Khua kiă kriê, Khua adŭ bruă Kƀĭn ala Bùi Văn Cường brei thâo, wưng tlâo mlan tal 1, dŭm anôk bruă đru kčĕ, đru mkŏ mjing tŭ jing 2 gưl kƀĭn êngao hdră mơ̆ng Bruă kƀĭn ala, 8 gưl kƀĭn mơ̆ng Dhar bruă gĭt gai bruă kƀĭn ala, ksiêm dlăng, bi klă leh anăn brei klei blu mguôp hŏng 2 hdră bhiăn, 4 hdră mtrŭn mơ̆ng bruă Kƀĭn ala, 66 hdră mtrŭn mơ̆ng Dhar bruă gĭt gai bruă kƀĭn ala, mkŏ mjing klei kƀĭn trông phung bi ala Bruă kƀĭn ala thơ̆ng kơ bruă čiăng bi trông, brei klei blŭ mguôp kơ 8 hdră ba mdah hŏng bruă Kƀĭn ala ksiêm dlăng bi klă hlăm klei kƀĭn tal 7, bruă Kƀĭn ala gưl 15…

Bruă đru kčĕ, đru hluê ngă dŭm hdră bhiăn phŭn srăng lŏ dơ̆ng mđing tla êlâo, mâo klei kñăm, mđĭ hnơ̆ng tŭ jăk, nao klă hŏng klei bi klă mrô 19 mơ̆ng Phŭn bruă kđi čar, hdră čih mkra hdră bhiăn, asăp mtrŭn thŭn 2024, Hdră êlan mrô 81 mơ̆ng Dhar bruă gĭt gai bruă kƀĭn ala. Êngao kơnăn, bi mbŏ 19 bruă klam hdră bhiăn mrâo hlăm hdră êlan mrô 81 kñăm hmao hluê ngă dŭm hdră mtrŭn mơ̆ng Đảng leh anăn bi djăp ênŭm hlăm boh sĭt.

Dŭm mta bruă hŏng tač êngao nao klă hŏng hdră tă mơ̆ng Đảng, knŭk kna, dưi hluê ngă hŏng klei čŏng pô, hur har leh anăn tŭ dưn hlăm djăp mta bruă, dua tĭng leh anăn lu tĭng. Bruă phung bi ala, bruă ƀuôn sang, bruă ksiêm duah klei kreh knhâo lŏ dơ̆ng dưi hluê ngă jăk, ƀrư̆ hruê ƀrư̆ djŏ hŏng hdră bhiăn.

Hlăm wưng tlâo tla 2 anei, dŭm anôk bruă mơ̆ng Bruă kƀĭn ala srăng bi leh hră mơar, ba mdah hŏng bruă kƀĭn ala bi klă hlăm Klei kƀĭn tal 7 hŏng 9 hdră bhiăn, 1 hdră mtrŭn, bi leh, rơ̆ng kơ hnơ̆ng tŭ jăk dŭm klei hưn ksiêm duah hưn mdah hŏng bruă Kƀĭn ala kơ 11 hdră bhiăn mâo leh hdră hlăm čih mkra hdră bhiăn, Hdră mtrŭn.

Leh hmư̆ klei blŭ mguôp hlăm klei kƀĭn, Khua bruă kƀĭn ala Vương Đình Huệ yap yuôm bhăn hlăm mlan 3 leh anăn wưng tlâo mlan tal 1, dŭm anôk bruă mơ̆ng bruă Kƀĭn ala ngă leh lu mta bruă, kreh knhâo, nao klă hŏng boh sĭt mơ̆ng bruă Đảng bruă kƀĭn ala, mbĭt anăn hluê ngă hŏng klei mbruă dŭm klei bluh mrâo, klei ngă bruă mơ̆ng dŭm anôk bruă mâo klei êmăt, klă hŏng boh sĭt, nao klă hŏng klei gĭt gai mơ̆ng Êpul khua bruă Đảng, djŏ hŏng hdră bhiăn lăn čar.

