Êbat ti êlan bê tông bŏ hŏng mnga pla dăp pruê̆ ti dua nah êlan, Kpuih Hạnh, khua dlăng bruă Đảng hlŏng păn ngă khua ƀuôn Neh Xo, să Ia Tôr, kdriêk Čư̆ Prông brei thâo, êlan mnga anei mâo dŭm gŏ sang hlăm ƀuôn pla mjing ti krah thŭn dih leh anăn jing sa kdrêč mơ̆ng boh tŭ dưn hlăm hdră mkŏ mkra krĭng ƀuôn sang mrâo ti alŭ wăl. Mbĭt hŏng ƀô̆ mta krĭng ƀuôn sang mrâo mrang, doh siam, êjai mâo ênŭm hnơ̆ng čuăn krĭng ƀuôn sang mrâo, klei hdĭp mnuih ƀuôn sang ti ƀuôn Neh Xo ăt mâo klei mlih klă sĭt, knŏng dôk mâo 6 gŏ sang hlăm 150 gŏ sang jing gŏ sang ƀun. Hluê si Kpuih Hạnh, hŏng sa ƀuôn lu jing mnuih djuê ƀiă msĕ si ƀuôn Neh Xo, čiăng mtrŭt mjhar mnuih ƀuôn sang hrăm mbĭt, sa ai, klei bi hmô mơ̆ng phung knuă druh, đảng viên jing yuôm bhăn sơnăk:

 “Đảng viên nao êlâo, ƀuôn sang hluê êdei. Êlâo hĭn đảng viên srăng ngă êlâo msĕ si klei pla mnga, mnư̆ mtah, klei ƀăng hwiê djah, ngă sang tlô doh, hluê ngă dŭm hdră kčah mtrŭn, hdră êlan, klei bhiăn lăn čar, hâo hưn kơ mnuih ƀuôn sang ngă bruă duh mkra, mđĭ hnư hrui wĭt, bi mlih knhuah mĭn, hdră ngă, amâo mâo brei klei bi dôk ung mô̆ mơ̆ng mda, brei anak nao sang hră mơar truh hnơ̆ng”.

Ăt msĕ sơnăn mơh ti ƀuôn Ƀang, să Ia Tôr, 11 čô đảng viên hlăm anôk bruă Đảng ƀuôn mtrŭt mjhar gŏ sang, găp djuê bi mkrum mguôp prăk kăk, hruê ai mă bruă ngă êlan leh anăn hluê ngă dŭm hnơ̆ng čuăn kơ wăl hdĭp mda, bruă mdrao mgŭn, mtô bi hriăm. Anôk bruă Đảng ƀuôn mbĭt hŏng bruă sang čư̆ êa, mặt trận êpul êya ti să Ia Tôr mtrŭt mjhar mnuih ƀuôn sang hur har pla mjing kphê, amâo mâo koh hĕ ôh dŭm đang ana pla mjing phŭn, hriăm krih êa mkiêt mkriêm leh anăn dưn yua kdrăp mrâo hlăm klei ngă bruă. Mơ̆ng krah thŭn 2023, lu mta ana pla mjing phŭn mâo boh, mâo ênoh, đru leh kơ dŭm gŏ sang hlăm ƀuôn mâo mnơ̆ng ƀơ̆ng huă, ngăn dŏ. Puih Pak – mnuih ƀuôn sang ƀuôn Ƀang brei thâo:

           “Êlâo dih dleh dlan hĭn, ară anei dưi ƀiă leh. Đa đa gŏ sang thâo duh ƀơ̆ng mâo leh sang dôk, mâo êdeh đĭ, amâo lŏ dôk sang hlang msĕ hŏng êlâo ôh. Ară anei klei hdĭp đĭ kyar hĭn leh”.

          Ară anei, să Ia Tôr, kdriêk Čư̆ Prông mâo êbeh 1.100 gŏ sang, hŏng 5.079 čô mnuih ƀuôn sang. Mơ̆ng anăn, mnuih ƀuôn sang djuê ƀiă mâo giăm 50%. Hlăm lu thŭn mkŏ mkra krĭng ƀuôn sang mrâo, Bruă Đảng să gĭt gai, ktrâo lač, mơ̆ng bruă kđi čar dŭm alŭ, ƀuôn, mlih mrâo hdră ngă bruă, kñăm hâo hưn, mtrŭt mjhar mnuih ƀuôn sang hur har nao hgŭm, ƀrư̆ ƀrư̆ bi mâo ênŭm dŭm hnơ̆ng čuăn.

Knhal jih thŭn 2023, să mâo 19/19 hnơ̆ng čuăn krĭng ƀuôn sang mrâo. Djăp mta hlăm klei hdĭp mnuih ƀuôn sang mâo klei mlih jăk. Ară anei, hnơ̆ng gŏ sang ƀun leh anăn giăm ƀun hlăm să hrŏ ti gŭ 8%, hnư hrui wĭt kah knar grăp čô mâo 47 êklăk prăk hlăm sa thŭn. Bruă mtô mjuăt bi hriăm, bruă mdrao mgŭn, kriê dlăng klei suaih pral, răng mgang wăl hdĭp mda, hdơr knga tla ai, mkŏ mjing klei hdĭp kreh dhar dưi bi myuôm, klei êđăp ênang yang ƀuôn dưi rơ̆ng kjăp.

Nguyễn Quang Phương- K’iăng khua bruă đảng să Ia Tôr brei thâo, bruă Đảng să srăng lŏ dơ̆ng gĭt gai mơ̆ng bruă kđi čar truh kơ alŭ ƀuôn kñăm rơ̆ng kjăp leh anăn mđĭ hĭn dŭm hnơ̆ng čuăn krĭng ƀuôn sang mrâo. Hlăm anăn, srăng lŏ dơ̆ng bi myuôm bruă klam bi hmô mơ̆ng phung đảng viên čiăng hrăm mbĭt hŏng mnuih ƀuôn sang mđĭ hnư hrui wĭt:

 “Êpul khua bruă Đảng hlăm să mkŏ mjing leh hdră hâo hưn klei bi hriăm dŭm hdră mtrŭn, asăp mtrŭn truh kơ đảng viên, knuă druh leh anăn mnuih ƀuôn sang hlăm să. Hŏng klei hriăm leh anăn hlue ngă msĕ si gru mngač Hồ Chí Minh, đảng viên ênưih giăm hŏng mnuih ƀuôn sang hĭn, mđing hmư̆ klei čiăng, klei hmăng hmưi mơ̆ng mnuih ƀuôn sang, hưn mdah hŏng bruă Đảng, bruă sang čư êa alŭ wăl.”

Hŏng klei bi mguôp hluê ngă dŭm hdră mtrŭn, hdră êlan, bruă Đảng, bruă sang čư êa leh anăn mnuih ƀuôn sang hrăm mbĭt mkŏ mjing klei hdĭp ƀrư̆ hruê ƀrư̆ đĭ kyar ti knông lăn Gia Lai./.