Blŭ hrăm mjưh ruê̆ klei bi kƀĭn, Khua bruă kƀĭn ala Vương Đình Huệ brei thâo, leh 1 hruê mă bruă, mjêč, klei bi kƀĭn bi leh jih jang boh phŭn hdră kčah leh hŏng 18 klei ksiêm hriăm.

Khua bruă kƀĭn ala bi mni, Êpul gơ̆ng bruă ƀuôn sang dŭm alŭ wăl đru mguôp lu hlăm boh tŭ mbĭt mơ̆ng lăn čar, hlăm klei đĭ kyar bruă duh mkra, ala ƀuôn mơ̆ng alŭ wăl, mñă klă, tơdah thŭn 2022 mâo leh klei mlih mrâo hlăm bruă ngă mơ̆ng Êpul gơ̆ng bruă ƀuôn sang dŭm gưl snăn truh thŭn anei ƀrư̆ bi mklă, klei mlih mrâo mâo hnơ̆ng prŏng hĭn, lar bra hĭn, tŭ dưn hĭn leh anăn mđrăm mbĭt hĭn.

Bruă ngă mơ̆ng Êpul gơ̆ng bruă ƀuôn sang ƀrư̆ hruê tŭ dưn, klă sĭt, đru yuôm bhăn hlăm bruă klam mđĭ kyar bruă duh mkra- ala ƀuôn. Dŭm alŭ wăl mâo bruă ngă 

mơ̆ng Êpul gơ̆ng bruă ƀuôn sang jăk snăn prăk hrui wĭt leh anăn đĭ kyar jăk. Êpul gơ̆ng bruă ƀuôn sang dŭm alŭ wăl păn kjăp hdră bhiăn, pŏk ngă bruă čih mkra hdră bhiăn, ktuê dlăng leh anăn bi mklă dŭm bruă yuôm bhăn, mă hră đăo knang, ngă jăk bruă mlih mrô, bruă hŏng tač êngao; mâo lu klei mlih mrâo, êdah êdi hlăm bruă ngă, boh nik gưl bi kƀĭn mơ̆ng Êpul gơ̆ng bruă ƀuôn sang; bruă ngă mơ̆ng dŭm anôk bruă hlăm Êpul gơ̆ng bruă ƀuôn sang ƀrư̆ dưi dlăng myuôm, klei drông mnuih ƀuôn sang, phung bi ala jăk hĭn hŏng hdră kñăm, mlih mrâo čiăng mđĭ kyar leh anăn kyua klei đĭ kyar mơ̆ng alŭ wăl; bruă hâo hưn mtô mblang dưi mđing dlăng.

 Čiăng dưi mâo boh tŭ anei, hlue si Khua bruă kƀĭn ala Vương Đình Huệ, Êpul gơ̆ng bruă ƀuôn sang dŭm gưl păn kjăp leh klei gĭt gai mơ̆ng gưl dlông, bruă kƀĭn ala, knŭk kna; klei mđing dlăng gĭt gai mơ̆ng Gưl dlông, Knŭk kna. Boh nik. Bruă kƀĭn ala mtrŭn leh dŭm hdră mtrŭn mjing tur knơ̆ng hdră bhiăn, klei thâo čiăng mlih mrâo bruă ngă ktuê dlăng mơ̆ng Êpul gơ̆ng bruă ƀuôn sang, klei gun kpăk mơ̆ng Êpul gơ̆ng bruă ƀuôn sang dŭm čar mâo Dhar bruă kƀĭn ala wĭt lač djăp ênŭm hŏng hră mơar. Êngao anăn jing klei ksiêm dlăng, mlih mrâo mơ̆ng phung hlăm êpul hgŭm, anôk bruă hlăm Êpul gơ̆ng bruă ƀuôn sang; bruă bi hgŭm kjăp plah wah knŭk kna leh anăn Êpul gơ̆ng bruă ƀuôn sang, bi hgŭm hŏng dŭm anôk bruă alŭ wăl, dŭm anôk bruă Kƀĭn ala…

            Hlăm wưng kơ anăp, Khua bruă kƀĭn ala Vương Đình Huệ mtă, Êpul gơ̆ng bruă ƀuôn sang păn kjăp klei gĭt gai mơ̆ng gưl bruă Đảng, dhar bruă Đảng hŏng klei mkŏ mjing bruă ngă mơ̆ng Êpul gơ̆ng bruă ƀuôn sang, anei jing mta phŭn bi mklă kơ bruă hlue ngă djŏ bruă klam dưi jao.

