Khua Anôk bruă kƀĭn ala Vương Đình Huệ lač snei, lač kơ phung mniê hlăm tar rŏng lăn ăt msĕ ti Việt Nam yua nanao boh blŭ jăk siam êdi. Khua gĭt gai Hồ Chí Minh ăt mñă klă “Ala čar, knuih kơhưm mơ̆ng Việt Nam kbiă hriê mơ̆ng phung mniê, mda asei amâo dah mduôn, jih jang gĭr mjing sa ala čar jăk siam, đĭ kyar”. Mơ̆ng dŭm êbâo thŭn hŏng anei, phung mniê mâo bruă klam yuôm bhăn hlăm bruă đru mguôp kơ ala ƀuôn đĭ kyar lehanăn mkŏ mkra gŏ sang yâo m’ak, hlăm ya boh klei, ti ya anôk, phung mniê Việt Nam mđĭ lar nanao ai tiê “Jhŏng ktang – Gĭr ktưn – Ênuah ênô – Mbruă” msĕ si 8 boh hră yuôm mâo Awa Hô bi mklă leh. Mbĭt hŏng klei đĭ kyar mơ̆ng klei hdĭp ênuk ară anei, dŭm knhuah jăk siam anei dưi lŏ mđĭ kyar, đĭ jing dŭm hnơ̆ng čuăn hlăm ênuk gưl mrâo jing: Đăo knang – Mpŭ- Ênuah ênô – Mbruă.

Khua anôk bruă kƀĭn ala mñă, dŭm wưng ngă bruă mơ̆ng anôk bruă kƀĭn ala lehanăn mơ̆ng akŏ wưng păn bruă tal 15 truh kơ ară anei, Anôk bruă kƀĭn ala mâo klei tui ksiêm, mlih mrâo kñăm ba wĭt boh tŭ kluôm. Hlăm boh tŭ anăn, mâo bruă klam mơ̆ng phung bi ala mniê anôk bruă kƀĭn ala, phung amai adei hlăm anôk bruă kƀĭn ala. Boh nik, anôk bruă kƀĭn ala gưl 15 mâo ênoh phung bi ala mniê lu êdi hlăm 10 wưng păn bruă giăm anei, truh 30,26%, mrô anei mâo tĭng dlăng myuôm êdi. Hlăm anăn, mâo 3 čô Khua hlăm Anôk bruă Đảng gưl dlông, Khua hlăm Dhar bruă gĭt gai anôk bruă kƀĭn ala, 32 čô jing K’iăng khua, Khua hlăm anôk thơ̆ng kơ bruă ti Êpul hgŭm djuê ana, dŭm dhar bruă, adŭ bruă kƀĭn ala, phung khua dŭm anôk bruă hlăm Dhar bruă gĭt gai anôk bruă kƀĭn ala.

Phung bi ala anôk bruă kƀĭn ala ksiêm dlăng leh hră m’ar, mâo klei thâo săng klă, ba wĭt leh boh tŭ ti dŭm anôk bi kƀĭn, đru mguôp lu kơ Anôk bruă kƀĭn ala, Dhar bruă gĭt gai anôk bruă kƀĭn ala, mđĭ lar klei găl mâo čiăng hluê ngă jăk hĭn hdră mtrŭn mtăp mđơr êkei mniê. Êpul mniê bi ala anôk bruă kƀĭn ala mkŏ mjing leh lu hdră bruă klă sĭt, jing klei bi kƀĭn trông jăk, djŏ guôp čiăng kơ phung mniê bi ala anôk bruă kƀĭn ala mjĕ mjuk, bi trông klei thâo kơ hdră ngă bruă bi ala lehanăn tui ksiêm klei thâo kơ bruă mơ̆ng dŭm êpul phung mniê bruă kƀĭn ala ti dŭm klei bi kƀĭn trông lu tĭng lehanăn dua nah.

Bi ala anôk bruă kƀĭn ala, Khua anôk bruă kƀĭn ala Vương Đình Huệ bi mni dŭm klei gĭr, boh tŭ êdah êdi mơ̆ng phung mniê bi ala anôk bruă kƀĭn ala thơ̆ng kơ bruă ti gưl dlông lehanăn phung khua kiă kriê mơ̆ng Adŭ bruă kƀĭn ala, Knơ̆ng ksiêm dlăng bruă čih mkra hdră bhiăn; mñă anôk bruă kƀĭn ala hyuă kjăp hdră êlan mtrŭn mơ̆ng Đảng kơ hdră bruă phung mniê:

 “Brei hyuă kjăp Hdră mtrŭn mrô 11 mơ̆ng Phŭn bruă kđi čar kơ bruă phung mniê hlăm wưng bi mrâo mrang ala čar, Asăp mtrŭn mrô 21 mơ̆ng Anôk dlăng bruă Đảng kơ hdră lŏ dơ̆ng mtrŭt mđĭ bruă phung mniê hlăm boh klei mrâo; pŏk hlue ngă jăk bruă klam, hdră msir hluê ngă mta kñăm mtăp mđơr êkei mniê, đru mguôp dưi mâo dŭm mta kñăm mddĭ kyar h’ĭt kjăp truh kơ thŭn 2030, hluê ngă tŭ dưn Hdră êlan ala čar kơ klei mtăp mđơr êkei mniê wưng thŭn 2021-2030. Khădah klei mtăp mđơr êkei mniê truh kơ ară anei dưi hluê ngă jăk, ƀiădah drei ăt brei ksiêk kjăp klei anei. Hmei mtă kơ dŭm gưl, phung khua ksiêk kjăp mơ̆ng klei mĭn truh kơ bruă ngă, hlăm klei blŭ hrăm mmông mă bruă.

Khua anôk bruă kƀĭn ala brei thâo, hlăm wưng ti anăp, Đảng êpul bi ala anôk bruă kƀĭn ala gĭt gai brei ngă bi mklă hdră bruă mkŏ dăp, mđĭ ênoh bi ala jing mniê, boh nik phung mniê thơ̆ng kơ bruă. Truh kơ ară anei, Anôk bruă kƀĭn ala ngă jăk hdră hdră čuăl mkă phung bi ala anôk bruă kƀĭn ala, knuă druh mniê dŭm gưl hŏng hnơ̆ng lu; lŏ dơ̆ng mđĭ hnơ̆ng tŭ hdră mă bruă mơ̆ng phung mniê bi ala anôk bruă kƀĭn ala. Khua anôk bruă kƀĭn ala ăt mtă brei bi hgŭm hŏng dŭm êpul bruă công đoàn čiăng mđĭ bruă mkŏ mjing dŭm hdră tui ksiêm, nao čhưn dlăng… Mbĭt anăn, bruă Đảng êpul bruă kƀĭn ala brei mđing kơ hdră knuă druh mniê, mđing dlăng kriê klei hdĭp ai tiê klei mĭn kơ phung mniê, hlăm anăn mâo hdră mtrŭn kơ prăk mlan, mâo hdră kčah mđĭ hnơ̆ng tŭ jăk, boh tŭ hdră mă bruă mơ̆ng phung mniê.

Khua anôk bruă kƀĭn ala čang hmăng, phung mniê anôk bruă kƀĭn ala srăng mđĭ lar dŭm boh tŭ dưi mâo, đru mguôp lu hĭn hlăm hdră mă bruă mơ̆ng anôk bruă kƀĭn ala, mjing boh tŭ dưn lu hĭn kơ knhuah kdrưh k’ăm lehanăn mđing truh knăm bi hdơr 80 thŭn hruê Anôk bruă kƀĭn ala Việt Nam./.