dŭm klei bruă kƀĭn ala ksiêm. Khua knŭk kna pô mtam nao ksiêm dua anôk anăn, lehanăn mta brei mkŏ mjing êpul bi mklă jih jang bruă knuă leh ngă mơ̆ng dua anôk rŭ mdơ̆ng anăn čiăng dưi mâo hdră mghaih msir bi djŏ. Pô bi ala   Nguyễn Anh Trí, êpul bi ala bruă kƀĭn ala ƀuôn prŏng Hà Nội lač anei jing hdră ngă bruă mrâo hĭn hlăm jih jang bruă kƀĭn ala ksiêm dlăng “Rŭ mdơ̆ng êjai bi kdơ̆ng hŏng klei amâo mâo djŏ êjai” ktrâo atăt bi êdah klă pô ngă lehanăn bruă klam hŏng jih jang klei dôk kƀah: Êpul ksiêm dlăng mơ̆ng bruă kƀĭn ala bi kƀĭn mă klei blŭ. Leh kơ anăn mâo khua knŭk kna djă akŏ êpul nao mghaih bruă knuă. Klei anei brei ƀuh klei tŭ dưn mơ̆ng bruă kƀĭn ala mâo klei ksiêm dlăng.

Hlăm 2022, 4 mta bruă prŏng mâo ksiêm anăn jing: Bruă čuăl mkă, ngă klei mkiêt mkriêm bi kdơ̆ng hŏng klei bi liê pliă plia, drông phung ƀuôn sang, mghaih msir klei kčŭt hưn lehanăn dăp wĭt êpul êya ngă bruă ti gưl kdriêk, să. Hŏng ai tiê djŏ hŏng klei sĭt; klă mngač; hur har; kpă ênuah, lehanăn mâo bruă đua klam prŏng dưi bi êdah leh klă hlăm djăp bruă ksiêm.      

Gưl tal êlâo, êpul ksiêm dlăng lŏ iêo jak phung truăn kơ bruă, lehanăn phung khua kiă kriê dŭm anôk bruă djŏ tuôm. Tơdah êlâo dih, êpul bi ala bruă kƀĭn ala ngă klei ksiêm dlăng, knŏng ngă klei ksiêm dlăng hlăm alŭ wăl, tui si Êpul bi ala bruă kƀĭn ala, lehanăn Êpul khua gĭt gai bruă kƀĭn ala amâo mâo ngă ôh bruă ksiêm dlăng, ƀiădah ară anei Êpul bi ala bruă kƀĭn ala bi mâo êpul ksiêm dlăng hŏng jih jang djăp mta bruă.

Djăp mta klei awăt kƀah dưi ksiêm hŏng klei klă mngač, hlưk hlak jih klei awăt êdu, čiăng dưi mâo hdră êlan mghaih msir, jih jang hdră êlan mă bruă dưi ngă mđrăm mbĭt, lehanăn jih jang klei soh čhuai hlŏng mgaih msir bi klă pô đua klam, phat mkra... Msĕ si klei ksiêm kơ dŭm hdră êlan, klei bhiăn kơ klei drông phung ƀuôn sang, lehanăn mghaih msir klei kčŭt hưn, tui si k’iăng khua Dhar bruă đru čung ba mnuih ƀuôn sang Lưu Bình Nhưỡng, truăn kơ bruă ksiêm dlăng snăn ñu mâo lu klei mnuih ƀuôn sang ư ai. Kyuadah bruă ksiêm dlăng amâo mâo djŏ knŏng ngă klei duah lưk klei soh mnuih mkăn, ƀiădah jing tui duah hdră êlan jih jang mnuih bi ngă bruă hŏng klei kjăp, tơdah tăm soh čhuai snăn hưn mthâo hŏng gưl dlông mghaih msir djŏ hŏng mta kñăm: Ksiêm wĭt klei kjăp jing djŏ hŏng ai tiê phung ƀuôn sang. Snăn dlăng ti boh tŭ dưn klei ksiêm dlăng čiăng kơ pô lŏ mĭn wĭt hnơ̆ng jăk, bruă klam mơ̆ng grăp čô knuă druh, boh nik jing hŏng pô djă akŏ anôk bruă drông mnuih ƀuôn sang.

