Mơ̆ng hruê mâo phung knuă druh đảng viên nao truh ti sang čiăng mtrŭt mjhar mlih hĕ ênhă pla mjing kphê amâo mâo lŏ jing leh anăn lŏ pla dŭm mta djam mtam, mnga leh anăn tei nan hruê̆, gŏ sang Liêng Hót Ha Linh, ti alŭ Dă Tro, să Dă Ñim, kdriêk Lạc Dương, čar Lâm Đồng jhŏng hluê ngă leh anăn mâo hnư hrui wĭt lu kơ gŏ sang. Liêng Hót Ha Linh brei thâo, 6 sao djam mtam, mnga leh anăn tei nan hruê̆ mâo gŏ sang plah mjing hluê êlan bruă lŏ hma dưn kyua kdrăp mrâo mrang, kah knar grăp thŭn gŏ sang hrui wĭt êbeh 500 êklăk prăk.

“Kyua mâo phung knuă druh, đảng viên, bruă sang čư êa hâo hưn, mtrŭt mjhar brei mkŏ wĭt ana pla mjing, mbĭt anăn mkŏ mjing dŭm adŭ mtô bi hriăm, ba jao hdră mnêč mkra mjing, gŏ sang jhŏng bi mlih sa kdriêk ênhă pla kphê jing pla tei nan hruê̆, pla mnga hlăm sang ală kĭng. Mơ̆ng anăn, hnư hrui wĭt mơ̆ng gŏ sang mâo lu hĭn mkă hŏng êlâo dih. Ăt mơ̆ng anăn, kâo pô leh anăn mnuih ƀuôn sang hlăm ƀuôn dưi thâo klă si ngă pla mjing tŭ dưn, ba bruă duh mkra gŏ sang đĭ kyar”.

Hluê si đảng viên Cil Pam Ka Duyên, ti alŭ Dă Tro, čiăng kơ mnuih ƀuôn sang đăo knang leh anăn jhŏng bi mlih klei mĭn mă bruă, mkŏ wĭt ana pla mjing, ba dŭm mta mjeh mrâo hlăm klei mkra mjing, mđĭ hnư hrui wĭt, grăp čô đảng viên srăng jing pô nao êlâo. Mâo mnuih sĭt, bruă sĭt, bruă hâo hưn, mtrŭt mjhar dŭm hdră êlan mơ̆ng Đảng leh anăn klei bhiăn lăn čar dưi ba wĭt boh tŭ dưn jăk, mnuih ƀuôn sang srăng hluê ngă. Bi asei pô, Cil Pam Ka Duyên dưi mkŏ mjing leh sa klei bi hmô pla mjing teinan hruê̆ čiăng kơ mnuih ƀuôn sang hlăm alŭ kdiêm dlăng, hluê hriăm.

“Êjai jing sa čô đảng viên, kâo mâo thiăm klei găl čiăng thâo săng klă hĭn kơ dŭm hdră kčah mtrŭn, hdră êlan mơ̆ng Đảng, klei bhiăn lăn čar. Kyuanăn, kâo dưi ngă jăk bruă Đảng, bruă sang čư êa čư êa jao. Leh anăn ăt mơ̆ng anăn, kâo đru kơ mnuih ƀuôn sang pô lu hĭn. Klă klơ̆ng, mtrŭt mjhar mnuih ƀuôn sang mkŏ wiĭ ana pla mjing, gĭr lŏ pla thiăm ana ƀiă hruê čiăng mđĭ kyar klei hdĭp mda gŏ sang. Ară anei klei hdĭp mơ̆ng mnuih ƀuôn sang dŭm djuê ana tinei mdul ƀiă leh klei dleh dlan mkă hŏng êlâo dih”.

