Truh kơ ară anei, Phŭn bruă ngăn dŏ leh anăn wăl hdĭp mda gĭt gai čih mkra 6 hdră mtrŭn leh anăn 4 hră mtrŭn, hŏng hdră mtrŭn klei čuăn klă nik hluê ngă đa đa mta hlăm Hdră bhiăn lăn ala mâo 10 kdrêč, 115 êlan klă nik 51 mta phŭn dưi jao hlăm hdră bhiăn, kñăm kơ dŭm klei čuăn mbĭt msĕ si: Bruă klam, hdră mkŏ mjing mơ̆ng jar êpul bi klă lăn ala, êpul mđĭ kyar lăn ala, čuăl mkă, hdră êlan djă yua lăn, mđĭ kyar, ksiêm dlăng, jao lăn, brei mưn, mlih mta kñăm yua lăn, mgaih msir klei bi mmiă lăn ala, mgaih msir klei ngă soh hŏng hdră bhiăn lăn čar kơ lăn ala hŏng phung mâo bruă ngă soh hŏng hdră bhiăn lăn čar êjai ngă bruă knŭk kna djŏ tuôm hŏng lăn ala. K’iăng khua Phŭn bruă ngăn dŏ leh anăn wăl hdĭp mda Lê Minh Ngân brei thâo:

Phŭn bruă ngăn dŏ leh anăn wăl hdĭp mda mă leh klei blŭ mguôp mơ̆ng dŭm knơ̆ng, dhar bruă djŏ tuôm mơ̆ng 63 čar, ƀuôn prŏng gưl dlông, hŏng 4 klei kƀĭn trông ti dŭm krĭng, mă klei blŭ mguôp hŏng hră mơar ti dŭm Phŭn, dhar bruă, alŭ wăl, êpul hgŭm djŏ tuôm mđing hmư̆, hlăk mblang leh anăn hưn mdah hŏng Phŭn bruă hdră bhiăn bi klă. Mĭn tĭng hruê 19/4/2024 Êpul gơ̆ng srăng mkŏ mjing klei kƀĭn bi klă dŭm hdră mtrŭn anei.

Hlăm klei kƀĭn, khua phŭn bruă lŏ hma leh anăn mđĭ kyar krĭng ƀuôn sang brei thâo: Mâo lu mta phŭn mrâo, boh klei bluh mrâo hlăm bruă mkra mlih, bi mbŏ hdră mtrŭn mrô 156 mơ̆ng knŭk kna klei čuăn klă nik hluê ngă đa đa mta mơ̆ng hdră bhiăn dliê mkrơ̆ng, ăt msĕ mơh mkŏ mjing klei čuăn mbĭt kơ bruă pla mdiê lŏ. Phŭng bruă lŏ hma leh anăn mđĭ kyar krĭng ƀuôn sang ngă bruă mă klei blŭ mguôp kơ dua hdră mtrŭn anei hluê si klei čuăn…

Bi klă Phŭn bruă ngăn dŏ leh anăn wăl hdĭp mda mâo leh klei čŏng pô, hmao ngă hluê si klei gĭt gai mơ̆ng knŭk kna, k’iăng Khua knŭk kna Trần Hồng Hà mñă ktang: Čiăng lŏ dơ̆ng bi klă dŭm boh klei dôk mâo klei blŭ mdê mdê  kơ hnơ̆ng, kơ hlei pô, hdră êlan hluê ngă… mjêč mă klei blŭ guôp mơ̆ng alŭ wăl, knơ̆ng bruă, êpul êya bruă kđi čar yang ƀuôn…hŏng klei čuăn tla hnô, đru anôk dôk mrâo, coh ênoh lăn, mkŏ mjing, ba mdah hluê si hră mơar klah čŭn hŏng hdră mtrŭn ƀuah mkra klei ngă soh hlăm bruă lăn ala…K’iăng Khua knŭk kna mñă kơ Phŭn bruă lŏ hma leh anăn mđĭ kyar krĭng ƀuôn sang rơ̆ng kơ hdră mtrŭn klă nik kơ lăn pla mdiê djŏ mmông kčah, hyuă kjăp bruă mbha gưl, mbha klei dưi, mlih mrâo klei ngă hră mơar knŭk kna, ba mdah dŭm klei găl, hnơ̆ng čuă ktuê dlăng, ksiêm dlăng, bi klă bruă hluê ngă dŭm klei čuăn kơ lăn dliê, lăn pla mdiê:

Srăng hluê ngă dŭm hdră bhiăn rơ̆ng kơ dŭm hdră mtrŭn kluôm dhuôm dŭm klei čuăn hlăm klei bhiăn lăn ala, rơ̆ng djŏ hŏng hdră bhiăn phŭn, djŏ hŏng klei bhiăn lăn čar, hdră mtrŭn amâo mâo kpleh hŏng hdră bhiăn. Mnă kơ phung khua ngă bruă mbha gưl, mbha klei dưi čiăng nao mbĭt hŏng dŭm klei găl, hnơ̆ng čuăn čiăng kơ alŭ wăl hluê ngă leh anăn ăt jing tur knơ̆ng čiăng kơ drei ksiêm dlăng.

K’iăng Khua knŭk kna mñă kơ Phun bruă hdră bhiăn, Phŭn bruă ngăn dŏ leh anăn wăl hdĭp mda, mjêč ngă hră mơar ciăng hưn mdah hŏng bruă Kƀĭn ala ba mdah hdră mtrŭn brei kơ hdră bhiăn lăn ala thŭn 2024 dưi dưn ti hruê 1/7/2024. Phŭn bruă mjêč mkŏ mjing dŭm hră mơar klei čuăn klă nik hdră bhiăn sang dôk thŭn 2023 leh anăn hdră bhiăn mnia mblei sang lăn thŭn 2023 ciăng hmao mâo klei dưi hriăm mbĭt hŏng hdră bhiăn lăn ala thŭn 2024 ti hruê 1/7/2024./.