Akŏ mlan 3 mrâo êgao, bruă Đảng, bruă sang čư̆ êa leh anăn mnuih ƀuôn sang să Ya Ly, kdriêk Sa Thầy tŭ mă klei bi klă mơ̆ng bruă sang čư̆ êa čar Kon Tum tŭ yap să Yaly ênŭm hnơ̆ng čuăn krĭng ƀuôn sang mrâo. A Thoải, khua dlăng bruă Đảng nah gŭ ti alŭ Chứ, să Yaly tŭ ư êdi hŏng boh tŭ dưn anei. Kyuadah lu thŭn hŏng anei, ñu mâo klei bi hmô nao êlâo mbĭt hŏng êpul bruă ngă klei mtô, mtrŭt mjhar 262 gŏ sang alŭ Chứ bi mlih knhuah mĭn, hdră ngă, mđĭ kyar klei hdĭp mda gŏ sang, hur har nao hgŭm hlăm dŭm mta bruă knuă hlăm ƀuôn, đru ngă bruă mkŏ mkra krĭng ƀuôn sang mrâo. A Thoải, brei thâo, hlăm bruă mtrŭt mjhar mnuih ƀuôn sang, čiăng êdi jing klei gĭr, klei thâo săng:

“Phŭn kčưm lu mnuih ăt ka thâo săng, mâo klei hŭi, ƀiădah leh anăn ăt thâo bi mĭn kơ boh tŭ dưn mbĭt. Phung đảng viên hlăm anôk bruă hur har hâo hưn, mtrŭt mjhar mnuih ƀuôn sang jhŏng dưn yua dŭm hdră ngă bruă mrâo hlăm bruă mkra mjing, ngă bruă lŏ hma leh anăn mđing tal êlâo kơ klei hriăm hră mơar mơ̆ng anak čô”.

Leh 12 thŭn gĭr hŏng mta kñăm mkŏ mkra krĭng ƀuôn sang mrâo, să Yaly, kdriêk Sa Thầy dưi iêo mkrum êbeh 30 êklai prăk ngă êlan klông krĭng ƀuôn sang, bi kjăp mnuôr êa, rŭ dơ̆ng sang hră mơar, dŭ hriăm leh anăn đru kơ mnuih ƀuôn sang mđĭ kyar bruă mkra mjing. Mbĭt hŏng anăn ti tlâo ƀuôn mnuih djuê ƀiă: Chứ, Tum leh anăn Chờ amâo lŏ mâo sang dôk êjai, sang tĭ ƀrôč. Hnơ̆ng gŏ sang ƀun ƀin mơ̆ng să hrŏ adôk ti gŭ 8%, hnư hrui wĭt kah knar grăp čô mâo êbeh 42 êklăk prăk. Khua dlăng bruă Đảng să Yaly Phan Chí Thiện, čiăng mkŏ mjing klei kdlưn hĭn leh anăn truh hnơ̆ng krĭng ƀuôn sang mrâo mâo bruă klam yuôm bhăn mơ̆ng khua dlăng bruă Đảng nah gŭ 3 ƀuôn mnuih djuê ƀiă, êdah êdi msĕ si khua dlăng bruă Đảng ƀuôn Chứ A Thoải:

“Hlăm bruă mkŏ mkra krĭng ƀuôn sang mrâo ăt msĕ mơh dŭm mta bruă mơ̆ng să, A Thoải hluê ngă ktang phĭt êdi. A Thoải gĭt gai dŭm gŏ sang mâo war êmô čhŏ mđuĕ ti anôk mkăn. Mtrŭt mjhar, hâo hưn kơ đa đa gŏ sang myơr lăn mkra êlan kơ krĭng ƀuôn sang mrâo. Leh anăn mbĭt hŏng bruă Đảng nah gŭ pla mnga mkŏ mjing wăl mtah – doh – siam”.

