Amâo mâo lŏ iêo đĭng blŭ kơ grăp čô mnuih ôh, thâodah kăn truh kơ grăp boh sang phung đảng viên kñăm hưn mthâo jih jang hdră mơ̆ng êpul bruă Đảng bi kƀĭn, lehanăn ya mta bruă čiăng ngă, snăn knŏng hŏng êpul Zalo, Lò Văn Oai, Khua bruă Đảng hlŏng klam ngă khua ƀuôn Mạt, să Mường Lèo, kdriêk Sốp Cộp, čar Sơn La hŏng klei ênưih mâo iêo kƀĭn jih jang phung đảng viên.

Ka tuôm găn ôh hlăm adŭ bi hriăm djă yua kdrăp mrâo mrang, ƀiădah hmei gĭr blei mâo sa boh computer, sa boh masin kđăm boh hră lehanăn hriăm yua ƀrư̆ ƀrư̆. Anôk bruă Đảng hmei mâo bi mklin mguuop mbĭt truh 31 čô hlăm Zalo, knŏng phung đảng viên thŭn mduôn leh, srăng iêo hŏng hdră mkăn. Mâo êpul zalo mơ̆ng êpul bruă Đảng ară anei, hưn mthâo djăp mta klei bi kƀĭn hŏng phung đảng viên lehanăn bi lar dŭm mta bruă mkăn jing ênưih leh.

Ai êwa klei bi mguôp mơ̆ng anôk bruă Đảng ƀuôn Mạt ăt ƀrư̆ hrue mâo klei bi mlih, mơ̆ng leh pô kiă kiă kriê êpul bruă Đảng thâo djă yua kdrap mă bruă mrâo mrang. Ya mta bruă phung khua kiă kriê gĭt gai hlăm bruă mkŏ mkra krĭng ƀuôn sang mrâo, bi mlih mnơ̆ng pla mnơ̆ng rông êlâo dih dôk găn hlăm klei dleh kpăk kơ hdră mă bruă, snăn ară anei hŏng dŭm klei leh thâo săng mơ̆ng Internet.

Ƀuôn Mạt, să Mường Lèo êlâo dih dôk hlăm klei dleh dlan êdi, ară anei mnuih ƀuôn sang thâo ba yua leh klei kreh knhâo hlăm bruă duh mkra pla mjing êbeh kơ 50 ha mdiê, 25 ha hbei ƀlang, 25 ha ana boh kroh; rông giăm 4.000 drei ŭn mnŭ, mkŏ mjing mâo 2 êpul hgŭm bruă lŏ hma... Hnơ̆ng ênoh gŏ êsei ƀun, truh kơ ară anei adôk mă 6%. Amai Lường Thu Hương, đảng viên ti êpul bruă Đảng ƀuôn Mạt yăl dliê:

Kâo ba yua leh klei kreh knhâo hlăm bruă rông êmô, kbao, kâo tui hriăm leh hlăm hla pŏk kơ klei duh ƀơ̆ng, čiăng kơ bruă rông mnơ̆ng lehanăn pla mjing mâo ba wĭt boh tŭ dưn. Jing đảng viên kâo ngă jih ai tiê hâo hưn hŏng mnuih ƀuôn sang kơ hdră rông mnơ̆ng bi mâo klei tŭ dưn.

Kơ yan mta klei jăk klei djŏ pioh mđĭ kyar klei hdĭp mda, mkŏ mkra krĭng ƀuôn sang mrâo ti lu alŭ wăl, lu djuê ana... mâo khua kiă kriê êpul bruă Đảng, dŭm gưl bruă Đảng, mbĭt hŏng jih jang phung đảng viên hlăm ƀuôn bi đru hŏng hla pŏk pô, hla pŏk êpul. Snăn Giàng A Dệnh, Khua êpul bruă Đảng hlŏng jing khua ƀuôn Sam Quảng lač:

Dlăng hlăm hla pŏk yang ƀuôn, ƀuh jing mâo lu klei čih jăk lač kơ đảng viên thâo bi hmô ngă bruă jăk, mnuih jăk, kâo mă klei anăn yăl dliê hŏng phung đảng viên hlăm êpul pô. Hlăm hdră mđung rup, lehanăn dŭm klei hâo hưn mkăn kâo tui hriăm lehanăn ba yua hlăm klei duh ƀŏng, bruă Đảng êpul hgŭm ăt mâo leh mơh klei bi ksiêm, bi hriăm êmuh pioh lŏ bi lar hŏng mnuih ƀuôn sang.

          Phan Thanh Lăng jing knuă druh kdriêk, mâo tiŏ nao păn ngă khua kiă kriê bruă Đảng ti să dleh dlan Mường Lèo, kdriêk Sốp Cộp, čar Sơn La brei thâo:  Buă Đảng să mtrŭt leh dŭm êpul bruă Đảng blei computer pioh kơ klei mă bruă. Truh ară anei, 10/17 êpul bruă Đảng ti să čŏng bi ksiêm duah, hriăm êmuh kñăm čiăng thâo ba yua kdrăp mă bruă mrâo mrang kơ klei kiă kriê, gĭt gai. Mbĭt hŏng anăn, Bruă Đảng să ăt bi kjăp mơh truh hŏng jih jang phung knuă druh, mnuih ngă bruă, phung đảng viên bi ba yua bi kjăp kdrăp mrâo mrang:

          Kâo kiă kriê gĭt gai mnuih ngă bruă bi čih hưn ênŭm akkhao pô hlăm hla pŏk yang ƀuôn, mkra dŭm êpul Zalo čiăng kơ jih jang bi mâo bruă klam hlăm klei ba yua, lehanăn kiă kriê ti gưl bruă đảng nah dlông. Jih ai tiê bi đru dŭm klei mtô bi hriăm mơ̆ng dŭm klei hâo hưn mơ̆ng anôk bruă klei mrâo, sang mđung asăp mđung rup gưl dlông bi đru hâo hưn kơ jih klei mtă mtăn, lehanăn gang mkhư̆ kơ djăp mta klei hâo hưn amâo mâo jăk, klei amâo mâo djŏ... huĭdah ba klei amâo mâo jăk truh hŏng klei mĭn, ai tiê mnuih ƀuôn sang, ngă luič klei đăo knang hŏng Đảng knŭk kna. Mbĭt hŏng anăn, mtrŭt jih jang phung knuă druh, mă rup, mdar video kơ jih jang bruă jăk mơ̆ng ƀuôn, mơ̆ng êpul bruă Đảng, mơ̆ng bruă knuă jing điêt dhiêt hơăi mang hlue mta kñăm jing mjut mjing djăp mta klei siam klei jăk, msưh bi kdŭn jih jang klei jhat klei amâo mâo siam.

Kyua thâo ba yua leh kdrăp mrâo mrang, dưn yua jih jang klei jăk klei djŏ mơ̆ng hla pŏk yang ƀuôn, phung đảng viên ti să knông lăn Mường Lèo, kdriêk Sốp Cộp, čar Sơn La mghaih msir djăp mta klei dleh dlan ti alŭ wăl hlăm bruă mkŏ mkra krĭng ƀuôn sang mrâo msĕ si; hlăm alŭ wăl taih kbưi, anôk mnuih buôn sang dôk raih rưng, klei thâo sang mnuih ƀuôn sang kƀah, ênưih lĕ hlăm klei arăng duah mplư tui tiŏ klei đăo soh, ka mâo klei knŭk kna brei klei dưi ôh. Mơ̆ng anăn brei ƀuh bruă klam mơ̆ng grăp čô đảng viên mâo bi êdah hlăm djăp mta bruă./.