Êjai adiê hlơr ktang hlăm dŭm hrue akŏ mlan 4 yan bhang lăn dap kngư, bi tuôm hŏng sa čô đảng viên Y Tuyên Bkrông (dân tộc Ê đê), 53 thŭn, buôn Drai H’ling, să Hòa Xuân, ƀuôn prŏng Buôn Ma Thuột (Đắk Lắk), êjai ñu dôk hŏngmnuih ngă bruă dôk bi lŭk hbâo hlăm brŏng mgơ̆ng êa krih gưl 3 kơ war kphê pla pluă hŏng tiu, lehanăn boh durian. Ñu lač, hŏng bruă klam jing sa čô đảng viên snăn asei mlei kâo mâo nanao ai tiê ngă klei bi hmô êlâo hlăm klei duh ƀơ̆ng gĭr ktĭr msir klei ư̆ êpa bi hrŏ klei ƀun knap. Leh lu thŭn pla mjing, ară anei gŏ sang ñu mâo hrui wĭt êbeh 200 êklăk prăk/thŭn mơ̆ng  1.500 phŭn kphê, 400 phŭn tiu lehanaưn 40 phŭn ana boh durian. Leh hơĭt klei hdĭp mda, ñu dơ̆ng mâo klei tui đru mnuih riêng gah, lehanăn mnuih hlăm ƀuôn. Y Tuyên Bkrông lač:

Kâo jing mnuih tuôm nao mjuăt hriăm hlăm să kơ hdră dlăng kriê wiê ênăk kphê, pla tiu lehanăn boh durian. Êjai dôk mjuăt bi hriăm, kâo lŏ wĭt ktrâo atăt kơ mnuih ƀuôn sang thâo ba yua klei kreh knhâo kơ bruă pla mjing kphê.

 Y -Vinh H’đơk (dân tộc Ê đê) 38 thŭn, buôn Čư̆ dluê, să Hòa Xuân, ƀuôn prŏng  Buôn Ma Thuột, čar Đắk Lắk ăt jing đảng viên thâo gĭr kreh kriăng hlăm klei duh ƀơ̆ng. Hŏng klei jing sa čô đảng viên ñu “, grăp thŭn ñu mâo hrui wĭt êbeh 200 triệu đồng mơ̆ng bruă pla mjing lehanăn ngă bruă pưk sang. Leh lu thŭn gĭr ktĭr duh ƀơ̆ng, knhal jih thŭn 2023 leh êgao, ñu mâo mdơ̆ng leh sa boh sang sang prŏng siam truh 100 m2, hŏng ênoh dŭm êtuh êklăk prăk . Ñu lač: 

“leh ruĕ bruă lĭng kahan, snăn kâo ruah bruă rŭ mdơ̆ng, lehanăn kâo hiu ngă bruă mưn, lehanăn lŏ tŭ mă rŭ mdơ̆ng lu pưk sang điêt, mâo thŭn kâo mdơ̆ng mâo   3 – 4 boh sang, dah thŭn ƀiă êdi kâo mâo mdơ̆ng truh 2 boh. Kâo jak ayŏng adei hlăm ƀuôn phung thâo kliă, mâo mơ̆ng 7 – 8 čô mnuih, 4 čô jing pô phŭn thâo klia, lehanăn mơ̆ng 2 - 3 čô jing phung kăp đru, tla prăk mưn kơ pô thâo kliă phŭn mơ̆ng 400 – 450 êbâo prăk/čô/hrue tui hlue bruă mdê mdê, dah phung kăp đru thâo riah mưng leh hlăm bruă snăn mưn 320 êbâo prăk, phung kăp đru aguah tlam jing 300 êbâo prăk/čô/mnuih/hrue. Snăn mơ̆ng bruă pla kphê, lehanăn wăt hŏng bruă rŭ mdơ̆ng kâo ăt dưi mâo mơ̆ng 150 - 200 êklăk prăk/thŭn.”

Êpul hgŭm kahan hđăp ƀuôn prŏng Buôn Ma Thuột ară anei mâo 8.080 čô ƀĭng hgŭm, hlăm anăn mâo 2.691 čô jing đảng viên, giăm 600 čô jing mnuih djuê ƀiă Ê đê, M’ông, Tày, Nùng, Dao, Thái, Mông…. Nguyễn Công Tình – K’iăng khua êpul hgŭm kahan hđăp ƀuôn prŏng Buôn Ma Thuột lač, dŭm thŭn leh êgao, phung đảng viên hlăm êpul hgŭm ngă leh jăk bruă klam jing phung ba êlan êlâo, hŏng ai tiê “Đảng viên nao êlâo ƀuôn sang tui tluôn”. Phung kahan hđăp anăn dưn yua jih ai ktang mơ̆ng “Kahan awa Hô” hŏng boh klei mrâo, amâo mâo kdŭn ôh ti anăp klei dleh dlan, gĭt duh ƀơ̆ng msir klei ư̆ êpa bi hrŏ klei ƀun knap. Mơ̆ng anăn, dưi đru mguôp amâo mâo djŏ điêt ôh hlăm bruă mđĭ kyar klei duh mkra ala ƀuôn hlăm ƀuôn prŏng Buôn Ma Thuột, mkŏ mjing êpul hguĭm knư̆ hrue knư̆ kjăp hĭn, mâo mjing bruă knuă kơ lu mnuih. Phung đảng viên Y Tuyên Bkrông lehanăn Y Vinh H’đơ̆k jing leh klei bi hmô msĕ snăn. Nguyễn Công Tình lač:

“Hlăm dŭm klei bi kƀĭn, hmei hưn nanao klei thâo bi hmô mơ̆ng phung   đảng viên Y Vinh lehanăn Y Tuyên čiăng kơ jih jang êpul hgŭm mâo klei găl tui hriăm pioh mđĭ kyar klei duh mkra. Boh nik, ƀiưng hgŭm jing mnuih djuê ƀiă čŏng pô amâo lŏ hêñ mlâo, ñŭt huĭ ôh, gĭr ktĭr duh ƀơ̆ng msiê klei ư̆ êpa msiê klei ƀun knap, msĕ hŏng di Y Vinh lehanăn Y-Tuyên. Mơ̆ng anăn mjing klei lar bra hlăm êpul phung kahan hđăo ti ƀuôn prŏng lehanăn hlăm ƀuôn sang”.

Drei dưi lač, phung đảng viên mnuih Ê đê hlăm êpul kahan hđăp ti ƀuôn prŏng Ƀuôn Ma Thuột msĕ si Y Tuyên thâodah Y Vinh mjing leh boh kdrŭt jăk, mjing klei đăo knang lehanăn klei lar bra čiăng kơ phung ƀĭng hgŭm mkăn lehnanăn mnuih ƀuôn sang ti ƀuôn prŏng Buôn Ma Thuột tui hriăm, lehanăn hlue ngă čiăng kpưn đĭ tlaih mơ̆ng ƀun, lehanăn tui duah klei mdrŏng sah, đru rŭ mdơ̆ng ƀuôn prŏng Ƀuôn Ama Thuôt lehanăn čar Daklak knư̆ hrue knư̆ mdrŏng sah hĭn./.