Dôk hlăm yan pĕ kphê. Djŏ boh mnga, mâo mđiă siam snăn jih jang mnuih pla kphê ti bon BuN’Doh, să Dak Wer, Dak Rlâp (Dak Nông) jih jang mâo klei mơak sơăi. Gŏ sang Điểu Suynh ti bon BuN’Doh mâo 7 ha lăn hma pla tiu, boh durian, lehanăn ana măkka. Hlăm anăn mâo truh 4 ha kphê hlăk thŭn mboh hĭn êdi. Thŭn dih mâo ba wĭt truh 10 tôn kphê asăr, snăn thŭn anei năng ai mâo truh êbeh  13 tôn. Yan êlâo kphê knŏng mâo čhĭ mil 40 êbâo prăk/kg, ară anei ênoh đĭ leh êbeh kơ sa mkrah, giăm knar 60 êbâo prăk/kg. Điểu Suynh lač: Dŭm hrue hŏng anei mô̆ ñu tuôm hŏng klei ruă êngoh bi ƀlĕ êrah, dôk mdrao ti sang êa drao čar. Mlam ñu nao kơ sang êa drao kiă mô ruă, ƀiădah truh aguah ưm ñu lŏ nao kơ hma mtam čiăng kiă phung đru bruă, êbeh kơ 10 čô mnuih dôk pĕ kphê kơ gŏ sang ñu. Dŭm thŭn hŏng anei leh, Điểu Suynh mâo mnuih ƀuôn sang đăo knang ruah ñu ngă khua ƀuôn BuN’Doh kyuanăn truh yan pĕ kphê, ñu knư̆ hĭn mơh gun hlăm bruă: msĕ si tiŏ nao mnuih ƀuôn sang mbha êpul bi gak răng kơ kphê huĭ kơ klei tlĕ dăp, lehanăn mtă mtăn kơ mnuih ƀuôn sang pĕ kphê ksă čiăng kơ jăk boh kphê mâo.   Điểu Suynh lač: hlăm bon mâo truh 31 gŏ sang čan prăk mơ̆ng knơ̆ng prăk pioh duh kơ bruă lŏ hma. Hjăn gŏ sang ñu êlâo dih ăt bi čan lĭng êbeh 1 êklai prăk. Ƀiădah tla ƀrư̆ ƀrư̆, ară anei knŏng adôk đuôm nư hlăm brô 400 êklăk prăk, êjai anăn pưk sang, war bưn ñu mâo ênoh truh gŭ dlông 15 êklai prăk.

“Knơ̆ng prăk Argibank Nhân Cơ mjing brei leh klei găl kơ hmei mâo čan hŏng mnga hdjul mơ̆ng thŭn 2012 truh kơ ară anei.  Êlâo dih lu mnuih ƀuôn sang ka tuôm mâo čan ôh prăk mơ̆ng knơ̆ng prăk Argibank hŏng mnga hdjul, mnuih ƀuôn sang čan kơ êngao hŏng mnga ktrŏ. Snăn mơ̆ng leh mâo knơ̆ng prăk Agribank hmei dưi mâo prăk duh kơ bruă lŏ hma pla mjing, dlăng kriê kphê ksu... Mơ̆ng anăn klei hdĭp mda gŏ sang mâo klei bi mlih, lehanăn bi mlih leh mơh krĭng ƀuôn sang hmei”.

Amâo mâo djŏ knŏng ti Dak RLâp, ƀiădah mnuih ƀuôn sang M’Nông ti kdriêk krĭng taih kbưi Tuy Đức, čar Daknông ăt mâo čan mơh prăk mơ̆ng knơ̆ng prăk Agribank hŏng klei ênưih pưih. Klei anei amâo mâo djŏ knŏng dưi msưh kdŭn klei brei čan prăk hŏng mnga ktrŏ, ƀiădah lŏ đru kơ mnuih ƀuôn sang mâo prăk kăk duh bi liê hbâo pruê dlăng kriê mnơ̆ng pô pla mjing hŏng klei pral djŏ yan. Ară anei mâo leh truh 237 gŏ êsei M’Nông mâo čan 44 êklai 800 êklăk prăk mơ̆ng knơ̆ng prăk Agribank ti Tuy Đức pioh duh mkr apla mjing. Điểu Jâng ti Bon Diêng Ngaih să Đăk R’Tih lač: Mâo hŏng anei 2 thŭn ñu mâo čan 500 êklăk prăk pioh blei hbâo pruê, lehanăn mjeh ana măkka, boh durian ba wĭt pla hlăm hma truh 3 ha. Ară anei mnơ̆ng pla čăt đĭ jăk, anăp ba wĭt boh mnga tŭ dưn:

“Mơ̆ng leh mâo čan prăk hŏng mnga hdjul mơ̆ng knơ̆ng prăk bruă lŏ hma, kâo duh bi liê pla mjing dlăng kriê kphê, tiu, boh durian... Boh nik jing kâo blei hbâo pruê kơ tiu, kphê, lehanăn boh durian... Mơ̆ng prăk anei ba wĭt leh klei tŭ êdi hŏng hmei, hŏng mnga hdjul mơh snăn mnuih ƀuôn sang hơĭt ai tiê êdi mă bruă"”

Thân Văn Chí, K’iăng khua knơ̆ng prăk Agribank Dak Nông lač: Agribank Dak Nông mâo leh sơăi anôk bruă pô truh leh ti dŭm kdriêk hlăm čar hŏng 14 anôk dôk ngă bruă. Phung knuă druh brei čan prăk păn kjăp alŭ wăl, snăn jih jang bruă brei mnuih ƀuôn sang čan prăk jing djŏ mnuih, djŏ bruă, mâo ba wĭt klei tŭ dưn jăk. Truh kơ ară anei, mâo leh 3.500 gŏ êsei mnuih djuê ƀiă mâo čan prăk mơ̆ng knơ̆ng prăk Agribank Dak Nông hŏng ênoh leh brei čan truh 570 êklai prăk.

“Hŏng prăk mơ̆ng anôk pô, hmei đru leh kơ mnuih ƀuôn sang amâo lŏ nao duah čan prăk kơ êngao hŏng mnga ktrŏ ôh, lehanăn hmei ƀuh hlăm wưng êgao, kyua klei čan kơ êngao ngă leh kơ mnuih ƀuôn sang lĕ hlăm klei dleh dlan. Mbĭt hŏng bruă mkăp djăp ngăn prăk kơ mnuih ƀuôn sang, hmei lŏ ktrâo atăt kơ mnuih ƀuôn sang hdră êlan yua prăk bi djŏ, đru ba wăt hlăm bruă yang ƀuôn, đru rŭ mdơ̆ng brei sang kơ mnuih dôk hlăm klei dleh dlan. Hlăm wưng leh êgao hmei mâo ngă leh dŭm hdră êlan đru ba anăn. Mâo lu snăk gŏ êsei mnuih ƀuôn sang djuê ƀiă mâo mdơ̆ng leh sang hơĭt ai tiê kơ klei duh ƀơ̆ng. Hlăm wưng ti anăp, hmei srăng lŏ dơ̆ng ngă čiăng ba ngăn prăk truh hŏng mnuih ƀuôn sang lu hĭn, pral hĭn, kñăm dưi đru kơ mnuih ƀuôn sang mâo sa klei hdĭp ƀrư̆ hrue ƀrư̆ đĭ kyar hĭn”./.