Klei ngă bruă mơ̆ng bruă Kƀĭn ala hluê ngă kluôm hlăm dŭm mta bruă čih mkra hdră bhiăn, ktuê dlăng leh anăn bi klă dŭm boh klei yuôm bhăn mơ̆ng lăn čar, bruă mnuih ƀuôn sang, bruă hŏng tač êngao, bruă đru kčĕ, ktuê dlăng, gĭt gai klei ngă bruă mơ̆ng Êpul gơ̆ng bruă ƀuôn sang, mkŏ mjing dŭm gưl kƀĭn mơ̆ng Bruă kƀĭn ala, gưl kƀĭn mơ̆ng Dhar bruă gĭt gai bruă Kƀĭn ala, dŭm hdră kiă kriê hlăm êpul bruă kđi čar…

Ênoh bruă ngăm hnơ̆ng tŭ jăk dŭm mta bruă bi mâo djăp klei čiăng hlăm boh sĭt, djŏ hŏng klei hmăng hmưi mơ̆ng phung bi ala leh anăn mnuih ƀuôn sang. Bi ala kơ Dhar bruă Kƀĭn ala, Khua bruă kƀĭn ala Vương Đình Huệ bi myuôm dŭm boh tŭ dưn mơ̆ng dŭm anôk bruă mơ̆ng bruă kƀĭn ala dưi mâo, phung knuă druh mă bruă jih ai, đru mguôp hlăm klei tŭ jing mbĭt mơ̆ng Bruă kƀĭn ala:

Bi kơ bruă knuă hlăm mlan 4, wưng tlâo mlan tal 2, mta kñăm jing mprăp kơ klei kƀĭn trông gưl dlông 9, klei kƀĭn Bruă kƀĭn ala tal 7 leh anăn êlâo anăn, gưl kƀĭn tal 32, 33 mơ̆ng Dhar bruă gĭt gai bruă kƀĭn ala. Kâo mñă leh klei kƀĭn anei, Khua kiă kriê, khua adŭ bruă Kƀĭn ala ksiêm dlăng, mđĭng hmư̆ klei blŭ mguôp hlăm mmông mă bruă čiăng ksiêm dlăng dŭm mta phŭn bruă knuă mơ̆ng ară anei truh kơ jih wưng tlâo mlan tal 2. Bi hŏng dŭm hră mơar hdră bhiăn, srăng ksiêm dlăng leh anăn bi mŭt hlăm hdră mơ̆ng gưl kƀĭn Dhar bruă kƀĭn ala tal 23, 33 hluê si đa đa klei čuăn. Tal 1, jih jang dŭm mta phŭn mơ̆ng ară anei truh kơ jih wưng tlâo mlan tal 2, mđing tal êlâo kơ klei kƀĭn tal 7, Bruă kƀĭn ala gưl 15. Tal dua, jih jang dŭm hdră bhiăn leh anăn hdră phŭn, tơdah ka mâo hlăm hdră Bruă kƀĭn ala bi klă srăng mñă kơ Phŭn bruă hdră bhiăn bi ala knŭk kna hưn mdah čiăng kơ Dhar bruă kƀĭn ala ksiêm dlăng hŏng Dhar bruă hdră bhiăn bi mŭt hlăm hdră klei kƀĭn.

Khua bruă Kƀĭn ala ăt mñăm, dŭm anôk bruă mơ̆ng Bruă kƀĭn ala ksiêm dlăng hdră ngă bruă, klei čuăn kơ klei bi hgăm klei hưn, klei čuăn hră mơar, djă pioh, klei čuăn hgăm mơ̆ng knŭk kna, răng mgang bruă kđi čar, klei blŭ mdah. Dŭm anôk bruă ksiêm dlăng leh anăn mñă kơ phung knuă druh, phung mă bruă knŭk kna hluê ngă djŏ klei čuăn. Dŭm anôk bruă mơ̆ng bruă kbiƀn ala čiăng mđĭ hĭn ai tiê bruă klam, čŏng pô hĭn hlăm djăp mta bruă, mbĭt anăn mđĭ hĭn klei bi mguôp wăt hlăm lam leh anăn nah êngao hlăm bruă hluê ngă dŭm mta bruă knuă, bruă klam dưi jao./.