Hmei mtă lŏ dơ̆ng mđĭ klei hlue ngă bruă klam mơ̆ng anôk bruă mnuih ƀuôn sang alŭ wăl hlue si hdră kčah mơ̆ng hdră bhiăn čiăng bi leh jăk hĭn dŭm bruă llam mơ̆ng thŭn 2024. Hlăm anăn, lŏ dơ̆ng ktuê dlăng, bi leh dŭm hră mơar kčah hdră bhiăn mơ̆ng alŭ wăl. Mơ̆ng bruă ngă boh sĭt, Êpul gơ̆ng bruă ƀuôn sang lŏ dơ̆ng đru mguôp lu hĭn, kjăp hĭn leh anăn đua klam hĭn kơ bruă mkŏ mjing hdră bhiăn leh anăn dŭm hdră mtrŭn, boh nik hdră bhiăn djŏ tuôm kơ klei hdĭp, bruă duh mkra ala ƀuôn ti alŭ wăl. Hmei akâo kơ Êpul gơ̆ng bruă ƀuôn sang dŭm alŭ wăl, mơ̆ng hdră bhiăn, Hdră mtrŭn dưi kčah čiăng mâo hdră kčah pŏk ngă hŏng klei êlam hĭn hŏng dŭm hdră bhiăn, boh nik hră čih Hdră bhiăn lăn ala thŭn 2024, Hdră bhiăn mnia blei lăn ala, Hdră bhiăn sang dôk, Hdră bhiăn ngăn dŏ wăl hdĭp mda, Hdră bhiăn hră kak asei, Hdră bhiăn hgŭm rơ̆ng klei êđăp ênang nah gŭ… Hlăm dŭm hdră bhiăn anei mâo lu boh phŭn klă klơ̆ng jao kơ alŭ wăl.”

Mñă klă brei dưi hlue ngă hlăm boh sĭt kơh hdră bhiăn, hdră mtrŭn mơ̆ng Bruă kƀĭn ala, Khua bruă kƀĭn ala mtă kơ Êpul gơ̆ng bruă ƀuôn sang dŭm alŭ wăl hlue ngă mơ̆ng ară anei, hlăm anăn mâo Hdră mtrŭn kơ 3 hră kñăm ala čar. Anăp truh, Bruă kƀĭn ala srăng mkŏ mjing ktuê dlăng dŭm hră mơar, kyua anăn, Êpul gơ̆ng bruă ƀuôn sang dŭm alŭ wăl brei ktuê dlăng hră mơar kyua čar mtrŭn, lăm lui hră mơar amâo čiăng êdi; mbĭt anăn ktuê dlăng klei bi liê knŭk kna,

Khua bruă kƀĭn ala ăt mtă, êpul gơ̆ng bruă ƀuôn sang lŏ dơ̆ng mlih mrâo kluôm dŭm bruă ngă mâo mlih mrâo klei bi kƀĭn mơ̆ng êpul gơ̆ng bruă ƀuôn sang jing boh phŭn, mđing dlăng êpul gơ̆ng bruă ƀuôn sang gưl kdriêk mđing kơ êpul gơ̆ng bruă ƀuôn sang gưl să; mđĭ hdră bi lông ktưn, hnơ̆ng thâo phung bi ala Êpul gơ̆ng bruă ƀuôn sang, mđing kơ bruă mtô bi hriăm, mđĭ bruă čung ba mnuih ƀuôn sang ti alŭ wăl, boh nik bruă êdah êdi, kčŭt hưn lu mnuih, dleh ktuê dlăng, mbĭt anăn mđĭ mlih mrâo bi tuôm hŏng phung bi ala kơ mnuih ƀuôn sang./.