Ti ƀuôn prŏng Ƀuôn Ama Thuôt, čar Daklak, êpul bi ala bruă kƀĭn ala čar Daklak mâo leh mmông bi tuôm hŏng phung bi ala jing mnuih ngă bruă. Nao ti anôk bi tuôm anăn mâo Khua anôk bruă đru čung ba mnuih ƀuôn sang mơ̆ng gưl dlông Bùi Thị Minh Hoài lehanăn giăm 150 čô phung bi ala jing mnuih ngă bruă hriê mơ̆ng dŭm êpul êya, phung duh mkra hlăm alŭ wăl.

Leh hmư̆ klei hâo mdah kơ boh phŭn klei bi kƀĭn tal 7, Bruă kƀĭn ala gưl 15, lehanăn boh tŭ dưn bruă mơ̆ng êpul bi ala kƀĭn ala čar, mơ̆ng leh klei bi kƀĭn tal 6 truh kơ ară anei, phung bi ala čar Daklak bi êdah kơ dŭm bruă hră ênua, klei kơ prăk mlan, klei kơ sang dôk, klei đru ba kơ mnuih ngă bruă... Msĕ si, phung bi ala akâo mjing klei găl kơ mnuih ngă bruă mâo blei hră ênua mdrao mgŭn , čiăng dưi bi tĭng tla jih hlăm dŭm boh sang êa drao, êngao kơ mmông mă bruă, bi hrŏ thŭn wĭt mdei hŏng mnuih ngă bruă ktrŏ, msĕ hŏng phung nai mtô ti sang hră hđeh điêt, mnuih ngă bruă hlăm dŭm anôk amâo mâo jăk, anôk ktrŏ...

Pô bi ala Ngô Thị Ánh Đào, Anôk bruă rông ba mdrao mgŭn hđeh amâo mâo jăk asei mlei čar Daklak lač:

“Akâo kơ bruă kƀĭn ala, phung khua kiă kriê čar mă bruă hŏng dŭm êpul mâo klei dưi, mâo dŭm hdră êlan mă bruă đru bi djŏ guôp hŏng sang hră mtô bi hriăm hđeh điêt, msĕ si lŏ mđĭ ênoh đru mdul kơ phung nai, lehanăn bi hrŏ thŭn dưi wĭt mdei, yap phung nai mtô dôk hlăm êpul ngă bruă ktrŏ, anôk amâo mâo jăk, čiăng kơ phung nai mtô hđeh điêt hơĭt ai tiê ngă bruă, hur har hĭn hŏng bruă knuă”.

 Mbĭt hŏng anăn, lu phung bi ala akâo kơ knŭk kna mđing brei klei kơ sang dôk hŏng mnuih ngă bruă. Nguyễn Thị Thanh Thủy, ti knơ̆ng bruă hiu čhưn ênguê Daklak lač, hŏng klei hdĭp ênoh ênil đĭ yuôm, bi liê hlăm klei hdĭp kƀah wư, klei rông ba anak anek jing ktrŏ, snăn mnuih ngă bruă amâo mâo dưi mkuôm ôh prăk kăk pioh ngă sang.

“Čang hmăng kơ knŭk kna mâo klei mđing hĭn, mtrŭn dŭm hdră êlan rŭ mdơ̆ng sang dôk kơ yang ƀuôn, sang dôk hŏng ênoh êlưih, čhĭ tla ƀrư̆ ƀrư̆ kơ mnuih ngă bruă, lehanăn mjing klei găl kơ mnuih ngă bruă mâo čan prăk hŏng mnga hdjul, kñăm mâo prăk pioh blei sang dôk, bi hơĭt klei hdĭp mda lehanăn mă bruă knuă”.

Ăt ti anôk bi tuôm hŏng phung bi ala, êpul phung bi ala bruă kƀĭn ala čar Daklak mđup brei leh 100 hnư mnơ̆ng kơ mnuih ngă bruă dôk hlăm klei hdĭp dleh dlan hlăm čar.