Giê mkă kơ boh tŭ dưn bruă ngă mơ̆ng anôk bruă kƀĭn ala anăn jing klei mnuih ƀuôn sang tŭ ư lehanăn đăo knang. Lehanăn phung ƀuôn sang yơh jing phung kăp ksiêm tŭ dưn hĭn êdi jih jang bruă mơ̆ng anôk bruă kƀĭn ala ngă, mơ̆ng klei ksiêm snăn mâo leh klei bi mlih prŏng kơ klei mĭn lehanăn hdră êlan mă bruă. Anei jing klei blŭ mơ̆ng pô bi ala mnuih ƀuôn sang: Bruă kƀĭn ala lŏ dơ̆ng mâo klei mlih mrâo hlue hdră êlan mâo phung ƀuôn sang ksiêm dlăng djŏ hŏng klei sĭt hlăm klei hdĭp. Kyuanăn yơh bruă kƀĭn ala ksiêm dlăng lŏ dơ̆ng čuê mơ̆ng bruă kƀĭn ala gưl êlâo, ƀiădah gưl anei mă bruă hŏng klei ktang hĭn, kjăp hĭn.

Djăp mta klei mlih mrâo mơ̆ng bruă ksiêm, djŏ hŏng klei khua bruă kƀĭn ala  Vương Đình Huệ bi mklă, klei ksiêm dlăng anei hŏng ai tiê thâo bi đru, mđĭ bi lar ya mta jing bruă jăk, bruă djŏ ksiêm bi jih mta kñăm pioh kơ bruă mđĭ kyar: Ksiêm dlăng hŏng ai tiê bi rŭ mdơ̆ng, plah wah bruă rŭ mdơ̆ng lehanăn bruă bi kdơ̆ng hŏng klei amâo mâo djŏ, snăn rŭ mdơ̆ng jing knơ̆ng, jing ngă nanao, bi kdơ̆ng hŏng jih ai tiê mơh, bi jih lehanăn pral. Mkŏ mjing hdră bhiăn jing kñăm tă êlan kơ klei mđĭ kyar Bruă ksiêm dlăng brei bi mâo mta kñăm pioh kơ klei mđĭ kyar. Bruă kƀĭn ala mlih mrâo klei mĭn bi mlih mrâo asei mlei pô. Kyuanăn yơh grăp anôk bruă kƀĭn ala čŏng ngă jăk bruă pô ksiêm dlăng, êjai hlue ngă bruă čuăl, klei dưi, lehanăn bruă đua klam ti anăp phung ƀuôn sang, kñăm dưi pŏk ti gưl mrâo bŏ hŏng klei čang hmăng jăk siam jih jang bruă kƀĭn ala ngă djŏ tui si klei Khua gĭt gai Đảng Nguyễn Phú Trọng tuôm mñă leh ti anôk bi kƀĭn pŏk klei bi kƀĭn tal 1, bruă kƀĭn ala gưl 15.

Tui si klei blŭ mơ̆ng khua bruă kƀĭn ala Vương Đình Huệ hlăm bruă ksiêm dlăng amâo mâo djŏ knŏng mtă kơ grăp čô pô ngă bruă kƀĭn ala, dŭm anôk bruă hlăm bruă kƀĭn ala mâo klei thâo săng hĭn kơ bruă klam pô. Ksiêm dlăng jing pioh rŭ mdơ̆ng ya mta jing klei jăk siam, kyua mta kñăm mkŏ mjing klei mđĭ kyar čiăng snăk bi mâo klei hur har, mâo klei mbruă hŏng klei kut kat tiŏ klei tăng mblah kyua klei tŭ dưn kơ jih jang mnuih, kyua klei tŭ dưn kơ lăn čar./.