Klă sĭt brei ƀuh êpul khua dlăng bruă Đảng nah gŭ ti dŭm alŭ ƀuôn mnuih djuê ƀiă ti čar Kon Tum mâo bruă klam yuôm bhăn hlăm bruă mkŏ mjing Đảng leh anăn bruă klam mđĭ kyar bruă duh mkra ala ƀuôn ti nah gŭ. Klei anei ăt dưi mñă klă êjai hluê ngă dŭm hdră êlan klă klơ̆ng păn ngă khua dlăng bruă Đảng nah gŭ hlŏng păn ngă khua alŭ, khua ƀuôn. Khua dlăng bruă Đảng nah gŭ A Sao, hlŏng ngă khua ƀuôn Kon Teo Đăk Lấp, să Đăk Long, kdriêk Đăk Hà brei thâo, bruă lu hĭn ƀiădah găl hlăm klei gĭt gai, hluê ngă dŭm mta bruă hlăm ƀuôn. Mơ̆ng bruă bi hmô leh anăn gĭt gai mơ̆ng A Sao, 230 gŏ sang hŏng hlăm brô 1.200 gŏ sang mnuih Sêdang ti ƀuôn Kon Teo Đăk Lấp, dŭm thŭn giăm anei jhŏng bi hrŏ ênhă pla mjing hbei ƀlang, ktơr, lŏ hma čiăng mđĭ kyar ênhă pla mjing kphê, ksu leh anăn ana ƀơ̆ng boh:

“Bruă klam mơ̆ng pô ba anăp hlăm alŭ, kâo gĭr mtrŭt mjhar mnuih ƀuôn sang mâo đang war ngă bruă rông mnơ̆ng, pla ana boh kroh. Pô dưi ngă kơh dưi lač kơ mnuih ƀuôn sang. Ngă brei mnuih ƀuôn sang ƀuh, hluê leh anăn đru kơ ƀuôn pô mrâo mrang hĭn, ƀrư̆ ƀrư̆ tlaih ƀun hŏng klei kjăp”.

Čiăng bi lar bruă klam mơ̆ng êpul phung khua dlăng bruă Đảng nah gŭ ti dŭm alŭ ƀuôn mnuih djuê ƀiă hlăm bruă mkŏ mkra krĭng ƀuôn sang mrâo, dŭm anôk bruă Đảng nah gŭ ti čar Kon Tum uêñ mĭn nanao kơ bruă mtô bi hriăm leh anăn bi mbŏ klei thâo kơ êpul khua bruă Đảng nah gŭ thâo klă hdră êlan, mbĭt anăn mâo djăp ai dưi mtô lač, ktrâo bruă kơ mnuih ƀuôn sang hlăm klei mă bruă knuă. Trần Ngọc Trực, Khua dlăng bruă Đảng să Đăk Long, kdriêk Đăk Hà brei thâo, hdră êlan mơ̆ng bruă Đảng să hluê ngă čiăng bi lar bruă klam mơ̆ng 5 čô khua dlăng bruă Đảng nah gŭ alŭ ƀuôn mnuih djuê ƀiă hlăm bruă mkŏ mjing leh anăn bi lar klei bi hmô mđĭ kyar bruă duh mkra gŏ sang:

“Hŏng bruă gĭt gai ktrâo lač, Bruă Đảng nah gŭ mkŏ mjing kơ phung khua dlăng bruă Đảng nah gŭ klei čuă dlăng, hriăm dŭm klei bi hmô jăk. Truh kơ wưng anei dưi hluê ngă 5 klei bi hmô mđĭ kyar bruă duh mkra, mđĭ hnư hrui wĭt kơ mnuih djuê ƀiă. Hnơ̆ng gŏ sang ƀun ƀin hrŏ lu mkă hŏng dŭm thŭn êlâo. Ênoh gŏ sang thâo mâo đĭ lu”.

Truh kơ ară anei, čar Kon Tum mâo leh 44 să dưi tŭ yap krĭng ƀuôn sang mrâo, hlăm anăn mâo 4 să krĭng ƀuôn sang mrâo mđĭ hnơ̆ng leh anăn 1 să krĭng ƀuôn sang mrâo bi hmô. Khădah dŭm alŭ ƀuôn mnuih djuê ƀiă ti čar Kon Tum kñăm lu hĭn ti krĭng taih kbưi, ƀiădah truh kơ ară anei ăt mâo 45 alŭ, ƀuôn ênŭm hnơ̆ng čuăn krĭng ƀuôn sang mrâo. Čiăng kơ bruă mkŏ mkra krĭng ƀuôn sang mrâo ti krĭng mnuih djuê ƀiă hlăm čar mâo lu klei mlih jăk, klei hdĭp leh anăn klei mă bruă mơ̆ng mnuih ƀuôn sang mâo klei đĭ kyar, mâo nanao êpul ba anăp jing phung khua dlăng bruă Đảng nah gŭ ti dŭm alŭ, ƀuôn./.