Êkei điêt Y-Rôlin Niê (10 thŭn, ti ƀuôn Dur 1, să Dur Kmăn, kdriêk Krông Ana) tiŏ nanao ama pô, ƀăng êgei blŭ tlao nanao. Ayŏng Y-Viễn Hmŏk brei thâo, êkei điêt Y-Rôlin jing anak amai mô̆ ayŏng. Ĕ luč amĭ êjai knŏng mrâo 18 mlan, ama lui nao dôk mô̆ mrâo. Êjai anăn, khădah mrâo dôk mô̆ leh anăn klei hdĭp dleh dlan, asei pô amâo mâo jăk, ƀiădah pap kơ ĕ amâo mâo pô kriê dlăng, kyuanăn ung mô̆ ayŏng ngă hră mơar rông ba ĕ.

Êjai mrâo rông ĕ amâo mâo thâo si ngă rông ba ăt ƀuh klei dleh dlan. Mâo aduôn aê hrăm mbĭt rông ba, ară anei anak prŏng leh kâo ƀuh hơ̆k mơak êdi. Ară anei kâo ƀuh anak msĕ hŏng anak pô kkiêng, khăp kơ ñu msĕ si anak pô, ƀuh pap ñu êdi.

Thâo klă klei dleh dlan mơ̆ng ĕ Y-Rôlin, mơ̆ng thŭn 2022, Êpul hgŭm bruă phung mniê să Dur Kmăn mtrŭt mjhar leh phung mâo klei tiê kmah bi mkrum mguôp hŏng hdră “Amĭ pô rông” đru kơ ĕ grăp mlan 500.000 prăk. Hŏng ênoh prăk anei mâo thiăm ênoh prăk blei hdruôm hră hriăm, mnơ̆ng yua hriăm hră mơar, đru mdul ƀiă klei dleh dlan kơ gŏ sang.

Sa čô mkăn ăt mâo klei đru mơ̆ng hdră “Amĭ pô rông” jing ĕ H’Hông Niê, 14 thŭn, ti ƀuôn Akŏ Siêr, ƀuôn hgŭm Tân Lập, ƀuôn prŏng Ƀuôn Ama Thuôt. Amĭ luč mâo hŏng anei 4 thŭn, ama dôk mô̆ mkăn kyuanăn ĕ H’Hông wĭt dôk hŏng aduôn aê. Aduôn aê kreh êngoh duam, prăk ba wĭt amâo mâo hơĭt. Mơ̆ng thŭn 2021, hŏng klei bi mguôp mơ̆ng Êpul hgŭm bruă phung mniê ƀuôn hgŭm Tân Lập, ĕ mâo aduôn Đỗ Thị Thơm, sa čô kiă kriê sa knơ̆ng bruă ti ƀuôn prŏng Ƀuôn Ama Thuôt đru rông ba truh 18 thŭn. Ĕ H’Hồng yăl dliê:

Kâo mâo klei khăp mơ̆ng amĭ Thơm kâo ƀuh dưi mdul ƀiă klei dleh dlan kyua amâo mâo amĭ. Amĭ đru kơ kâo grăp mlan 500.000 êbâo prăk. Sui sui amĭ hriê čuă leh anăn êmuh kña hlăm đĭng blŭ kơ kâo. Kâo knŏng thâo gĭr hriăm hră mơar čiăng kơ êdei dưi lŏ ba wĭt dŭm klei khăp mơ̆ng amĭ Thơm brei leh kơ kâo.

Ti čar Dak Lak ară anei mâo giăm 2.300 čô hđeh êrĭt amĭ ama, hlăm anăn mâo giăm 700 čô hđeh êrĭt wăt amĭ leh anăn ama, mâo klei hdĭp dleh dlan êdi. Hluê ngă hdră Amĭ pô rông mơ̆ng êpul gưl dlông mtrŭt mjhar, hlăm 2 thŭn êgao, Êpul hgŭm bruă phung mniê čar Dak Lak mkŏ hŏng dŭm êpul êya, grăp čô, phung mâo ai tiê kmah leh anăn dŭm gưl bruă phung mniê čar Dak Lak ngă bruă đru rông ba giăm 700 čô hđeh êrĭt amĭ ama hŏng ênoh prăk đru êbeh 7 êklai 800 êklăk prăk. Hŏng lu hdră đru msĕ si: mđup brei prăk kăk, pŏk hră mkiêt mkriêm, mđup brei hnư đru hriăm hră mơar, rŭ mjing sang dôk klei khăp, êdeh wai jơ̆ng, kdô gui, čhum ao. Amâo djŏ knŏng đru kơ kdrăp yua, êpul bruă phung mniê lŏ mbha bruă kơ phung hgŭm jêñ jêñ nao čuă êmuh, ktuê dlăng klei hriăm hră mơar mơ̆ng phung hđeh.

Aduôn Tô Thị Tâm, Khua kiă kriê êpul hgŭm bruă phung mniê čar brei thâo, hdră anei mâo boh tŭ dưn yuôm bhăn êdi. Hluê anăn, hluê anăn dưi đru bi juh, jing anôk knang kjăp kơ phung hđeh dưi găn jih klei dleh dlan, hung truh kơ êdei anăp.

Hmei ăt hmăng hmưi klei hrăm mbĭt, nao hgŭm mơ̆ng kluôm yang ƀuôn, năng ai dưi ngă hŏng keh prăk bruă phung mniê čar amâodah Keh prăk Đru kơ phung hđeh mơ̆ng Knơ̆ng bruă mnuih mă bruă čar kriê dlăng čiăng klă anăp đru kơ phung hđeh. Leh anăn hmăng hmưi dŭm êpul êya, grăp čô, dŭm knơ̆ng bruă, êpul bruă hlăm leh anăn êngao čar thâo klă bruă đru rông ba phung hđeh, srăng đru hŏng lu êlan mdê mdê, hŏng lu hdră mdê mdê leh anăn đru wăt hlăm ai tiê hŏng mnơ̆ng yua.

Hŏng hdră amĭ pô rông, lu phung hđeh êrĭt amĭ ama ti čar Dak Lak dưi mâo leh klei mđĭ ai, klei bi juh, dưi hdĭp hlăm klei khăp. Klei mđĭ ai hlăm ai tiê leh anăn mnơ̆ng yua srăng đru kơ phung hđeh mâo thiăm boh kdrŭt găn jih dŭm klei dleh dlan, gĭr ktưn hlăm klei hdĭp, mđing truh kơ sa mgi dih mgač tač hĭn.