Amâodjŏ knŏng ti alŭ Dă Tro, lu đảng viên mkăn ti dŭm alŭ ƀuôn mơ̆ng să Dă Ñim ăt thâo săng klă bruă klam pô hlăm bruă nao êlâo hlăm djăp mta bruă. Hlăm anăn, srăng yăl dliê kơ bruă mkŏ wĭt ana pla mjing, bi đru hdơ̆ng pô mđĭ kyar bruă mkra mjing, đru mguôp hruê ai, ana mjeh, hdră mnêč ngă bruă…Kyuanăn, mkra mjing bruă lŏ hma mơ̆ng Dă Ñim dưi bi lu jơr ana pla mjing, ƀrư̆ ƀrư̆ ngă bruă lŏ hma hluê si klei kuôl kă leh anăn mđĭ hĭn boh tŭ mnơ̆ng dhơ̆ng. Mơ̆ng knŏng pla mjing hjăn ana kphê, truh kơ ară anei, Dă Ñim dưi mđĭ kyar 16ha ana êa drao Atisô, 6ha tei nan hruê̆, 40ha mnga khăt adhan, 300ha djam mtam, êtač êbai dŭm mta leh anăn êbeh 330ha ana ƀơ̆ng ƀoh. Hluê si đảng viên Cil Pam Ka Phương, ti alŭ Đarahoa, să Dă Ñim, čiăng dưi mâo boh tŭ dưn hlăm bruă hâo hưn, mtrŭt mjhar, đảng viên nao êlâo ƀuôn sang hluê êdei dưi dlăng yuôm bhăn leh anăn bi lar.

“Hmei hâo hưn, mtrŭt mjhar dŭm gŏ sang mnuih djuê ƀiă hlăm bruă kriê dlăng mđĭ kyar bruă duh mkra ala ƀuôn. Sui hŏng anei ana pla mjing phŭn mơ̆ng mnuih ƀuôn sang jing ana kphê, ară anei mkŏ wĭt ana pla mjing hluê êlan anôk mnia mblei msĕ si djam mtam, trŏng, êtak êbai dŭm mta čiăng dưi đĭ kyar”.

Mbĭt hŏng mđĭ kyar bruă duh mkra, bruă klam nao êlâo, bi hmô mơ̆ng grăp čô đảng viên lŏ mâo bruă đảng să Dă Ñim bi myuôm hluê ngă tŭ dưn hlăm lu mta bruă, hlăm anăn dưi yăl dliê kơ hdră bruă hrăm mbĭt mkŏ mkra krĭng ƀuôn sang mrâo, bi hrŏ ƀun hŏng klei kjăp, bi lar klei bi mguôp djuê ana, mkŏ mjing bruă kđi čar kjăp ktang. Kon Sơ Ha Vương, khua dhar bruă mặt trận să Dă Ñim brei thâo, klei anei dưi đru kơ Dă Ñim hmar msưh kdŭn klei ƀun ƀin, kpưn đĭ jing să mâo ênŭm hnơ̆ng čuăn krĭng ƀuôn sang mrâo leh anăn dôk mkŏ mkra krĭng ƀuôn sang mrâo mđĭ hnơ̆ng.

“Hluê ngă hdră kčah mtrŭn mơ̆ng Đảng, klei bhiăn lăn čar, hlăm wưng êgao, bruă Đảng, bruă sang čư êa hâo hưn kơ mnuih ƀuôn sang hluê ngă jăk hdră mkŏ mkra krĭng ƀuôn sang mrâo. Hŏng hdră knŭk kna leh anăn mnuih ƀuôn sang ngă hrăm mbĭt, lu bĭt êlan klông, kban, êlan êa khăt dưi duh bi liê kjăp. Mbĭt hŏng bi hơĭt bruă duh mkra, klei hdĭp mda mơ̆ng mnuih ƀuôn sang dưi mđĭ hĭn klă nik”.

Kyua bi lar bruă klam mơ̆ng đảng viên hlăm bruă nao êlâo, bi hmô, ktrâo atăt mnuih ƀuôn sang hluê ngă dŭm dưn dŭm hdră mơ̆ng alŭ wăl mtrŭt mjhar, bruă duh mkra ala ƀuôn mơ̆ng să Dă Ñim, kdriêk Lạc Dương, čar Lâm Đồng dôk amâo mâo mdei mđĭ kyar kpưn đĭ hlăm grăp hruê.