Mprăp nao ti anôk bi kƀĭn tal 7, Bruă kƀĭn ala gưl 15 tinăp, mrâo leh êgao êpul bi ala bruă kƀĭn ala čar Lâm Đồng msĕ mơh mkŏ mjing leh klei bi tuôm hŏng phung bi ala kơ mnuih ƀuôn sang ti dŭm alŭ wăl hlăm čar. Ti dŭm anôk mkŏ mjing klei bi tuôm, mnuih ƀuôn sang bi êdah klei đăo knang, lehanăn klei čăng hmăng  hŏng dŭm hdră êlan pioh kơ klei mđĭ kyar bruă duh mkra ala ƀuôn, hdră ruh mgaih klei dleh dlan kyua prăk luič ênoh mơ̆ng knŭk kna, mơ̆ng anôk bruă kƀĭn alati dŭm gưl bi kƀĭn leh êgao. Lehanăn, lŏ dơ̆ng akâo kơ lu bruă yuôm bhăn kơ dŭm klei knŭk kna kiă kriê hŏng djăp mta bruă.

 Ti să Rô Men, kdriêk Đam Rông, mnuih ƀuôn sang čang hmăng kơ Đảng, Knŭk kna lŏ mđing hĭn kơ djăp mta klei, hlue ngă dŭm hdră êlan kơ bruă djuê ana, kơ klei hdĭp mda ala ƀuôn, đru brei čan prăk hŏng mnga hdjul, đru duah brei lăn pla mjing kơ dŭm mnuih kƀah lăn, đru sang dôk kơ dŭm gŏ êsei ƀun, lŏ pŏk phai mkra mđĭ êlan dơ̆ng prŏng mrô 27, duh bi liê pui mtrang mngač, mkra êlan klông, mbông êa jua krĭng ƀuôn sang...

Êjai anăn, mnuih ƀuôn sang ti să Mê Linh, kdriêk Lâm Hà mđing êdi kơ bruă bi kdơ̆ng hŏng klei ƀơ̆ng ngăn, bi mâo bruă lŏ ngă ktang hĭn, mđing kơ klei kăp ksiêm, lehanăn bruă hlue ngă hdră bhiăn mơ̆ng phung knuă druh nah gŭ, mâo lu hdră êlan mđĭ kyarr kơ krĭng mnuih djuê ƀiă, rơ̆ng bi hơĭt kơ klei hdĭp mda ala ƀuôn... Pô bi ala Trương Văn Trình, dôk ti alŭ mrô 5, să Mê Linh, kdriêk Lâm Hà, lač:

“Bruă bi kdơ̆ng hŏng klei ƀơ̆ng ngăn snăn ti gưl čar mâo leh êpul kăp ksiêm, ngă leh klei ksiêm nanao. Ƀiădah grăp blŭ mâo êpul nao ksiêm ti kdriêk lehanăn să, snăn êpul kăp ksiêm anăn mâo klei hâo mdah mơ̆? Jhŏng mdah hŏng anôk bruă klei mrâo mơ̆ čiăng kơ mnuih ƀuôn sang thâo? Bi giăm anei hĭn jing gưl kdirêk bi ksiêm bi mâo klei kăp ksiêm, kiă kriê, dlăng kơ gưl nah gŭ mâo klei dưi ngă mơ̆ amâodah hơăi, mjing klei găl, brei ngă bi dưi, čiăng mâo mă ai tiê mnuih ƀuôn sang. amâo mâo djŏ akâo kơ nah dlông amâo mâo dưi kiă kriê, kăn hmư̆ bơ̆k bâo rei kơ klei anăn”.

Bi ala kơ dŭm knơ̆ng dhar bruă, bruă sang čư̆ êa dŭm alŭ wăl čar Lâm Đồng bi êdah leh dŭm bruă ngă čiăng kơ mnuih ƀuôn sang mđing. Êpul bi ala bruă kƀĭn ala čar Lâm Đồng ăt mâo čih pioh, bi klin dŭm klei blŭ akâo kơ dŭm dhar bruă djŏ tuôm ksiêm dlăng mghaih msir hlăm wưng tinăp./.