Thŭn 2023 hŏng klei đua klam prŏng bruă kƀĭn ala mâo bi leh sa ênoh bruă prŏng, anei jing gưl tal êlâo hlăm hƀuê ênuk 78 thŭn bruă kƀĭn ala Việt Nam mă bruă mâo mkŏ mjing leh ênoh klei bi kƀĭn hlăm thŭn hŏng 5 gưl. Bruă kăp ksiêm mâo leh klei bi mlih, klei ngă bruă pral hĭn kjăp hĭn. Mâo mghaih msir leh lu bruă yuôm bhăn kơ lăn čar. Ti anôk bi kƀĭn phung bi ala bruă kƀĭn ala bi myuôm bruă kƀĭn ala mâo ngă leh sa thŭn mă bruă. Pô bi ala Lý Thị Lan, K’iăng khua kƀĭn ala êpul Hà Giang lač:

Mbĭt hŏng klei mlih mrâo, ƀrư̆ hrue ƀrư̆ kjăp hlăm jih anôk phung bi ala mâo mnuih ƀuôn sang ruah, êpul phung bi ala ti dŭm alŭ wăl mâo klei mơak kyua anei jing gưl tal êlâo hlăm klei bi kƀĭn gưl 15, mkŏ mjing leh klei bi kƀĭn ksiêm wĭt bruă hlăm thŭn. Kâo lač, anei jing klei găl mrâo lehanăn lŏ dơ̆ng pŏk êlan, kơ anôk bruă kƀĭn ala, êpul gĭt gai bruă kƀĭn ala mă bruă mbĭt hŏng jih jang phung bi ala bruă kƀĭn ala, mâo bi leh jăk hĭn jih jang bruă čuăn mơ̆ng phung bi ala bruă kƀĭn ala ti dŭm alŭ wăl.

 Mă klei blŭ kơ jih jang bruă knuă hlăm thŭn 2024, Khua knơ̆ng čih hră, khua adŭ bruă kƀĭn ala Bùi Văn Cường mâo klei bi êdah čiăng kơ phung bi ala dŭm boh čar, ƀuôn prŏng thâo:

Lŏ dơ̆ng bi mguôp kjăp kăp kčĕ đru kơ dhar bruă gĭt gai bruă kƀĭn ala kiă kriê, bi kna bruă knuă mơ̆ng Êpul gơ̆ng bruă djuê ana, dŭm anôk bruă kƀĭn ala hlăm klei kăp ksiêm, rơ̆ng đăm lĕ hlăm klei mđĭ mđal klei kăp ksiêm mơ̆ng dŭm anôk êpul êya bruă. Hŏng alŭ wăl bi mâo êpul ngă bruă kơ dŭm mta čuăn, akâo kơ êpul bi ala bruă kƀĭn ala hưn mthâo truh hŏng khua knơ̆ng čih hră mơ̆ng anôk bruă kƀĭn ala kơ ênoh bruă ngă, mta bruă ngă, grăp kdrêč bruă, mmông ngă bruă ti alŭ wăl čiăng mâo klei hâo mdah hŏng dhar bruă gĭt gai bruă kƀĭn ala hmao ksiêm dlăng thâodah mâo klei bi mlih bi djŏ.

Blŭ klah čŭn klei bi kƀĭn, Khua buă kƀĭn ala Vương Đình Huệ lač kơ bruă thŭn 2023 jing thŭn mâo ngă sa ênoh bruă prŏng êdi. Êpul phung bi ala bruă kƀĭn ala ăt jih ai tiê ngă bruă kăp ksiêm, hŏng klei tŭ jing jih jang hdră êlan, ba wĭt leh klei tŭ jing hlăm bruă mkŏ mjing klei bhiăn, bi mklă lu bruă yuôm bhăn kơ lăn čar, mâo wăt bruă bi tuôm hŏng phung bi ala kơ mnuih ƀuôn sang, kăp ksiêm mtrŭt mjhar lehanăn mghaih msir klei mnuih ƀuôn sang bi kčŭt.

Hlăm wưng ti anăp, Khua bruă kƀĭn ala Vương Đình Huệ mâo klei mtă, kơ dŭm êpul phung bi ala bruă kƀĭn ala, lehanăn pô bi ala ngă bi tŭ jing hĭn bruă jao, lŏ pŏk mlar, thiăm lu hĭn bruă mâo ngă, ngă bruă hŏng klei kjăp. Boh nik, lŏ bi êdah klă bruă klam mơ̆ng êpul phung bi ala bruă kbĭn ala, hlăm klei mkŏ mjing lehanăn ngă bruă mơ̆ng anôk bruă kƀĭn ala Việt nam pô. Hlăm anăn, mâo dŭm bruă mơ̆ng dŭm êpul bi ala bruă kƀĭn ala jing klei mkŏ mjing čiăng kơ phung bi ala ngă jăk bruă drông mnuih ƀuôn sang:

Klei dưi, bruă čuăn jing klei drông mnuih ƀuôn sang, bi mguôp čiăng kơ jih jang phung bi ala bi êdah ai tiê jăk hlăm bruă drông mnuih ƀuôn sang. Anăn jing bruă čuăn tal êlâo, kyuanăn mơh êjai lŏ dôk bi mlih hdră mtrŭn kơ bruă bi tuôm hŏng mnuih ƀuôn sang, bi djŏ hŏng hdră mtrŭn dôk djă yua ară anei, mtă kơ jih jang phung bi ala brei lŏ mlih mrâo hdră êlan drông mnuih ƀuôn sang. Hlăm klei bhiăn ară anei čoh čuăn leh, klei bi tuôm hŏng mnuih ƀuôn sangtui si hdră mơ̆ng êpul phung bi ala bruă kƀĭn ala ka mâo ôh klei čoh čuăn jing pô bi ala dưi bi tuôm hjăn hŏng mnuih ƀuôn sang, ƀiădah tui si êpul, snăn klei anăn ăt ka jing ênŭm klă mơh. Năng ai anăp anei srăng ksiêm duah kñăm bi leh hdră mtrŭn kơ klei bi tuôm hŏng mnuih ƀuôn sang, êjai dôk lui hŏng kdrêč anei.

Khua bruă kƀĭn ala Vương Đình Huệ mñă, êpul phung bi ala bruă kƀĭn ala mâo klei bi mguôp hŏng Êpul gơ̆ng bruă djuê ana, lehanăn dŭm anôk bruă hlăm bruă kƀĭn ala ti dŭm alŭ wăl, kăp ksiêm, mtrŭt mjhar lehanăn mghaih msir klei mnuih ƀuôn sang bi kčŭt, mta kơ jih jang anôk bruă djŏ tuôm hâo mdah bi ƀhĭ ênŭm kơ jih boh klei anei, lehanăn mâo klei hâo mdah kơ jih jang bruă mơ̆ng êpul phung bi ala bruă kƀĭn ala ngă./.