Mă bruă hlăm anôk bruă mdrao mgŭn mơ̆ng thŭn 2014, khădah dôk ti ƀuôn prŏng Hồ Chí Minh amâo dah wĭt ti Dak Lak, êkei êdam Y-Pôt Niê ăt bi mĭn nanao kơ mnâo mnañ kphê čŏng pô đeh kwă. Mlan 8 thŭn 2019, ayŏng lui bruă mdrao mgŭn, mphŭn čô̆ hŏng bruă mkra kphê. Ayŏng mkŏ mjing Anôk bruă Êđê Café lehanăn mâo Knơ̆ng bruă dưn yua klei mĭn mrâo bi mklă anăn knăl mdê hjăn. Leh 3 thŭn mkŏ mjing, anăn knăl Êđê Café mâo wăl anôk mnia mblei hlăm lehanăn êngao čar tŭ yap, mâo bruă sang čư̆ êa alŭ wăl bi mklă mta mnơ̆ng OCOP 4 mtŭ. Lač kơ klei anăn Anôk bruă Êđê Café, Y-Pôt Niê brei thâo:

“Mnuih Êđê ƀiă snăk mnuih mă bruă mnia mblei, kâo jing pô tal anei mă bruă snei, tal 2 kâo čiăng ba klei hmăi mơ̆ng mnuih Êđê, čiăng bi êdah mnuih Êđê ăt dưi ngă lehanăn mnuih Êđê dưi nao dŭm mta mnơ̆ng jăk truh kơ tar rŏng lăn thâo. Truh hruê anei kâo dưi bi mklă leh klei anei lehanăn ƀrư̆ hruê ƀrư̆ mâo lu mnuih Êđê thâo kơ Êđê Café”.

Čiăng mâo djăp kphê čiăng mkra kphê kpŭng, Y-Pôt bi hgŭm hrui blei kphê mơ̆ng mnuih ƀuôn sang ti alŭ wăl hŏng ênoh đĭ hĭn wăl anôk mnia mblei 10.000 prăk/kg kphê asăr. Mbĭt anăn, ayŏng đru kơ mjeh boh durian, ƀơr kơ mnuih ƀuôn sang pla pluă, mtrŭt mjhar bi mlih hluê hdră pla mjing doh. Truh ară anei, anôk bruă ayŏng mâo leh krĭng mkăp kphê êbeh 50 ha. Anôk bruă ăt mjing bruă mă h’ĭt kjăp kơ dŭm pluh čô mnuih Êđê hŏng ênoh hrui wĭt mơ̆ng 12 – 20 êklăk prăk/mlan. Y –Phen Niê, Khua êpul hgŭm bruă lŏ hma să Drai Săp brei thâo, mơ̆ng hdră ngă Y-Pôt, ƀĭng ngă lŏ hma tinei ăt mâo klei bi mlih ƀrư̆ ƀrư̆, klei hdĭp đĭ kyar hĭn mơh.

“Gru hmô bi hgŭm hluê êpul mơ̆ng Anôk bruă Êđê Café mâo lu mnuih ƀuôn sang tui hriăm. Mơ̆ng anôk bruă anei ba wĭt leh boh tŭ bruă duh mkra lehanăn hnư hrui wĭt mơ̆ng ana kphê jing lu lehanăn klei bi hgŭm anei mjing leh klei găl kơ hdră mđĭ kyar ti alŭ wăl.

Êngao kơ kphê kpŭng, Y-Pôt lŏ tui ksiêm mjing klei mdê kơ mnơ̆ng pô mkra mjing. Ară anei, ayŏng mkra leh kphê mguôp mnâo mnañ mơ̆ng boh kroh, mâo lu mnuih khăp čiăng. Ayŏng kreh nao hgŭm hlăm knăm m’ak bruă lŏ hma doh, hưn mthâo mnơ̆ng hluê êlan hla pŏk web yang ƀuôn… čiăng duah anôk hrui blei. Lu êpul bi hgŭm leh hŏng anôk bruă ayŏng. Vũ Trường Sinh, Khua anôk bruă Logicstic Tân Phát Địa, mơ̆ng Đồng Nai bi hgŭm hŏng Anôk bruă Êđê Café yăl dliê snei:

“Mơ̆ng 2 hruê dôk tinei lehanăn ƀuh ti anôk pla mjing truh kơ hdră mkra mjing, kâo ƀuh mta mnơ̆ng anei jăk êdi. Kyua anăn kâo čiăng bi hgŭm hŏng Êđê Café hlăm wưng ti anăp, srăng mâo hdră ba mta mnơ̆ng anei truh kơ wăl anôk blei mnia ala tač êngao”

Gĭr mă bruă, Y-Pôt ba wĭt leh klei tŭ dưn. Thŭn 2022, Anôk bruă Êđê Café mâo Knơ̆ng ksiêm dlăng Anôk bruă duh mkra điêt lehanăn man dưn mkăp hră tŭ yap “Top 10 – anăn knăl mnơ̆ng dhơ̆ng mâo k’hưm 3 kwar, mnơ̆ng mâo hnơ̆ng tŭ jăk. Thŭn 2021, kphê Robusta mơ̆ng Anôk bruă êđê Café dưi bi mklă jing “Mta mnơ̆ng lŏ hma êdah êdi gưl čar”, mta mnơ̆ng OCOP 4 mtŭ mơ̆ng Dak Lak. Mrâo anei, Y-Pôt jing sa hlăm dŭm “Ƀĭng ngă lŏ hma Việt Nam  kdlưn hĭn thŭn 2022” mâo Êpul mnuih ngă lŏ hma Vịêt Nam gưl dlông pah mni. Lač kơ ktuê êlan ti anăp, ayŏng brei thâo:

“Tal êlâo jing krĭng pla kphê prŏng lehanăn kluôm să Drai Săp lehanăn kdriêk Krông Ana srăng hluê ngă hdră pla doh lehanăn bi hgŭm hŏng Êđê Café. Klei čang hmăng mơ̆ng Êđê Café jing ba mnơ̆ng jăk hĭn truh kơ tar rŏng lăn dưi thâo.

            Hŏng klei khăp m’ai lehanăn klei gĭr amâo mdei, Y-Pôt dôk ba mnâo mnañ kphê jiă knhuah djuê ana pô kpưn đĭ kbưi hĭn.